ប្រទេសរុស្ស៊ីកាលពីដើមខែសីហា បានបង្កើតអង្គភាពក្នុងស្រុកថ្មីមួយ ដើម្បីដំណើរការគម្រោងទាញយកប្រេង និង ឧស្ម័ន Sakhalin-2 ដែលមានទីតាំងនៅលើកោះ Sakhalin ដែលស្ថិតនៅឆ្នេរសមុទ្រប៉ាស៊ីហ្វិកក្នុងប្រទេសរុស្ស៊ី។ សេចក្តីជូនដំណឹងពីវិមានក្រឹមឡាំងបានរក្សាតម្លៃ និងបរិមាណនៃការចែកចាយដដែល ដូចនៅក្នុងកិច្ចព្រមព្រៀងរបស់អតិថិជនជាមួយប្រតិបត្តិករមុននៃគម្រោង Sakhalin Energy Investmentដែរ។
តាមរយៈសេចក្តីជួនដំណឹងបានគូសបញ្ជាក់ថា គម្រោង Sakhalin-2 ដែលមានចំណែកផ្គត់ផ្គង់ប្រហែល ១០% នៃការនាំចូលឧស្ម័នសរុបរបស់ប្រទេសជប៉ុននឹងបន្តរក្សារការផ្គត់ផ្គង់។
គួររំលឹកថា ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃទី៣០ ខែមិថុនា បានបញ្ជាឱ្យផ្ទេរប្រតិបត្តិការ គម្រោងប្រេង និងឧស្ម័ន Sakhalin-2 ទៅឱ្យក្រុមហ៊ុនរដ្ឋរុស្ស៊ី ខណៈក្រុមហ៊ុនថ្មីនឹងកាន់កាប់ទ្រព្យសម្បត្តិ សិទ្ធិគ្រប់គ្រង និងកម្លាំងការងារទាំងអស់ ដោយគ្មានសំណងសម្រាប់ម្ចាស់ភាគហ៊ុនផ្សេងនោះទេ។ យ៉ាងណាមិញ ម្ចាស់ភាគហ៊ុននៃគម្រោង Sakhalin-2 ដែលរួមមាន ក្រុមហ៊ុនជប៉ុន Mitsui និង Mitsubishi Corp ត្រូវតែសម្រេចចិត្តឱ្យបានឆាប់រហ័សថា តើត្រូវដាក់ពាក្យសុំភាគហ៊ុននៅក្នុងអង្គភាពថ្មីនេះ ឬយ៉ាងណា។
អត្ថបទគួរអាន
ប៉ុន្ដែបើតាម ការអះអាងរបស់រដ្ឋមន្ត្រីក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុននាពេលកន្លងទៅ បានឲ្យដឹងថា ប្រទេសជប៉ុនបានបង្ហាញពីចេតនារបស់ខ្លួនក្នុងការរក្សាភាពជាម្ចាស់នៅក្នុងគម្រោងទាយយកប្រេង និង ឧស្ម័នថ្មីនេះ ហើយក្រុមហ៊ុនជប៉ុននឹងធ្វើឱ្យប្រាកដថា នឹងបន្តរក្សាចំណែកនៅក្នុងគម្រោងទាញយកប្រេង និង ឧស្ម័ន នៅរុស្ស៊ី ខណៈគម្រោង Sakhalin-2 មានចំណែកផលិតឧស្ម័នធម្មជាតិរ៉ាវ ១០ លានតោនក្នុងមួយឆ្នាំ ដែលក្នុងនោះជប៉ុននាំចូល ៦ លានតោន។
ក្រុមហ៊ុនជប៉ុន ដែលមានចំណែកភាគហ៊ុននៅក្នុងគម្រោង Sakhalin-2 រួមមានក្រុមហ៊ុន Mitsui & Co ដែលមានចំណែកភាគហ៊ុន ១២,៥% និង ក្រុមហ៊ុន Mitsubishi Corp មានភាគហ៊ុន ១០%៕
