តាមរយៈវីដេអូខ្លីមួយនៅលើហ្វេសប៊ុក លោក Patrick Murphy បាននិយាយដូច្នេះថា “ឥឡូវនេះ យើងឃើញមានសញ្ញាខ្លះគួរជាទីលើកទឹកចិត្តនៅកម្ពុជា។ ក្នុងពេលថ្មីៗនេះ ក្រសួងរ៉ែនិងថាមពល បានប្រកាសពីការពន្យារពេល១០ឆ្នាំ លើការកសាងទំនប់វារីអគ្គិសនីដែលជាការផ្តល់ឱ្យកម្ពុជានូវឱកាសស្វែងរកជម្រើសផ្សេងសម្រាប់ថាមពលដើម្បីជៀសវាងផលប៉ះពាល់ធ្ងន់ធ្ងរលើបរិស្ថាននិងមនុស្ស។”
ក្រសួងរ៉ែនិងថាមពលបានប្រកាសកាលពីខែមីនា ឆ្នាំ២០២០នេះ ថា ប្រទេសកម្ពុជានឹងមិនអភិវឌ្ឍទំនប់វារីអគ្គិសនីថ្មីនៅលើដងទន្លេមេគង្គទេ ក្នុងរយៈពេល១០ឆ្នាំខាងមុខ ហើយថា នឹងពិនិត្យឡើងវិញនូវគោលនយោបាយជាតិរបស់ខ្លួនក្នុងការស្វែងរកថាមពលពីធ្យូងថ្ម ឧស្ម័នធម្មជាតិ និងព្រះអាទិត្យវិញ។
អត្ថបទទាក់ទង
ក្រសួងបានអះអាងថា រដ្ឋាភិបាលបានធ្វើតាមការសិក្សាដែលធ្វើឡើងដោយទីប្រឹក្សាជប៉ុនដែលបានផ្តល់អនុសាសន៍ថា កម្ពុជាគួរស្វែងរកថាមពលពីប្រភពផ្សេងៗទៀត។
ការលើកឡើងរបស់ឯកអគ្គរដ្ឋទូតអាមេរិកបានធ្វើឡើងបន្ទាប់ពីមានរបាយការណ៍មួយកាលពីសប្តាហ៍មុន ថា ទំនប់ចិនបានទប់ទឹកទុក ខណៈដែលមានគ្រោះរាំងស្ងួតដ៏អាក្រក់បំផុតនៅបណ្តាប្រទេសខាងក្រោមទន្លេមេគង្គនាឆ្នាំ២០១៩។
ក្រុមហ៊ុនឈ្មោះ Eyes on Earth ដែលជាអ្នកធ្វើរបាយការណ៍នេះដោយប្រើទិន្នន័យផ្កាយរណប គឺបានទទួលថវិកាឧបត្ថម្ភពីសហរដ្ឋអាមេរិក។
នៅក្នុងវីដេអូខ្លីនោះដែរ លោក Patrick Murphy ក៏បាននិយាយថា របាយការណ៍នេះគួរឱ្យទុកចិត្តបាន ហើយបានអំពាវនាវឱ្យដោះស្រាយបញ្ហានេះ តាមរយៈកិច្ចសហប្រតិបត្តិការថ្នាក់តំបន់ប្រកបដោយតម្លាភាព ដោយគិតពីប្រយោជន៍នៃប្រទេសទាំងអស់។
គណៈកម្មការទន្លេមេគង្គ បានអះអាងនៅក្នុងសេចក្តីថ្លែងការណ៍ឆ្លើយតបទៅនឹងរបាយការណ៍នោះថា គ្រោះរាំងស្ងួតឆ្នាំ២០១៩ ភាគច្រើនគឺបណ្តាលមកពីទឹកភ្លៀងទាបបំផុត ក្នុងរដូវវស្សា ជាមួយនឹងការពន្យារពេលមកដល់និងការចាកចេញនៃភ្លៀងមូសុង នៅមុនព្រឹត្តិការណ៍អេលនីណូ ដែលបានបង្កើតសីតុណ្ហភាពមិនធម្មតានិងការរំហួតខ្ពស់៕
