ក្រោយពីកូរ៉េខាងជើង ថ្មីៗនេះ បានប្រកាសគាំទ្ររុស្ស៊ី និងទទួលស្គាល់តំបន់ដុនបាសភាគខាងកើតជារដ្ឋឯករាជ្យនោះ អ៊ុយក្រែនក៏បានកាត់ផ្ដាច់ទំនាក់ទំនងការទូតជាមួយកូរ៉េខាងជើង ហើយបានហៅទង្វើរបស់ទីក្រុងព្យុងយ៉ាងថា ជាការប៉ុនប៉ងបំផ្លាញអធិបតេយ្យភាព និងបូរណភាពទឹកដីរបស់អ៊ុយក្រែន។
ការលើកឡើងរបស់ទីក្រុងកៀវយ៉ាងដូច្នេះ ក៏បានធ្វើឲ្យទីក្រុងព្យុងយ៉ាងក្ដៅស្លឹកត្រចៀកមិនតិចនោះដែរ ដោយក្រសួងការបរទេសកូរ៉េខាងជើងបាននិយាយនៅថ្ងៃសុក្រ ទី ១៥ ខែកក្កដានេះថា អ៊ុយក្រែនគ្មានសិទ្ធិលើកយកបញ្ហាអធិបតេយ្យភាពមកមកនិយាយជាមួយខ្លួនបាននោះឡើយ ព្រោះថាប្រទេសអ៊ុយក្រែននេះ ក៏បានចូលរួមសកម្មភាពគាំទ្រសហរដ្ឋអាមេរិកក្នុងការរំលោភបំពាន់លើអធិបតេយ្យភាពរបស់ទីក្រុងព្យុងយ៉ាងដូចតែគ្នាដែរ។ នេះបើតាមការចុះផ្សាយសារព័ត៌មានអន្តរជាតិធំៗជាច្រើន។
មែនទែនទៅ អ៊ុយក្រែនបានផ្តាច់ទំនាក់ទំនងជាមួយកូរ៉េខាងជើង បន្ទាប់ពីប្រព័ន្ធផ្សព្វផ្សាយរដ្ឋរបស់កូរ៉េខាងជើងបានចេញផ្សាយសេចក្តីថ្លែងការណ៍មួយចេញរបស់ក្រសួងការបរទេសកូរ៉េខាងជើង ដោយបានលើកឡើងថា ទីក្រុងព្យុងយ៉ាង បានទទួលស្គាល់និងគាំទ្ររុស្ស៊ីជាផ្លូវការថា តំបន់ដុនបាសនៅភាគខាងកើតអ៊ុយក្រែនជារដ្ឋឯករាជ្យ ដោយអ៊ុយក្រែនបានចាត់ទុកការលើកឡើងរបស់ទីក្រុងព្យុងយ៉ាងនេះ ថា ជាការប៉ុនប៉ងបំផ្លាញអធិបតេយ្យភាព និង បូរណភាពទឹកដីរបស់ខ្លួន។
អត្ថបទគួរអាន
ប៉ុន្តែក្រសួងការបរទេសរបស់ប្រទេសឯកោកូរ៉េខាងជើង បានចេញមុខមកឆ្លើយតបការពារសេចក្តីប្រកាសរបស់ខ្លួនដោយនិយាយថា អ៊ុយក្រែនបានជួយដល់សកម្មភាពដែលដឹកនាំដោយសហរដ្ឋអាមេរិកក្នុងការការដាក់ទណ្ឌកម្មលើកម្មវិធីអាវុធរបស់កូរ៉េខាងជើង។
ទីក្រុងព្យុងយ៉ាងបានអះអាងថា អ៊ុយក្រែនគ្មានសិទ្ធិលើកយកបញ្ហាការអនុវត្តអធិបតេយ្យភាពមកនិយាយនោះជាមួយកូរ៉េខាងជើងនោះ ព្រោះអ៊ុយក្រែនក៏បានចូលរួមយ៉ាងសកម្មនូវគោលនយោបាយមិនស្មើរភាព និង អយុត្តិធម៌របស់សហរដ្ឋអាមេរិកនាពេលកន្លងមក ដែលវាជារឿងអយុត្តិធម៌យ៉ាងធ្ងន់ធ្ងរសម្រាប់ប្រជាជាតិកូរ៉េខាងជើង។
ប្រទេសកូរ៉េខាងជើងបាននិយាយថាកម្មវិធីនុយក្លេអ៊ែរ និង មីស៊ីលរបស់ខ្លួន គឺជាខែលការពារសន្តិសុខជាតិរបស់ខ្លួន ហើយបានចោទប្រកាន់សហរដ្ឋអាមេរិកថាបានបង្កើតគោលនយោបាយមិនស្មើរភាព ដោយការដាក់ទណ្ឌកម្មជាអន្តរជាតិលើទីក្រុងព្យុងយ៉ាង និង ធ្វើសមយុទ្ធយោធាជាមួយកូរ៉េខាងត្បូង។
គួរជម្រាបថាកូរ៉េខាងជើង បានបញ្ជាក់ដែរថា ខ្លួននឹងបន្តពង្រឹង និង អភិវឌ្ឍមិត្តភាព និងកិច្ចសហប្រតិបត្តិការជាមួយប្រទេសទាំងអស់ដែលគោរពអធិបតេយ្យភាពរបស់ខ្លួន និង អនុគ្រោះចំពោះគោលការណ៍សមភាពអធិបតេយ្យភាព ការមិនជ្រៀតជ្រែកក្នុងកិច្ចការផ្ទៃក្នុង និងការគោរពគ្នាទៅវិញទៅមកតែប៉ុណ្ណោះ៕
