តាមការបញ្ជាក់របស់ស្ថានទូតចិនប្រចាំកម្ពុជានៅថ្ងៃទី១ ខែមិថុនា ឆ្នាំ២០២៣នេះ បានឱ្យដឹងថា ថ្មីៗនេះរដ្ឋបាលគយនៃប្រទេសចិនបានធ្វើបច្ចុប្បន្នភាពអំពី «ព័ត៌មានចុះបញ្ជីក្រុមហ៊ុនផលិតអាហារនាំចូលពីបរទេស» ដោយបានបញ្ជាក់ថា ក្រុមហ៊ុននាំចេញផលិតផលជលផលធម្មជាតិដំបូងគេនៅ ប្រទេសកម្ពុជាបានបញ្ចប់ការត្រួតពិនិត្យ និងត្រូវបានអនុញ្ញាតដោយរដ្ឋបាលគយចិនហើយ។ ដោយរហូតមកដល់បច្ចុប្បន្ននេះ ផលិតផលជលផលធម្មជាតិនៅក្នុងប្រទេសកម្ពុជាបានបញ្ចប់នីតិវិធីចុងក្រោយគេបង្អស់ក្នុងការនាំចេញទៅកាន់ប្រទេសចិន និងអាចសម្រេចបាននូវការនាំចេញទៅកាន់ទីផ្សារប្រទេសចិន។ ក្រុមហ៊ុនដែលទទួលបានការអនុញ្ញាតនិងចុះបញ្ជីនាំចេញដំបូងគេនោះគឺ ក្រុមហ៊ុន KIM CHOU Co., Ltd. Import Export and International Transportation ដែលអាចនាំចេញផលិតផលជលផលធម្មជាតិកម្ពុជាសំខាន់ៗចំនួន១២ប្រភេទ ក្នុងនោះមានដូចជា បង្គារ ត្រី អន្ទង់ និងខ្យងជាដើម។
អត្ថបទគួរអាន
ពាក់ព័ន្ធនឹងបញ្ហានេះដែរ ជំទាវ អ៊ឹម រចនា អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ បានឱ្យដឹងថា ការទទួលបានការអនុញ្ញាតពីរដ្ឋបាលគយនៃប្រទេសចិន ដើម្បីឱ្យកម្ពុជាអាចនាំចេញផលិតផលជលផលធម្មជាតិនៅប្រទេសកម្ពុជាទៅកាន់ប្រទេសចិននេះ គឺជាជោគជ័យថ្មីមួយទៀតហើយរបស់ក្រសួងកសិកម្មរុក្ខាប្រមាញ់ និងនេសាទកម្ពុជា។ ហើយរហូតមកទល់ពេលនេះមានតែក្រុមហ៊ុន១ប៉ុណ្ណោះដែលទទួលបានសិទ្ធនាំចេញផលិតផលជលផលធម្មជាតិកម្ពុជាទៅកាន់ប្រទេសចិន។ បើតាមជំនាវ អ៊ឹម រចនា នេះជាការរួមចំណែកមួយក្នុងការជួយជំរុញវិស័យជលផល ក៏ដូចវិស័យកសិកម្មកម្ពុជាឱ្យឈានឆ្ពោះទៅមុខមួយកម្រិតទៀត ដោយបង្កើនគុណភាពនៃការផលិត ដែលត្រូវនឹងស្តង់ដារតម្រូវភូតគាមអនាម័យរបស់ប្រទេសចិន។ ជាងនេះទៅទៀត នឹងជួយជំរុញឱ្យទំហំពាណិជ្ជកម្មកម្ពុជាចិន កាន់រីកចម្រើមបន្ថែមទៀតពីមួយឆ្នាំទៅមួយឆ្នាំ។
យ៉ាងណាមិញ ក្រសួងកសិកម្មរុក្ខាប្រមាញ់ និងនេសាទ មិនបានបញ្ជាក់នោះទេថា កម្ពុជាអាចមានលទ្ធភាពក្នុងកម្រិតណានោះទេ ក្នុងការនាំចេញផលិតផលជលផលធម្មជាតិរបស់កម្ពុជាទៅកាន់ទីផ្សារប្រទេសចិននេះ។
សូមបញ្ជាក់ថា ផលិតផលជលផលធម្មជាតិបានក្លាយជាផលិតផលប្រភេទទី២ នៃវិស័យកសិកម្មនៅក្នុងប្រទេសកម្ពុជា ដែលត្រូវបានអនុញ្ញាតឱ្យនាំចេញទៅកាន់ប្រទេសចិនក្នុងឆ្នាំ២០២៣នេះ ខណៈដំណាំម្រេចជាកសិផលដំបូងគេរបស់កម្ពុជាដែលត្រូវបានអនុញ្ញាតឱ្យនាំចេញទៅប្រទេសចិនក្នុងឆ្នាំនេះ៕
