ដើម្បីសម្រួលដល់ក្រុមអ្នកចិញ្ចឹមជ្រូកក្នុងស្រុក កន្លងមក ក្រសួងកសិកម្ម បានកាត់បន្ថយការនាំចូលជ្រូករស់ពីបរទេសមកនៅត្រឹម ៧០០ក្បាល ទៅ៨០០ក្បាល ក្នុងមួយថ្ងៃ ហើយសព្វថ្ងៃនេះ ក្រសួងបន្តកាត់បន្ថយការនាំចូលជ្រូករស់មកនៅត្រឹមតែ៣០០ក្បាល ប៉ុណ្ណោះ ក្នុងមួយថ្ងៃ។ បើទោះបី ចំនួននៃការនាំចូលជ្រូករស់ត្រូវបានកាត់បន្ថយក៏ពិតមែន តែតម្លៃជ្រូករស់នៅរក្សាតម្លៃ ៩ពាន់រៀល ក្នុងមួយគីឡូក្រាម ដដែល។ តើមានកត្តាអ្វីខ្លះដែលធ្វើឱ្យតម្លៃជ្រូករស់ក្នុងស្រុកបន្តធ្លាក់ថ្លៃដូច្នេះ?
ជុំវិញតម្លៃជ្រូករស់ក្នុងស្រុកនេះដែរ បើតាមការបញ្ជាក់របស់ឯកឧត្តម វេង សាខុន រដ្ឋមន្ត្រីក្រសួងកសិកម្ម ទទួលស្គាល់ថា ពិតជាមានតម្លៃទាបពិតមែន និងបានបង្ហាញពីមូលហេតុមួយចំនួន ដែលធ្វើឱ្យតម្លៃជ្រូករស់បន្តធ្លាក់ចុះយ៉ាងដូច្នេះ។ ឯកឧត្តម វេង សាខុន លើកឡើងថា បញ្ហាចម្បងៗរួមមាន កសិដ្ឋានចិញ្ចឹមជ្រូកក្នុងស្រុកកើនឡើង, ការខកខាននៃការបញ្ចេញជ្រូកនៅក្នុងរដូវភ្ជុំ, តម្លៃជ្រូករស់នៅប្រទេសជិតខាងទាបជាង, វិបត្តិកូវីដ១៩, រួមទាំងការនាំចូលជ្រូកខុសច្បាប់ សុទ្ធតែជាមូលហេតុដែលធ្វើឱ្យតម្លៃជ្រូករស់ក្នុងស្រុកធ្លាក់ចុះ។
លោក ស្រ៊ុន ពៅ ប្រធានសមាគមចិញ្ចឹមសត្វកម្ពុជា បានបញ្ជាក់ប្រាប់សារព័ត៌មានខេមបូណូមីសថា ក្រសួងកសិកម្ម និងស្ថាប័នពាក់ព័ន្ធពិតជាបានខិតខំប្រឹងប្រែងក្នុងវិស័យចិញ្ចឹមសត្វ ពិសេសសកម្មភាពបង្ក្រាប និងទប់ស្កាត់ការនាំចូលជ្រូករស់ខុសច្បាប់ពីប្រទេសជិតខាង។ លោក ស្រ៊ុន ពៅ បានគូសបញ្ជាក់ថា ការខិតខំរបស់ក្រសួង-ស្ថាប័ន កន្លងមក ពិតជាចូលរួមចំណែកយ៉ាងធំធេង ក្នុងការកាត់បន្ថយការនាំចូលជ្រូករស់ បើប្រៀបនឹងរយៈពេលប៉ុន្មានឆ្នាំកន្លងមក។ ក៏ប៉ុន្តែ អ្វីដែលប្រធានសមាគមរូបនេះ នៅតែមានក្ដីកង្វល់នោះ គឺបច្ចុប្បន្ន ការនាំចូលជ្រូករស់ដោយខុសច្បាប់នៅតែបន្តមានសកម្មភាពគ្រប់រូបភាព។
អត្ថបទទាក់ទង
បើទោះបី បច្ចុប្បន្ន វិស័យចិញ្ចឹមជ្រូកមានការរីកចម្រើន ក៏ពិតមែនតែ លោក ស្រ៊ុន ពៅ នៅតែបន្តអំពាវនាវឱ្យរដ្ឋាភិបាលបញ្ឈប់ការនាំចូលជ្រូករស់ពីក្រៅប្រទេសទាំងស្រុង។ លោក ស្រ៊ុន ពៅ បានអះអាងថា កសិករខ្មែរមានលទ្ធភាពគ្រប់គ្រាន់ហើយ ក្នុងការផ្គត់ផ្គង់ជ្រូករស់លើទីផ្សារក្នុងស្រុក ដូច្នេះ មិនចាំបាច់នោះទេ ដែលកម្ពុជា បន្តអនុញ្ញាតឱ្យនាំចូលជ្រូករស់ពីខាងក្រៅបន្តទៀត។
ចំណែក លោក មៀច ពុទ្ធា អ្នកចិញ្ចឹមជ្រូកម្នាក់ ក្នុងខេត្តពោធិ៍សាត់ ក៏បានរអ៊ូរទាំផងដែរពីតម្លៃជ្រូករស់ នាពេលបច្ចុប្បន្ន។ កសិកររូបនេះ បានបញ្ជាក់ប្រាប់សារព័ត៌មានខេមបូណូមីស ថា តម្លៃជ្រូករស់បានធ្លាក់ចុះតាំងពីរដូវបុណ្យភ្ជុំម្លេះ តែបច្ចុប្បន្ន តម្លៃជ្រូករស់បានធ្លាក់ចុះបន្ថែមទៀត ខណៈការចំណាយលើថ្លៃចំណីកាន់តែខ្ពស់ផងដែរ។ លោកបានបញ្ជាក់ទៀតថា នៅរដូវភ្ជុំបិណ្ឌលោកអាចលក់ជ្រូករស់ ក្នុងតម្លៃ ១ម៉ឺនរៀល ក្នុងមួយគីឡូក្រាម ខណៈបច្ចុប្បន្ន តម្លៃជ្រូករស់អាចលក់បានត្រឹម ៩ពាន់រៀល ប៉ុណ្ណោះ ក្នុងមួយគីឡូក្រាម។
បច្ចុប្បន្ន កម្ពុជា មានតម្រូវការជ្រូករស់ប្រមាណ ៨ពាន់ក្បាល ក្នុងមួយថ្ងៃ នៅលើទីផ្សារក្នុងស្រុក ខណៈកម្ពុជា មានលទ្ធភាពផ្គត់ផ្គង់ជ្រូករស់ជិត ៨ពាន់ក្បាល ទៅហើយ ក្នុងមួយថ្ងៃ ដូច្នេះ កម្ពុជា មិនចាំបាច់នោះទេ ក្នុងការបន្តនាំចូលជ្រូករស់ពីបរទេសបន្តទៀត។ នេះបើតាមការបញ្ជាក់របស់លោក ស្រ៊ុន ពៅ ប្រធានសមាគមចិញ្ចឹមសត្វកម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
