ក្រុមហ៊ុនវិនិយោគ OOCTANE របស់លោកឧកញ៉ា សៀ ឫទ្ធី បណ្ដាក់ទុនក្នុងក្រុមហ៊ុនដឹកជញ្ជូនម្ហូប ទើបបង្កើតថ្មី Muuve

នៅប៉ុន្មានឆ្នាំចុងក្រោយនេះ ការបង្កើតអាជីវកម្មថ្មីៗ របស់សហគ្រិនក្នុងស្រុក បានបង្ហាញពីសន្ទុះកើនឡើងគួរឲ្យកត់សម្គាល់។ ក្នុងការចាប់ផ្ដើមអាជីវកម្មដំបូងនេះដែរ ដើមទុនហិរញ្ញវត្ថុ គឺជាកត្តាចាំបាច់មួយ ដើម្បីទ្រទ្រង់ឲ្យអាជីវកម្មអាចដំណើរការ និងមានការលូតលាស់ទៅមុខ។ ជាការចូលរួមបណ្ដុះអាជីវកម្មបង្កើតថ្មីនៅកម្ពុជា ក្រុមហ៊ុនវិនិយោគ OOCTANE របស់លោកឧកញ៉ា សៀ ឫទ្ធី នាពេលថ្មីៗនេះ បានបណ្ដាក់ទុនក្នុងក្រុមហ៊ុនបង្កើតថ្មីៗមួយទៀតក្នុងវិស័យដឹកជញ្ជូន។

Muuve ដែលជាក្រុមហ៊ុនដឹកជញ្ជូនម្ហូបអាហារក្នុងស្រុកនៅប្រទេសកម្ពុជា ទើបតែបានទទួលការបណ្ដាក់ទុនពីក្រុមហ៊ុនវិនិយោគ OOCTANE របស់លោក ឧកញ៉ា សៀ ឫទ្ធី ដែលស្ថិតនៅក្រោមក្រុមហ៊ុន WoldBridge Group ។

Muuve ត្រូវបានបង្កើតឡើងដោយសហគ្រិន ២ រូប គឺលោក ប៉ាញ ផានិត្យ និងលោក ជួន វឌ្ឍនៈ (អ្នកដែលចូលរួមបន្ទាប់) នៅក្នុងឆ្នាំ ២០១៨ ហើយបានទទួលពានរង្វាន់ «ការចាប់ផ្ដើមអាជីវកម្មប្រចាំឆ្នាំ» នៅក្នុងឆ្នាំ ២០១៩ ពីក្រសួងប្រៃសណីយ៍និងទូរគមនាគមន៍ ។

ចក្ខុវិស័យរបស់ Muuve គឺការផ្ដល់សេវាកម្មទៅកាន់អតិថិជន ជាមួយនឹងបច្ចេកវិទ្យាទំនើប និងភាពងាយស្រួលក្នុងការប្រើប្រាស់កម្មវិធី ជាមួយនឹងជម្រើសអាហារជាច្រើនប្រភេទ ដែលមានតាំងពីម្ហូបលោកខាងលិចរហូតដល់អាហារតាមផ្លូវក្នុងស្រុក។

លោក ប៉ាញ ផានិត្យ នាយកប្រតិបត្តិក្រុមហ៊ុន Muuve បានមានប្រសាសន៍ថា «យើងប្រមូលផ្តុំដៃគូដឹកជញ្ជូនអាហាររបស់យើងជាច្រើននាក់ដែលយើងហៅថា Muuvers ។ Muuvers របស់យើង អាចមានការងារធ្វើប្រចាំថ្ងៃធម្មតា ប៉ុន្តែប្រសិនបើពួកគាត់ចង់រកប្រាក់ចំណូលបន្ថែម ពួកគាត់ក៏អាចដឹកជញ្ជូនអាហារសម្រាប់ពួកយើងបាន។ យើងពិតចជាមានមោទនភាពចំពោះខ្លួនយើងក្នុងការផ្តល់ជូន Muuvers របស់យើង ជម្រើសបន្ថែមដែលអាចឲ្យពួកគាត់រកប្រាក់ចំណូលបន្ថែមពីលើប្រាក់ចំណូលប្រចាំថ្ងៃរបស់ពួកគេបាន»។

លោក ឧកញ៉ា សៀ ឫទ្ធី ប្រធានក្រុមហ៊ុន WorldBridge Group បានមានប្រសាសន៍ថា « Muuve បានដោះស្រាយនូវចំណុចខ្វះខាតជាច្រើនដែលមាននៅក្នុងសេវាកម្មដឹកជញ្ជូនម្ហូបអាហារនៅកម្ពុជា ដូចជាការកំណត់ការការកម្មង់ទិញអប្បបរមា និងការដាក់ទីតាំងនិងអាសយដ្ឋានមិនត្រឹមត្រូវ និងតម្លៃមិនគួរទុកចិត្ត។ ក្រុមយុវជនដែលមានថាមពលស្វាហាប់ និងមានទេពកោសល្យនៅ Muuve បានបង្កើតសេវាកម្មមួយ ដែលផ្តល់ភាពទាក់ទាញដល់ប្រជាជនកម្ពុជា ប្រកបដោយបច្ចេកវិទ្យាខ្ពស់។ ក្រុមហ៊ុន Worldbridge Group នឹងនៅទីនេះដើម្បីគាំទ្រ Muuve នៅក្នុងភាពរីកចម្រើនក្នុងអាជីវកម្ម និងពង្រីកខ្លួនរបស់ពួកគេ»។

ហេតុអ្វីអាជីវកម្មបង្កើតថ្មីៗ ត្រូវចាប់យកឱកាសរីកចម្រើនជាមួយក្រុមហ៊ុន OOCTANE?

ក្រុមហ៊ុនវិនិយោគ OOCTANE ត្រូវបានបង្កើតឡើង ជាមួយមូលនិធិ ៥លានដុល្លារ ក្នុងការជួយដល់ អាជីវកម្មបង្កើតថ្មី ក៏ដូចជា សហគ្រាសខ្នាតតូច និងមធ្យមនៅកម្ពុជា តាមរយៈការបណ្ដាក់ទុន។

«ខ្ញុំមិនឲ្យត្រីដល់ពួកគេទេ តែខ្ញុំនឹងបង្រៀនពួកគេឲ្យចេះស្ទួចត្រី។ ខ្ញុំជឿជាក់ថា ខ្ញុំអាចធ្វើបាន»។ នេះជាប្រសាសន៍របស់លោកឧកញ៉ា សៀ ឫទ្ធី អ្នកវិនិយោគធំជាងគេនៅក្នុងមូលនិធិ OOCTANE CAMBODIA។ បើតាមលោកឧកញ៉ា ការបង្កើតមូលនិធិនេះឡើង គឺជាការផ្តល់ឱកាសដល់SME និង Startup អាចធ្វើឲ្យអាជីវកម្មរបស់ពួកគេមានភាពរីកចម្រើនទាំងអស់គ្នា។

សូមបញ្ជាក់ថា មូលនិធិ OOCTANE CAMBODIA ជាមូលនិធិទ្រទ្រងអាជីវកម្មដល់ Starup និង SME ទាំងក្នុងស្រុក និង អន្តរជាតិ នៅក្នុងប្រទេសកម្ពុជា បានបោះជំហានដំបូងដោយមានទឹកប្រាក់សរុប៥លានដុល្លារ ហើយមូលនិធិនេះ ក៏កំពុងចរចារជាមួយវិនិយោគិនសក្ដានុពលផ្សេងៗទៀត ដើម្បីពង្រីកមូលនិធិឲ្យមានប្រាក់កើនឡើងពី៥លានទៅ១០លានដុល្លារអាមេរិក និងបន្ថែមទឹកប្រាក់ឲ្យបាន២៥លានទៅ៣០លានដុល្លារអាមេរិកនៅឆ្នាំក្រោយនេះ។

លោកឧកញ៉ាបានពន្យល់ពីមូលហេតុដែលលោកសម្រេចចិត្តវិនិយោគក្នុងមូលនិធិនេះយ៉ាងដូច្នេះថា «ខ្ញុំតែងនិយាយជាមួយមិត្តភក្ដិ និងដៃគូអាជីវកម្មរបស់ខ្ញុំ ថា នៅក្នុងសង្គមខ្មែរយើង បើខ្ញុំតែម្នាក់ លូតលាស់តែម្នាក់ឯង ដូចដើមឈើលូតតែឯងអ៊ីចឹង មានន័យថា ខ្ញុំមិនអាចធ្វើដំណើរទៅមុខបានយូរអង្វែងទេ។ ដូច្នេះ ខ្ញុំត្រូវតែវិនិយោគលើយុវវ័យ គំនិតរបស់យុវវ័យ និងធនធានក្មេងៗទាំងក្នុងស្រុក និងក្មេងៗដែលបានត្រឡប់មកពីបរទេសវិញ»។

សូមបញ្ជាក់ថា មូលនិធិ OOCTANE CAMBODIA នឹងផ្តល់ជូនចំពោះអ្នកចាប់ផ្តើមអាជីវកម្ម ដែលមានគំនិតច្នៃប្រឌិតសម្រាប់បុគ្គលមួយរូបក្នុងដំណាក់កាលដំបូង អាចនឹងមានចាប់ពី ៥ពាន់ដុល្លារដល់ ១ម៉ឺនដុល្លារអាមេរិក ឬយ៉ាងហោចណាស់ក៏មានដើមទុនតិចបំផុត ២,៥ ម៉ឺន ដុល្លារ។ រីឯអាជីវកម្មដែលមានផលិតផលប្រើប្រាស់ក្នុងទីផ្សាររួចហើយ នឹងអាចទទួលបានមូលនិធិចំនួន ២,៥ ម៉ឺនដុល្លារអាមេរិកក្នុងមួយក្រុមហ៊ុន។