យ៉ាងណាមិញ ការធ្លាក់ចុះស្ដុកប្រេងរបស់អាមេរិកនេះ គឺជាកម្រិតធ្លាក់ចុះខ្លាំងបំផុតមិនធ្លាប់មាននោះទេ ចាប់តាំងពីឆ្នាំ ១៩៨៧។ ទន្ទឹមនឹងការធ្លាក់ចុះស្ដុកប្រេងរបស់អាមេរិកនេះដែរ ក៏កំពុងកើតមានឡើង នៅគ្រាដែលសហភាពអឺរ៉ុបកំពុងត្រៀមដាក់ទណ្ឌកម្មបន្ថែមលើរុស្ស៊ី ដោយក្នុងនោះក៏មានការកាត់ផ្ដាច់ប្រេងនាំចូលពីរុស្ស៊ី។ ទោះយ៉ាងណា កញ្ចប់ ទណ្ឌកម្មទី៦ របស់សហភាពអឺរ៉ុបនេះ កំពុងនៅជាប់គាំងនៅឡើយ មិនទាន់មានការអនុម័តពីរដ្ឋជាសមាជិកទាំងអស់នៅឡើយទេ។ នេះបើតាមការចុះផ្សាយដោយសារព័ត៌មានអន្តរជាតិធំៗជាច្រើន។
Story: ប្រធានាធិបតី Joe Biden កាលពីខែមីនាបានប្រកាសពីការដកយកស្ដុកប្រេងបម្រុង ដើម្បីចែកចាយ ក្នុងចំនួនច្រើនបំផុតមិនធ្លាប់មាន ពោលគឺមានការចែកចាយប្រេងប្រហែល ១ លានបារ៉ែលក្នុងមួយថ្ងៃ ដើម្បីផ្គត់ផ្គង់សម្រាប់រយៈពេល ៦ខែ ហើយវាគឺជាផ្នែកមួយក្នុងការកាត់បន្ថយតម្លៃប្រេងឥន្ធនៈដែលកំពុងឡើងថ្លៃក្នុងអំឡុងពេលសហរដ្ឋអាមេរិក និង ប្រទេសសម្ព័នមិត្តរបស់ខ្លួនផ្សេងទៀតបានកាត់ផ្តាច់ប្រេងពីរុស្ស៊ី ដើម្បីប្រឆាំងនឹងការឈ្លានពានរបស់ទីក្រុងម៉ូស្គូទៅលើទីក្រុងកៀវ។
យោងតាមទិន្នន័យគយអាមេរិក បានឱ្យដឹងថា យ៉ាងហោចណាស់មាននាវាចំនួន ៣ គ្រឿងដែលដឹកប្រេងឆៅពីឃ្លាំងស្តុកទុកគ្រាអាសន្នរបស់សហរដ្ឋអាមេរិក ដើម្បីផ្គត់ផ្គង់ទៅឲ្យប្រទេសនៅអឺរ៉ុបក្នុងខែមេសា ខណៈដែលក្រុមហ៊ុនចម្រាញ់ប្រេងនៅទីនោះបានព្យាយាមជំនួសការផ្គត់ផ្គង់ប្រេងឆៅរបស់រុស្ស៊ី។
អត្ថបទគួរអាន
យ៉ាងណាមិញ តម្លៃប្រេងរបស់សហរដ្ឋអាមេរិកបានកើនឡើងជិត ២៥% ដល់ទៅដល់តម្លៃ ១១៤ ដុល្លារ ក្នុងមួយបារ៉ែល ខណៈដែលទីផ្សារព្រួយបារម្ភអំពីបញ្ហាផ្គត់ផ្គង់។ តម្លៃលក់រាយប្រេងសាំង និងម៉ាស៊ូតបានឡើងដល់កម្រិតខ្ពស់បំផុតក្នុងសប្តាហ៍នេះ ដោយសារតម្រូវការប្រេងឥន្ធនៈកើនឡើងដល់កម្រិតខ្ពស់ ខណៈសមត្ថភាពចម្រាញ់បានធ្លាក់ចុះ។
ដោយឡែក តម្លៃប្រេងឆៅនៅក្នុងទីផ្សាជួញដូរនៅអាស៊ី នៅថ្ងៃទី ១៧ឧសភា បានធ្លាក់ចុះតិចតូច បន្ទាប់ពីកិច្ចខិតខំប្រឹងប្រែងរបស់សហភាពអឺរ៉ុបក្នុងការអនុម័តទណ្ឌកម្មទី ៦ ដើម្បីហាមឃាត់លើការនាំចូលប្រេងពីរុស្ស៊ីត្រូវបានជាប់គាំង។ រដ្ឋមន្ត្រីការបរទេសសហភាពអឺរ៉ុបបានបរាជ័យកាលពីថ្ងៃទី ១៦ឧសភា ក្នុងកិច្ចខិតខំប្រឹងប្រែងរបស់ខ្លួន ដើម្បីដាក់សម្ពាធលើប្រទេសហុងគ្រីឱ្យដកការបោះឆ្នោតវេតូ ឬការបោះឆ្នោតជំទាស់របស់ខ្លួន ចំពោះការដាក់ទណ្ឌកម្ម ហ៊ុមព័ទ្ធប្រេងពីរុស្ស៊ីទាំងស្រុង ដ្បិតថា ការសម្រេចអនុម័តលើទណ្ឌកម្មនេះ វាទាមទារឲ្យមានការយល់ព្រមពីប្រទេសសមាជិកសហភាពអឺរ៉ុបទាំងអស់។
ស្របពេលដែលមានភាពជាប់គាំងនៃការអនុម័តទណ្ឌកម្មថ្មីរបស់សហភាពអឺរ៉ុប តម្លៃប្រេងឆៅនៅអង់គ្លេសបានធ្លាក់ចុះ ១១ សេន មកនៅត្រឹម ១១៤ ដុល្លារ ១៣ សេន ក្នុងមួយបារ៉ែល ហើយតម្លៃប្រេងឆៅរបស់អាមេរិក បានធ្លាក់ចុះ ២២ សេន មកនៅត្រឹម ១១៣ ដុល្លារ ៩៨ សេន ក្នុងមួយបារ៉ែល៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
