ក្រុមហ៊ុនតៃវ៉ាន់ Pegatron នេះ នឹងវិនិយោគ ១៩លានដុល្លារ នៅក្នុងដំណាក់កាលដំបូង នៅក្នុងតំបន់ឧស្សាហកម្ម Dinh Vu នៅក្នុងទីក្រុងហៃផុង ប្រទេសវៀតណាម ដោយបង្កើតរោងចក្រផលិត កុំព្យូទ័រ ឧបករណ៍ទំនាក់ទំនង និងគ្រឿងអេឡិចត្រូនិកប្រើប្រាស់ផ្សេងទៀត។ នេះបើតាមរបាយការណ៍មួយ របស់ក្រសួងផែនការ និងវិនិយោគវៀតណាម ដែលបានដាក់ជូនទៅកាន់នាយករដ្ឋមន្ត្រី។
បន្ទាប់មក នៅដំណាក់កាលទី២ ក្រុមហ៊ុននេះ នឹងវិនិយោគបន្ថែម ៤៨១លានដុល្លារ ដោយការវិនិយោគទាំងពីរដំណាក់កាលបូកបញ្ជូលគ្នា នឹងបង្កើតការងារដោយផ្ទាល់ប្រមាណ ២២.៥០០ កន្លែង និងផ្ដល់ចំណូលប្រចាំឆ្នាំសម្រាប់ថវិការដ្ឋ៤,៣លានដុល្លារអាមេរិក ក្នុងមួយឆ្នាំ។
អត្ថបទទាក់ទង!
បន្ទាប់ពីនោះ ក្រុមហ៊ុន Pegatron អាចនឹងវិនិយោគ ៥០០ លានដុល្លារអាមេរិកផ្សេងទៀត ក្នុងការបង្កើតរោងចក្រនៅឆ្នាំ២០២៦-២០២៧ ផងដែរ ហើយក្រុមហ៊ុននេះ ក៏មានកំពុងស្វែងរកការផ្លាស់ប្តូរមជ្ឍមណ្ឌលស្រាវជ្រាវ និងអភិវឌ្ឍន៍របស់ខ្លួនពីប្រទេសចិន មកកាន់ប្រទេសវៀតណាមផងដែរ។
ក្រសួងផែនការ និងវិនិយោគវៀតណាម ក៏បានបញ្ជាក់ទៀតថា រដ្ឋាភិបាលកំពុងតែធ្វើការងារជាមួយនឹងក្រុមហ៊ុនតៃវ៉ាន់មួយទៀត គឺ Universal Global Technology ដែលផលិតទូរស័ព្ទស្មាតហ្វូន និងបំណែកនៃឧបករណ៍កាសស្ដាប់ត្រចៀក សម្រាប់ផលិតផល Lenovo និង Sony ដើម្បីបង្កើតរោងចក្រផលិតនៅក្នុងប្រទេសវៀតណាមផងដែរ។
ជាមួយគ្នានេះ ក្រុមហ៊ុនបុត្រសម្ព័ន្ធ របស់ក្រុមហ៊ុនផលិតឧបករណ៍អេឡិចត្រូនិក ASE Technology Holding ក៏កំពុងពិចារណា វិនិយោគជាពីរដំណាក់កាល ក្នុងតម្លៃ វិនិយោគសរុប ៤០០លានដុល្លារ។
ក្រុមហ៊ុនទាំងនេះ គឺស្ថិតនៅក្នុងចំណោមក្រុមហ៊ុនធំៗ ដែលកំពុងស្វែងរកការផ្លាស់ប្តូរផលិតកម្មពីប្រទេសចិន មកកាន់វៀតណាម ខណៈដែលពួកគេស្វែងរកការធ្វើពិពិធកម្មខ្សែចង្វាក់ផ្គត់ផ្គង់ បន្ទាប់ពីមានការរំខានយ៉ាងខ្លាំង ដោយសារតែការរីករាលដាលនៃ កូវីដ-១៩ និងភាពតានតឹងពាណិជ្ជកម្មរវាងអាមេរិក និងចិន។
ក្រុមហ៊ុន Apple បានចាប់ផ្ដើមផលិតកាសស្ដាប់ត្រចៀកឥតខ្សែ AirPods Pro នៅក្នុងប្រទេសវៀតណាម ហើយក្រុមហ៊ុនដៃគូផ្គត់ផ្គង់សម្រាប់ Apple គឺ Foxconn បាននិយាយ កាលពីខែថិថុនា ថា វៀតណាម គឺជាមជ្ឈមណ្ឌលផលិតកម្មដ៏ធំបំផុតមួយនៅក្នុងតំបន់អាស៊ីអាគ្នេយ៍។
ដោយឡែក ក្រុមហ៊ុនជប៉ុន ចំនួន ១៥ ដែលភាគច្រើនជាអ្នកផលិតសម្ភារសុខាភិបាល និងគ្រឿងបង្គុំអេឡិចត្រូនិក បានចុះបញ្ជីកាលពីខែកក្កដា ដើម្បីរើសផលិតកម្មពីចិនមកកាន់វៀតណាម ក្រោមគម្រោងឧបត្ថម្ភធនពីរាជរដ្ឋាភិបាលជប៉ុន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
