ជាមួយគ្នានេះធនាគារជាតិគ្រោងនឹងដាក់ចេញលក្ខខណ្ឌជាក់លាក់ក្នុងការផ្តល់កម្ចីដល់គ្រឹះស្ថានហិរញ្ញវត្ថុនានា ដើម្បីកាត់បន្ថយការប្រែប្រួលអាកាសនៅកម្ពុជាផងដែរ។
ក្នុងបទសម្ភាសជាមួយអ្នកសារព័ត៌មាន ក្រោយពិធីបិទវគ្គបណ្តុះបណ្តាលស្តីពី «ការគ្រប់គ្រងហានីភ័យបរិស្ថាន សង្គម និងអភិបាលកិច្ច»កាលពីថ្ងៃទី១៤ ខែកក្កដា លោកជំទាវ ជា សិរី ឧបការីទេសាភិបាល និងជាអគ្គនាយកបច្ចេកទេសនៃធនាគារជាតិនៃកម្ពុជាបានបង្ហើបពីគម្រោងនៃការដាក់ចេញយន្តការក្នុងការផ្តល់កម្ចីដើម្បីបរិស្ថាន។ ក្នុងនោះ ធនាគារជាតិនៃកម្ពុជាគ្រោងដាក់ចេញលក្ខខណ្ឌជាក់លាក់ក្នុងការផ្តល់កម្ចីដល់គ្រឹះស្ថានធនាគារនិងមីក្រូហិរញ្ញវត្ថុ ដើម្បីចូលរួមកាត់បន្ថយការប្រែប្រួលអាកាសធាតុ។ បើតាមការគូសបញ្ជាក់របស់លោកជំទាវ ជា សិរី លក្ខខណ្ឌដែលធនាគារជាតិគ្រោងដាក់ចេញនោះនឹងកំណត់ពីប្រភេទអតិថិជន និងវិស័យនានា ដែលគ្រឹះស្ថានហិរញ្ញវត្ថុគួរផ្តល់កម្ចី ឬមិនគួរផ្តល់។
អត្ថបទគួរអាន
មន្ត្រីជាន់ខ្ពស់ធនាគារជាតិនៃកម្ពុជារូបនេះបានគូសបញ្ជាក់បន្ថែមថា បច្ចុប្បន្នបញ្ហាការប្រែប្រួលអាកាសធាតុកំពុងក្លាយជាប្រធានបទមួយដ៏ចាប់អារម្មណ៍ ហើយពិភពលោកក៏ពុងយកចិត្តទុកដាក់លើបញ្ហានេះដែរ ព្រោះការប្រែប្រួលអាកាសធាតុវាអាចមានឥទ្ធិពលមិនល្អដល់ជីវភាពរបស់ប្រជាពលរដ្ឋ សង្គម និងសេដ្ឋកិច្ច។ ជាមួយគ្នានេះលោកជំទាវ ជា សិរី ជំរុញឲ្យគ្រឹះស្ថានធនាគារ និងមីក្រូហិរញ្ញវត្ថុបង្កើនការយកចិត្តទុកដាក់លើបញ្ហានេះ តាមរយៈការកាត់បន្ថយការផ្តល់កម្ចី ដល់វិស័យណា ដែលបង្កឲ្យកើតមានបញ្ហាការប្រែប្រួលអាកាសធាតុ។
គួរបញ្ជាក់ថា កាលពីថ្ងៃទី១៤ កក្កដា ឆ្នាំ២០២២ ធនាគារជាតិនៃកម្ពុជា និងរដ្ឋាភិបាលអង់គ្លេសបានសហការគ្នារៀបចំវគ្គបណ្តុះបណ្តាលស្តីពី«ការគ្រប់គ្រងហានីភ័យបរិស្ថាន សង្គម និងអភិបាលកិច្ចដែលមានសិក្ខាកាមជាមន្ត្រីមកពីធនាគារ និងហិរញ្ញវត្ថុចូលរួម។ គោលបំណងនៃការបើកវគ្គបណ្តុះបណ្តាលនេះ គឺដើម្បីកសាងសមត្ថភាពមន្ត្រីហិរញ្ញវត្ថុឲ្យយល់ដឹងពីហានិភ័យនៃការប្រែប្រួលអាកាសធាតុ ពីរបៀបទប់ស្កាត់និងការដោះស្រាយបញ្ហា។ ការរៀបចំនេះ ក៏ដើម្បីដាស់ស្មារតីឲ្យគ្រឹះស្ថានធនាគារ និងមីក្រូហិរញ្ញវត្ថុបង្កើនការយកចិត្តទុកដាក់លើបញ្ហានេះផងដែរ៕
