ចំនួនអ្នកស្លាប់ និងរបួស ប្រមាណ១០០នាក់ ដោយសារការធ្លាក់យន្តហោះកងទ័ពអាកាសហ្វីលីពីន

អ្នកនាំពាក្យយោធាម្នាក់លោកវរសេនីយ៍ឯក Edgard Arevalo បានឱ្យដឹងថាយន្តហោះ Lockheed C-130 ដឹកទាហានសម្រាប់ប្រតិបត្តិការប្រឆាំងកុបកម្មបានធ្លាក់ជាមួយមនុស្ស ៩៦នាក់នៅលើយន្តហោះ ខណៈដែលយន្ដហោះនេះបានប៉ុនប៉ងចុះចតនៅឯអាកាសយានដ្ឋានជូឡូក្នុងល្បឿននៃការចុះចតលឿនខ្លាំងបានធ្វើឱ្យខកខានក្នុងការចុះចត និងបានព្យាយាមធ្វើការហោះហើរឡើងវិញ។

ក្រសួងការពារជាតិបាននិយាយថា យន្តហោះកងទ័ពអាកាសហ្វីលីពីនបានធ្លាក់ និងបានឆាបឆេះដោយអណ្តាតភ្លើងនៅលើកោះភាគខាងត្បូងមួយកាលពីថ្ងៃអាទិត្យដោយបានសម្លាប់មនុស្សចំនួន ៤៧នាក់ ក្នុងនោះមានជនស៊ីវិល ៣នាក់ និងបុគ្គលិកយោធាចំនួន ៤៩នាក់បានរងរបួស រួមទាំងជនស៊ីវិល៤នាក់ទៀត។

គួរឱ្យដឹងផងដែរថា ការធ្លាក់យន្តហោះនេះ មានចម្ងាយប្រហែល ៩៥០ គីឡូម៉ែត្រ (៦០០ ម៉ៃល៍) ខាងត្បូងនៃរដ្ឋធានីម៉ានីល គឺជាបន្ទាយរបស់ក្រុមសកម្មប្រយុទ្ធ Abu Sayyaf នៅតំបន់ស៊ូលូ ដែលល្បីល្បាញខាងចោរប្លន់ និងចោរកម្ម ដែលយោធាបានប៉ះទង្គិចជាមួយ ។

គួរឱ្យជម្រាបថា គេហទំព័ររបស់រដ្ឋាភិបាលភីលីពីនបាននិយាយកាលពីខែមករាថាយន្តហោះនេះជាយន្តហោះមួយក្នុងចំណោមយន្តហោះចំនួន ២ ដែលផ្តល់ដោយរដ្ឋាភិបាលសហរដ្ឋអាមេរិកតាមរយៈទីភ្នាក់ងារសហប្រតិបត្តិការសន្តិសុខការពារជាតិ៕

អត្ថបទ៖ ស៊ើង និមល់