ការព្រមាននេះធ្វើឡើងក្រោយក្រសួងសង្កេតឃើញថា ការផ្គត់ផ្គង់សេវាទូរស័ព្ទចល័ត និងអ៊ិនធឺណិតនៅតំបន់មួយចំនួននៅតែមានបញ្ហា។ ដើម្បីរួមចំណែកជួយលើកកម្ពស់គុណភាពសេវាទូរគមនាគមន៍ ក្រសួងប្រៃសណីយ៍ស្នើឲ្យបញ្ឈប់ការប្រើប្រាស់ និងនាំចូលឧបករណ៍បង្កើនកម្លាំង ឬពង្រីកសេវាខុសច្បាប់ ព្រោះឧបករណ៍ទាំងនេះបង្កឲ្យមានការរំខាន និងប៉ះពាល់ដល់គុណភាពសេវា។
ក្រសួងប្រៃសណីយ៍ និងទូរគមនាគមន៍នៅថ្ងៃទី៨ ខែកក្កដា ឆ្នាំ២០២២ បានចេញសេចក្តីជូនដំណឹងមួយ ដើម្បីបង្ហាញពីសមិទ្ធផលដែលសម្រេចបានកន្លងមក និងបញ្ហាខ្វះខាតមួយចំនួនដែលត្រូវដោះស្រាយបន្តក្នុងការអនុវត្តន៍វិធានការកែទម្រង់ស៊ីជម្រៅ ដើម្បីលើកកម្ពស់គុណភាពសេវាទូរគមនាគមន៍នៅកម្ពុជា។ ក្រសួងបានកត់សម្គាល់ឃើញថា ទោះបីកិច្ចខិតប្រឹងប្រែងកន្លងមក ក្រសួងទទួលបានជោគជ័យលើកផ្នែកជាច្រើនក្នុងវិស័យទូរគមនាគមន៍ក៏ដោយ តែបញ្ហាគុណភាពសេវាទូរស័ព្ទចល័ត និងអ៊ិនធឺណិតនៅតែជាចំណោទ ដែលក្រសួងត្រូវដោះស្រាយបន្ត។
ក្រោយចាត់ក្រុមការងារឲ្យចុះសិក្សាស្រាវជ្រាវតាមតំបន់នានាទូទាំងប្រទេសក្រសួងប្រៃសណីយ៍ និងទូរគមនាគមន៍រកឃើញថា នៅតំបន់មួយចំនួនតាមបណ្តាខេត្ត និងរាជធានីភ្នំពេញនៅតែជួបបញ្ហាសេវាទូរស័ព្ទចល័តនិងអ៊ិនធឺណិតមានគុណភាពខ្សោយ។ ក្រសួងអះអាងថា បញ្ហានេះបណ្តាលមកពីប្រតិបត្តិករមួយចំនួននៅតែបន្តប្រើប្រាស់បច្ចេកវិទ្យានិងឧបករណ៍ ដែលមិនទាន់ធ្វើទំនើបកម្មឲ្យស្របតាមស្តង់ដារបច្ចេកវិទ្យា, ការកែសម្រួល បង្កើនគុណភាព និងការសាងសង់ស្ថានីយអង់តែននៅមានកម្រិត, ការកាត់បន្ថយសមត្ថភាពនៃឧបករណ៍បញ្ជូននិងទទួលសេវា គួបផ្សំការកើនឡើងចំនួនអ្នកប្រើប្រាស់ និងអគារខ្ពស់ៗ។ ការដំឡើងស្ថានីយ៍អង់តែននៅតែទីប្រជុំជន និងការដំឡើងឧបករណ៍បង្កើនកម្លាំងសេវា ឬពង្រីកសេវារបស់អ្នកប្រើប្រាស់ ក៏ជាកត្តាធ្វើឲ្យប៉ះពាល់ដល់គុណភាពសេវាផងដែរ។
អត្ថបទគួរអាន
ទន្ទឹមនឹងនេះ ក្រសួងប្រៃសណីយ៍ និងទូរគមនាគមន៍ប្តេជ្ញាថា ក្រសួងនឹងលុបបំបាត់ភាពអសកម្ម និងចំណុចអវិជ្ជមានក្នុងវិស័យទូរគមនាគមន៍តាមរយៈការអនុវត្តន៍វិធានការច្បាប់ និងបទដ្ឋានគតិយុត្តិពាក់ព័ន្ធផ្សេងៗលើអ្នកប្រើប្រាស់ និងប្រតិបត្តិករ ដែលអនុវត្តមិនត្រឹមត្រូវក្នុងផ្គត់ផ្គង់សេវាទូរគមនាគមន៍។ ក្រសួងសង្ឃឹមថា ប្រតិបត្តិករទូរគមនាគមន៍ គ្រប់ភាគីពាក់ព័ន្ធ និងអ្នកប្រើប្រាស់ទាំងអស់នឹងចូលរួមសហការ ដើម្បីធ្វើឱ្យសេវាទូរសព្ទចល័តនិងសេវាអ៊ីនធឺណិតនៅកម្ពុជាឲ្យកាន់តែល្អប្រសើរ។
ជាមួយគ្នានេះក្រសួងស្នើឲ្យប្រជាពលរដ្ឋទាំងអស់បញ្ឈប់ការប្រើប្រាស់ឧបករណ៍បង្កើនកម្លាំងសេវា ឬឧបករណ៍ពង្រីកសេវា ពីព្រោះឧបករណ៍ទាំងនេះធ្វើឲ្យមានការឆ្លងរំខាន និងប៉ះពាល់គុណភាពសេវា។ បន្ថែមលើក្រសួងស្នើឲ្យបញ្ឈប់ការនាំចូលឧបករណ៍បង្កើនកម្លាំងសេវា ឬឧបករណ៍ពង្រីកសេវាគ្រប់ប្រភេទដែលពុំមានការទទួលស្គាល់យថាប្រភេទពី ក្រសួង ដើម្បីជៀសវាងការប្រឈមនឹងវិធានការច្បាប់៕
