មន្ត្រីនៃក្រសួងសាធារណៈការ និងដឹកជញ្ជូន លោក សុវណ្ណារ៉ា បានប្រាប់សារព័ត៌មានខេមបូណូមីសតាមតេឡេក្រាមថា ចំពោះការផ្សព្វផ្សាយរបស់សារព័ត៌មានមួយចំនួន ដែលថា នឹងបិទដំណើរការខ្សែរថភ្លើងចេញចូលព្រលានយន្តហោះនាពេលឆាប់ៗនេះ គឺមិនមែនជាការពិតនោះទេ។
លោក សុវណ្ណារ៉ា បញ្ជាក់ថា « នៅក្នុងដំណាក់កាលនេះ គឺដំណាក់កាលកូវីដ ហើយកន្លងមករទេះភ្លើង(រថភ្លើង) យើងក៏មានចរាចរណ៍មួយៗដែរ មួយវិញទៀត យើងមិនសូវមានទេសចរណ៍ ព្រោះតែអាកាសចរណ៍យើងបិទដំណើរការជើងហោះហើរខ្លះហ្នឹង អញ្ចឹងកាលៈទេសៈ ដែលមិនមានអ្នកដំណើរហ្នឹង គឺវាសមស្របនឹងទេសចរណ៍ ក៏ដូចជាព្រលានយន្តហោះអត់មានភ្ញៀវដែរ ចឹងលោក(ឯកឧត្តម ស៊ុន ចាន់ថុល) កំពុងធ្វើការពិភាក្សាជាមួយរ៉ូយ៉ាល់រ រ៉េលវេ ថាតើគួរមាននីតិវិធីយ៉ាងណាបន្ត»។
មន្ត្រីនៃក្រសួងសាធារណការរូបនេះ បានបន្ថែមថា « នៅក្នុងករណីហ្នឹងដែរ ប្រសិនបើមានភ្ញៀវនៅតែបន្តមានធ្វើដំណើរតាមរថភ្លើងពីស្ថានីយរាជាយស្ម័យានពីភ្នំពេញមកព្រលាន ហ្នឹងជាលទ្ធផលមួយផ្សេង តែបើសិនជាអត់មាន ហ្នឹងជាលទ្ធផលមួយផ្សេងទៀត ចឹងយោងតាមការបកស្រាយរបស់ឯកឧត្តមទេសរដ្ឋមន្រ្តី លោកមិនទាន់ថា ត្រូវបិទក្នុងពេលឆាប់ៗនេះទេ»។
អត្ថបទទាក់ទង!
ហេតុដូចនេះ ខ្សែរថភ្លើងចេញចូលព្រលានយន្តហោះ មិនទាន់ប្រាកដថាបិទ ឬមិនបិទនោះទេ ដោយសារពេលក្រុមការងាររបស់ក្រសួង និងក្រុមហ៊ុនរ៉ូយ៉ាល់រ៉េលវេ កំពុងតែសិក្សានៅឡើយ ហើយបើសិនជាខ្សែរថភ្លើងនេះ នៅតែបន្តគ្រោះថ្នាក់ដល់ពលរដ្ឋ ក៏ដូចជាគ្មានអ្នកធ្វើដំណើរទៀត ពិតណាស់ ប្រហែលជានឹងត្រូវបិទមិនខាន។
យ៉ាងណាមិញ បើសិនជាខ្សែរថភ្លើងចេញចូលព្រលានយន្តហោះត្រូវបិទមែននោះ ប្រហែលជាមានអ្នកសាទរច្រើនជាងអ្នកសោកស្តាយ ព្រោះថា តាមរយៈការសាកសួររបស់ក្រុមការងារខេមបូណូមីស ទៅកាន់ប្រជាពលរដ្ឋជាច្រើនលើកច្រើនសារកន្លងមក ជាពិសេសអ្នករស់នៅតំបន់ជុំវិញផ្លូវរថភ្លើងនោះ មិនចង់ឲ្យខ្សែរថភ្លើងមួយនេះដំណើរការនោះទេ ដោយពួកគាត់លើកឡើងថា រថភ្លើងនេះតែងតែបង្កគ្រោះថ្នាក់ និងសំលេងរំខានជាដើមដល់ពលរដ្ឋដែលឆ្លងកាត់ និងរស់នៅក្បែរតំបន់នោះ។
សូមជម្រាបថា ខ្សែរថភ្លើងដឹកអ្នកដំណើរចេញចូលព្រលានយន្តហោះ បានបើកដំណើរការ កាលពីថ្ងៃទី១០ ខែមេសា ឆ្នាំ២០១៨ គិតមកទល់ពេលនេះ មានរយៈពេលជាង២ឆ្នាំមកហើយ។ ចាប់តាំងពីបើកដំណើរការរហូតមកដល់ពេលនេះ ខ្សែរថភ្លើងដឹកនាំអ្នកដំណើរមួយខ្សែនេះ ហាក់បង្ហាញពីសញ្ញាវិជ្ជមានតែដំបូងប៉ុណ្ណោះ ក្រោយមកកាន់តែខ្សត់អ្នកដំណើរពីមួយថ្ងៃទៅមួយថ្ងៃ រហូតដល់មានការផ្លាស់ប្តូរក្បាលរថភ្លើងថ្មីហើយក៏តែមានអ្នកជិះតិចតួចដដែល៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
