គិតមកទល់ពេលនេះ ក្រុមហ៊ុនអាកាសចរណ៍ដែលបានតភ្ជាប់ជើងហោះហើរទៅមកកម្ពុជា-ចិនមានចំនួន ១៥ក្រុមហ៊ុនហើយ។ ក្នុងនោះ ក្រុមហ៊ុនក្នុងស្រុកមាន ៣ក្រុមហ៊ុន និងចិនមាន ១២ក្រុមហ៊ុន ដែលបានធ្វើប្រតិបត្តិការហោះហើរទៀងទាត់ទៅមកកម្ពុជា-ចិន ខណៈដែលគិតជាចំនួនជើងយន្តហោះវិញ មានរហូតដល់ចំនួន ១៥៥ជើង ក្នុងមួយសប្ដាហ៍ និងជើងហោះហើរពិសេស (Charter Flight) មានប្រមាណ ៥០ជើងទៀត ក្នុងមួយសប្តាហ៍។
ជាមួយគ្នានេះដែរ ថ្មីៗនេះទៀតសោត ក្រុមហ៊ុនអាកាសចរណ៍ចិន ស៊ាមិន ដែលមានមូលដ្ឋាននៅខេត្ត ហ្វូចៀន ភាគខាងកើតប្រទេសចិន បានសម្រេចបើកជើងហោះហើរត្រង់ថ្មីមួយបន្ថែមទៀតមកកាន់កម្ពុជា គឺហោះហើរទៅមកពីទីក្រុងស៊ាមិន-រាជធានីភ្នំពេញ ខណៈដែលក្រុមហ៊ុនបានមានជើងហោះហើរត្រង់ទៅមករបស់ខ្លួនពីទីក្រុងស៊ាមិន មកកាន់ខេត្តសៀមរាប តាំងពីឆ្នាំ២០១៤មកម្ល៉េះ។
ឯកឧត្តម ម៉ៅ ហាវណ្ណាល់ រដ្ឋលេខាធិការនៃរដ្ឋលេខាធិការដ្ឋានអាកាសចរណ៍ស៊ីវិល បានលើកឡើងថា ការពង្រីកជើងហោះហើរបន្ថែមរបស់ក្រុមហ៊ុនអាកាសចរណ៍ ស៊ាមិន ពីទីក្រុង ស៊ាមិន មកកាន់រាជធានីភ្នំពេញនេះ គឺជាការបង្ហាញឲ្យឃើញពីភាពជោគជ័យរបស់ក្រុមហ៊ុនអាកាសចរណ៍ ក៏ដូចជាភាពរីកចម្រើនរបស់វិស័យអាកាសចរណ៍កម្ពុជា ហើយវាក៏ជាការពង្រីកផ្លូវតភ្ជាប់កាន់តែទូលាយសម្រាប់អនុញ្ញាតឲ្យភ្ញៀវទេសចរចិនចូលមកទស្សនាកម្ពុជា កាន់តែច្រើនឡើងផងដែរ ស្របទៅតាមទិសដៅគោលនយោបាយរបស់រាជរដ្ឋាភិបាល ដែលត្រៀមនឹងទទួលភ្ញៀវទេសចរចិនឲ្យបាន២លាននាក់នៅឆ្នាំ២០២០ ខាងមុខ។
តើអ្នកបានអានអត្ថបទនេះ ឬនៅ?
បើតាមឯកឧត្តម ក្រុមហ៊ុននេះនឹងហោះហើរត្រង់ទៅមកទីក្រុងស៊ាមិន-រាជធានីភ្នំពេញ ឲ្យបាន៤ជើងក្នុងមួយសប្ដាហ៍ ជាមួយនឹងយន្ដហោះប្រភេទ Boeing 737-800 ហើយជើងហោះហើរត្រង់ថ្មីនេះ មិនត្រឹមតែសម្រួលដល់វិស័យទេសចរណ៍ប៉ុណ្ណោះទេ ប៉ុន្ដែ វាក៏នឹងជួយសម្រួលដល់ការធ្វើពាណិជ្ជកម្មរវាងប្រទេសទាំងពីរផងដែរ។
សូមជម្រាបដែរថា របាយការណ៍ពីក្រសួងទេសចរណ៍បានបង្ហាញថា នៅឆ្នាំ២០១៧ កម្ពុជាទទួលបានទេសចរបរទេសជាង៥លាន ៦សែននាក់ កើនឡើងជាង ១១% ក្នុងនោះ ភ្ញៀវទេសចរចិននៅតែឈរលំដាប់ទី១ ដែលមានប្រមាណជាង១លាន២សែននាក់។
ក្នុងនោះ ជនជាតិចិនមាន ២០% បានធ្វើដំណើរតាមអាកាសយាដ្ឋានអន្តរជាតិភ្នំពេញ ២៥% ធ្វើដំណើរតាមអាកាសយានដ្ឋានអន្តរជាតិខេត្តសៀមរាប និង ៧៥% បានធ្វើដំណើរតាមអាកាសយានដ្ឋានអន្តរជាតិខេត្តព្រះសីហនុ៕
