ថ្លែងនៅក្នុងឱកាសចុះត្រួតពិនិត្យ ការសាងសង់អាកាសយានដ្ឋានអន្តរជាតិសៀមរាបអង្គរថ្មី ក្រុមហ៊ុន Angkor International Airport Investment (Cambodia) Co.,Ltd បានរាយការណ៍ទៅកាន់ឯកឧត្តម ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិលថា ជារួមគម្រោងសាងសង់អាកាសយានដ្ឋានអន្តរជាតិនេះ សម្រេចបានការសាងសង់ ៣៥%ហើយ ដោយការសាងសង់បានចាប់ផ្ដើមតាំងពីថ្ងៃទី ១៥ខែ មីនា ឆ្នាំ២០២០មកម្ល៉េះ ដោយរយៈពេលសាងសង់ គឺ ៣៦ខែ ពោលគឺតាមផែនការនឹងបញ្ចប់នៅខែមីនាឆ្នាំ២០២៣ខាងមុខនេះ។
អត្ថបទទាក់ទង!
បើតាមការអះអាងរបស់ ឯកឧត្តម ម៉ៅ ហាវណ្ណាល់ ក្រុមហ៊ុនសាងសង់ព្រលានយន្ដហោះសៀមរាបថ្មីនេះ នៅតែបន្ដការសាងសង់តាមផែនការ ដែលបានគ្រោងទុក បើទោះបីជាមួយរយៈកន្លងមកនេះ មានបញ្ហាកូវីដ-១៩ តាមមករំខានយ៉ាងណាក្ដី។
ឯកឧត្ដម បានគូសបញ្ជាក់ទៀតថា អាកាសយានដ្ឋានអន្តរជាតិថ្មីនៅក្នុងខេត្តសៀមរាបអង្គរនេះ នឹងចូលរួមចំណែកក្នុងការទាក់ទាញភ្ញៀវទេសចរមកកាន់ខេត្តសៀមរាបកាន់តែច្រើន សំដៅជំរុញកំណើនសេដ្ឋកិច្ចជាតិ ការបង្កើតការងារ និងប្រាក់ចំណូល ជូនប្រជាពលរដ្ឋ និងរួមចំណែកការអភិវឌ្ឍសង្គមប្រកបដោយចីរភាព។
សូមបញ្ជាក់ថា គម្រោងអាកាសយានដ្ឋានអន្តរជាតិសៀមរាបថ្មីនេះ ត្រូវបានដឹងថា គ្រោងចំណាយថវិកាសាងសង់ប្រមាណ ៨៨០ លានដុល្លារអាមេរិក គ្របដណ្ដប់លើផ្ទៃដីប្រមាណ ៧០០ ហិកតា និងមានទីតាំងស្ថិតនៅចម្ងាយ៥១ គីឡូម៉ែត្រពីទីប្រជុំជនក្នុងខេត្តសៀមរាប និងប្រមាណ ៤០គីឡូម៉ែត្រពីរមណីយដ្ឋានអង្គរ។
ក្រៅតែពីអាកាសយានដ្ឋានថ្មី ខេត្តសៀមរាបនេះ កម្ពុជាក៏កំពុងសាងសង់អាកាសយានដ្ឋានភ្នំពេញថ្មីមួយបន្ថែមទៀតផងដែរ ដែលមានតម្លៃដល់ទៅ ១.៥០០ លានដុល្លារអាមេរិក មានទីតាំងស្ថិតនៅខេត្តកណ្ដាល និងខេត្តតាកែវ គ្របដណ្ដប់លើផ្ទៃដីប្រមាណ ២.៦០០ ហិកតា។ គម្រោងនេះ ត្រូវបានដឹងថា នឹងបញ្ចប់ការសាងសង់ដំណាក់កាលទី១ នៅក្នុងឆ្នាំ២០២៣៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
