ការបាញ់សាកល្បងលើកនេះ ត្រូវបានគេជឿថាជាប្រភេទមីស៊ីលប៉ាលីស្ទិក ឬស្គាល់បានថាជាមីស៊ីលអន្តរទ្វីប។ ការសាកល្បងជាបន្តបន្ទាប់របស់របបក្រុងព្យុងយ៉ាង ធ្វើឡើងក្រោយពេលដែលប្រមុខដឹកនាំវ័យក្មេង លោក គីម ចុងអ៊ុន បានសច្ចានៅដើមឆ្នាំ២០២២នេះថា កូរ៉េខាងជើងនឹងបន្តធ្វើទំនើបកម្មយោធារបស់ខ្លួនបន្ថែមទៀត។ នេះបើតាមការចុះផ្សាយដោយទីភ្នាក់ងារសារព័ត៌មានរ៉យទ័រ។
មីស៊ីលដែលបានបាញ់សាកល្បងត្រូវគេកំណត់បាននៅម៉ោង ៧និង២៧នាទីព្រឹកថ្ងៃអង្គារ ចេញពីតំបន់ដែនកោះរបស់កូរ៉េខាងជើង សំដៅទៅឆ្នេរសមុទ្រភាគខាងកើត។ នេះបើយោងតាមសេចក្តីប្រកាសព័ត៌មានរបស់យោធាកូរ៉េខាងត្បូង។
បន្ថែមពីលើនេះ សារព័ត៌មានក្យូដូរបស់ជប៉ុនឯណោះវិញ ក៏បានរាយការណ៍ដែរថា មីស៊ីលដែលបានបាញ់សាកល្បងខាងលើដដែលនេះ បានធ្លាក់នៅក្រៅតំបន់សេដ្ឋកិច្ចពិសេសផ្តាច់មុខ នៃដែនទឹករបស់ជប៉ុន។អត្ថបទគួរអាន
គួរជម្រាបថា ការបាញ់សាកល្បងមីស៊ីលកាលពីលើកទីមួយនៅដើមឆ្នាំ២០២២ ត្រូវបាននាយករដ្ឋមន្ត្រីជប៉ុន លោកគីហ្សីដា ប្រាប់អ្នកសារព័ត៌មានថា អង្គការសហប្រជាជាតិកំពុងបញ្ចប់ការពិភាក្សាគ្នា ក្នុងការស្វែងរកការឆ្លើយតបទៅអ្វីដែលរបបក្រុងព្យុងយ៉ាងអះអាងថា ជាការបាញ់សាកល្បងមីស៊ីលល្បឿនលឿនជាងសម្លេង។
យ៉ាងណាមិញ មិនទាន់មានវិធានការណាមួយបានធ្លាក់មកពីអង្គការសហប្រជាជាតិនៅឡើយទេ លើកលែងតែនៅថ្ងៃច័ន្ទទី១០មករា ម្សិលមិញ ដែលមានប្រទេសចំនួន៦ រួមមានសហរដ្ឋអាមេរិក បារាំង ជប៉ុន អៀកឡង់ អង់គ្លេស និងអាល់បានី បានចេញលិខិតថ្កោលទោសការបាញ់សាកល្បងមីស៊ីលលើកទី១របស់ក្រុងព្យុងយ៉ាង កាលពីថ្ងៃពុធទី០៥មករា។
សូមបញ្ជាក់ថា ការធ្វើតេស្តគ្រាប់មីស៊ីលជាបន្តបន្ទាប់របស់របបក្រុងព្យុងយ៉ាង ធ្វើឡើងស្របទៅនឹងអ្វីដែលប្រមុខដឹកនាំ លោកគីម ជុងអ៊ុន ធ្លាប់បានសច្ចាកាលពីដំណាច់ឆ្នាំ២០២១ថា នឹងនៅតែបន្តជំរុញការធ្វើទំនើបកម្មយោធា ដើម្បីប្រឆាំងសម្ពាធអន្តរជាតិ។ យ៉ាងណាមិញ ព្យុងយ៉ាងក៏ធ្លាប់បានអះអាងដែរថា ខ្លួននឹងវិលរកតុចរចារឡើងវិញប្រសិនបើសហរដ្ឋអាមេរិក និងសម្ព័ន្ធមិត្តព្រម ទម្លាក់ចោលទណ្ឌកម្មទាំងឡាយ និងព្រមបញ្ឈប់រាល់ការធ្វើសមយុទ្ធយោធានានា៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
