ក្រុមហ៊ុន Pfizer នឹងផលិតថ្នាំគ្រាប់ព្យាបាលជំងឺកូវីដ១៩ ចំនួន ៨០ លានកញ្ចប់រហូតដល់ចុងឆ្នាំក្រោយ

ក្រុមហ៊ុន Pfizer បាននិយាយថា ខ្លួនរំពឹងនឹងផលិតថ្នាំគ្រាប់ចំនួន ១៨ម៉ឺនកញ្ចប់ នៅចុងឆ្នាំនេះ និងចំនួន ២១ លានកញ្ចប់នៅឆមាសទី១ ឆ្នាំក្រោយ ហើយយ៉ាងហោចណាស់ ៥០ លានកញ្ចប់ទៀត នៅចុងឆ្នាំ២០២២។ ទន្ទឹមនេះ រដ្ឋបាល លោក ចូ ប៉ៃឌិន ក៏បានទិញថ្នាំគ្រាប់ព្យាបាលកូវីដនេះ ចំនួន ១០ លានរួចហើយពីក្រុមហ៊ុន Pfizer  ក្នុងកិច្ចព្រមព្រៀងដែលមានតម្លៃ ៥ ពាន់លានដុល្លារផងដែរ។ទន្ទឹមនេះ លោក Albert Bourla បាននិយាយថា លោកមានទំនុកចិត្តខ្ពស់ចំពោះថ្នាំគ្រាប់ព្យាបាលកូវីដ១៩ ប្រភេទ Paxlovid របស់ក្រុមហ៊ុន Pfizer នឹងមានប្រសិទ្ធភាពប្រឆាំងនឹងមេរោគបំប្លែងថ្មី អូមីក្រុង។

សូមជម្រាបថា ក្រុមហ៊ុន Pfizer បានដាក់ពាក្យសុំការអនុញ្ញាតជាបន្ទាន់នូវការប្រើប្រាស់ថ្នាំព្យាបាលកូវីដ១៩ប្រភេទ Paxlovid របស់ខ្លួន កាលពីសប្តាហ៍មុន បន្ទាប់ពីទិន្នន័យបង្ហាញថា វាមានប្រសិទ្ធភាព ៨៩% អាចការពារអ្នកជំងឺពីការធ្លាក់ខ្លួនឈឺធ្ងន់ និងបញ្ចូនទៅមន្ទីរពេទ្យ ហើយអាចការពារពីការស្លាប់បានផងដែរ ប្រសិនបើគេឆាប់លេបថ្នាំនេះ អំឡុងពេលបីថ្ងៃ នៃការចេញរោគសញ្ញាកូវីដ១៩។

យ៉ាងណាមិញ ក្រៅតែពីផែនការ ផលិតថ្នាំគ្រាប់នេះ ថ្មីៗនេះ ក្រុមហ៊ុន Pfizer  បានឱ្យដឹងដែរថា ខ្លួនក៏អាចនឹងធ្វើកំណែទម្រង់វ៉ាក់សាំងផងដែរ ប្រសិនបើមេរោគបំប្លែងថ្មី អូមីក្រុង ត្រូវបានរកឃើញថា មានភាពធន់នឹងវ៉ាក់សាំងរបស់ខ្លួនដែលកំពុងប្រើប្រាស់នាពេលសព្វថ្ងៃនេះ ។ ទន្ទឹមនេះក្រុមហ៊ុនមិនទាន់ច្បាស់ថា តើវ៉ាក់សាំងដែលមានស្រាប់បច្ចុប្បន្ននេះ អាចការពារប្រឆាំងនឹងមេរោគបំប្លែងថ្មីនេះបាន ឬអត់នោះទេ ។ ទោះយ៉ាងណាក្រុមហ៊ុន នឹង អាចផលិតធ្វើកំណែទម្រង់នៃការផលិត វ៉ាក់សាំងកូវីដ ១៩ របស់ខ្លួនឡើងវិញក្នុងរយៈពេល ១០០ ថ្ងៃ ខាងមុខនេះ ដើម្បីបង្កើនប្រសិទ្ធភាពវ៉ាក់សាំងប្រឆាំងមេរោគបំប្លែងថ្មី៕

អត្ថបទ៖ ស៊ើង និមល់