ក្រុមហ៊ុន Semirara គ្រោងនឹងនាំចេញធ្យូងថ្មចំនួន ៥ ម៉ឺនតោនទៅឱ្យក្រុមហ៊ុនថាមពលអគ្គិសនីជប៉ុន ស៊ីកូគុ (Shikoku) សម្រាប់ប្រើក្នុងរោងចក្រផលិតថាមពលអគ្គីសនី ៧ រយមេហ្គាវ៉ាត់ បន្ទាប់ពីក្រុមហ៊ុននេះបានសាកល្បងនាំចេញជាលើកដំបូងកាលពីខែមករា នូវធ្យូងថ្មកម្រិតមធ្យមចំនួនជាង ៧ ម៉ឺន ៨ ពាន់តោន ទៅឱ្យក្រុមហ៊ុន ចេ-ផៅវើ (J-Power)។
លោកស្រី ម៉ារី គ្រីស្ទីណា ហ្គូធៀណាន់ (Maria Cristina Gotianun) ប្រធានផ្នែកប្រតិបត្តិការរបស់ក្រុមហ៊ុន Semirara បាននិយាយនៅក្នុងសេចក្តីថ្លែងការណ៍មួយថា ប្រទេសចិននៅតែជាអ្នកទិញបរទេសដ៏សំខាន់របស់ក្រុមហ៊ុនលោកស្រី ប៉ុន្តែដោយទិន្នផលឧស្សាហកម្មរបស់ចិនមានសន្ទុះយឺតជាងការរំពឹងទុក ដូច្នេះហើយទើបក្រុមហ៊ុនលោកស្រីចង់ពង្រីកទីផ្សារអាស៊ីដូចនៅប្រទេសជប៉ុនជាដើម។
ក្រុមហ៊ុន Semirara បាននិយាយថា ការនាំចេញធ្យូងថ្មរបស់ខ្លួនទៅកាន់ប្រទេសចិនបានធ្លាក់ចុះ ៥០% ពីខែមករាដល់ខែមីនា មកនៅត្រឹមជាង ១ លានតោន ដែលស្មើនឹង ៧២% នៃការនាំចេញសរុបរបស់ខ្លួន។ ការនាំចេញទៅកាន់ប្រទេសកូរ៉េខាងត្បូងមានស្ថិរភាពក្នុងកម្រិត ៣ សែនតោន ពោលគឺស្មើនឹង ១ ភាគ ៥ នៃការលក់ទៅក្រៅប្រទេស ហើយនៅសល់ប៉ុន្មានទៀតគឺបាននាំចេញទៅប្រទេសជប៉ុន និងប្រទេសប្រ៊ុយណេ ក្នុងចំណែករៀងគ្នា ៥% និង ៣% នៃការនាំចេញសរុប។
យោងតាមក្រុមហ៊ុន Semirara, ផលិតផលធ្យូងថ្មរបស់ខ្លួន គឺស្មើនឹង ៩៩% នៃទិន្នផលធ្យូងថ្មសរុបនៅក្នុងប្រទេសហ្វីលីពីន ហើយទីផ្សារក្នុងស្រុក ដែលរួមទាំងរោងចក្រថាមពលក្រោមការគ្រប់គ្រងរបស់ក្រុមហ៊ុន Semirara ផង បានទិញធ្យូងថ្មប្រហែល ៥២% នៃបរិមាណសរុបដែលក្រុមហ៊ុនផលិតបានកាលពីឆ្នាំមុន។
ក្រុមហ៊ុន Semirara បាននិយាយថា ប្រាក់ចំណូលសុទ្ធរបស់ខ្លួនបានធ្លាក់ចុះ ៤០% មកនៅត្រឹមជាង ១៦០ លានដុល្លារ បើគិតពីខែមករាដល់ខែមីនា។ ការថយចុះប្រាក់ចំណូលមួយផ្នែកគឺដោយសារការនាំចេញធ្យូងថ្មធ្លាក់ចុះ និងដោយសារការប្រែប្រួលតម្លៃទីផ្សារ៕
