អង្គការសុខភាពពិភពលោកបានតាមដានយ៉ាងយកចិត្តទុកដាក់លើមេរោគ កូវីដ១៩ បំប្លែងថ្មីប្រភេទថ្មី «មុយ» ដែលត្រូវបានគេរកឃើញថា សមត្ថភាពចម្លងបានលឿនជាងមេរោគប្រភេទ ឌែលតា ទៅទៀត និងទំនងជាអាចឈានទៅកាត់ផ្តាច់ប្រព័ន្ធការពាររបស់វ៉ាក់សាំងបង្ការកូវីដ១៩ថែមទៀតផង។ យ៉ាងណាមិញ នាពេលថ្មីៗនេះ សហរដ្ឋអាមេរិកត្រូវបានគេរកឃើញករណីឆ្លងមេរោគបំប្លែងថ្មី ប្រភេទ មុយ ខ្ពស់ជាងគេ ជាពិសេសនៅពាក់កណ្តាលខែកក្កដាកន្លងទៅនេះ។
សូមបញ្ជាក់ថា ជិត ២០០ ករណី ក្នុងចំណោមអ្នកឆ្លងមេរោគបំប្លែងថ្មីប្រភេទ មុយ ៤០០ករណីនៅសហរដ្ឋអាមេរិក គឺត្រូវបានរកឃើញនៅក្នុងទីក្រុង Los Angeles នៃរដ្ឋកាលីហ្វ័រញ៉ា។
ទន្ទឹមនេះ ប្រធានផ្នែកសុខភាពសាធារណៈនៅទីក្រុងនេះ បានបញ្ជាក់ថា ការកំណត់អត្តសញ្ញាណមេរោគប្រភេទ មុយ និងការរីករាលដាលនៃមេរោគនេះ តម្រូវឱ្យពលរដ្ឋរស់នៅទីក្រុង Los Angeles ត្រូវតែចាត់វិធានការការពារខ្លួនបន្តទៀត ហើយនេះបានបង្ហាញថា ការចាក់វ៉ាក់សាំង និងការការពារពិតជាមានសារសំខាន់ណាស់។
អត្ថបទគួរអាន
សូមរំឭកថា រហូតមកទល់ពេលនេះ នៅទូទាំងពិភពលោក ករណីឆ្លងសរុបមេរោគ មុយ មានតិចជាង ០.៥ ភាគរយនៃករណីឆ្លងកូវីដ-១៩សរុប ខណៈនៅកូឡំប៊ី វត្តមានមេរោគប្រភេទ មុយ នេះអាចមានសមត្ថភាពចម្លងខ្ពស់ដល់ទៅ ៤០ ភាគរយ។
ទោះបីករណីឆ្លងថ្មីនៃមេរោគនេះ នៅមិនទាន់រីករាលដាលច្រើននៅលើពិភពលោកក្ដី តែ WHO បានសម្តែងការព្រួយបារម្ភអំពីរីរុសបំប្លែងខ្លួនថ្មីនេះជាខ្លាំង ដោយហេតុថា វីរុសបំប្លែងខ្លួនថ្មី ជាវីរុសដែលបានបំប្លែងចេញពីវីរុសដើម ហើយវីរុសបំប្លែងខ្លួនក៏អាចបន្តបំប្លែងទៅជាវីរុសបំប្លែងខ្លួនផ្សេងទៀតដែរ ហើយថែមទាំងមានកម្រិតគ្រោះថ្នាក់ ឆ្លងខ្លាំង និងសម្លាប់មនុស្សលឿនជាងវីរុសដើមទៅទៀត៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
