ថ្នាក់ដឹកនាំប្រាសាក់ សុទ្ធតែរំពឹងខ្ពស់ថា KB នឹងនាំយកបច្ចេកទេសថ្មីៗក្នុងវិស័យហិរញ្ញវត្ថុ និង ធនាគារមកអភិវឌ្ឍន៍ប្រតិបត្តិការប្រាសាក់ឲ្យកាន់តែល្អប្រសើរ និង ទទួលបានការគាំទ្រកាន់តែច្រើនពីអតិថិជន។
លោក ស៊ឹម សេនាជាតិ ប្រធាននាយកប្រតិបត្តិគ្រឹះស្ថានមីក្រូហិរញ្ញវត្ថុ ប្រាសាក់បានបញ្ជាក់ប្រាប់ខេមបូណូមីស ថា ក្រោយពីក្រុមហ៊ុន KB ដែលបានទិញភាគហ៊ុនក្តោបក្តាប់ទាំងស្រុង ១០០%ហើយនោះ ប្រាសាក់ នឹងប្រែក្លាយខ្លួនពីគ្រឹះស្ថានមីក្រូហិរញ្ញវត្ថុទៅជាធនាគារពាណិជ្ជដ៏ធំមួយនៅកម្ពុជាក្នុងពេលខាងមុខនេះ ដែលធ្វើឲ្យប្រតិបត្តិការរបស់ប្រាសាក់កាន់តែទូលំទូលាយ និងល្អប្រសើរជាងមុន។ ថ្នាក់ដឹកនាំកំពូលរូបនេះ ជឿជាក់ថាក្រុមហ៊ុន KB Financial Group របស់ប្រទេសកូរ៉េខាងត្បូងនឹងអាចប្រែក្លាយប្រាសាក់ទៅធនាគារក្នុងពេលដ៏ខ្លីខាងមុខនេះ ដ្បិតថា បច្ចុប្បន្នក្រុមហ៊ុនរបស់កូរ៉េដែលជាម្ចាស់ភាគហ៊ុនប្រាសាក់ កំពុងប្រតិបត្តិការធនាគារមួយនៅកម្ពុជាមានឈ្មោះថា Kookmin Bank រួចទៅហើយ។ ទោះយ៉ាងណា លោក ស៊ឹម សេនាជាតិ មិនទាន់អាចបញ្ជាក់ពីពេលវេលាជាក់លាក់ក្នុងការប្រែក្លាយខ្លួនគ្រឹះស្ថានមីក្រូហិរញ្ញវត្ថុប្រាសាក់ទៅជាធនាគារនៅពេលណានៅឡើយទេ។
សម្រាប់លោក ស៊ឹម សេនាជាតិ បានបញ្ជាក់អះអាងថា ការទិញភាគហ៊ុនទាំងអស់ ១០០% របស់ប្រាសាក់ពីសំណាក់ក្រុមហ៊ុន KB Financial Group របស់ប្រទេសកូរ៉េខាងត្បូង ដែលជាក្រុមហ៊ុនចុះបញ្ជីផ្សារហ៊ុនដ៏ធំមួយនៅទីក្រុងសេអ៊ូលប្រទេសកូរ៉េខាងត្បូង គឺជាការបង្ហាញទំនុកចិត្តរបស់វិនិយោគិនបរទេសមកលើវិស័យហិរញ្ញវត្ថុនៅកម្ពុជាកាន់តែខ្ពស់ថែមទៀត។ លោក សេនាជាតិ រំពឹងថា ក្រុមហ៊ុនរបស់កូរ៉េខាងត្បូងមួយនេះ នឹងនាំយកបច្ចេកទេសថ្មីៗបន្ថែម សម្រាប់ប្រតិបត្តិការឲ្យកាន់តែប្រសើរឡើង។ លោក សេនាជាតិ រំពឹងផងដែរថា គ្រឹះស្ថានហិរញ្ញវត្ថុប្រាសាក់ នឹងដើរតួនាទីដ៏ខាន់ក្នុងការផ្តល់ប្រាបាក់កម្ចី និង ទទួលបានការគាំទ្រ និង ទំនុកចិត្តកាន់តែខ្ពស់ពីអតិថិជន។
អត្ថបទគួរអាន
គួររំលឹកថា កាលពីពេលថ្មីៗក្រុមហ៊ុន KB Financial Group បានចំណាយថវិកា ៣២២លានដុល្លារ ដើម្បីទិញភាគហ៊ុន៣០% របស់ប្រាសាក់ ដែលនៅសល់បន្ថែមទៀត បន្ទាប់ពីក្រុមហ៊ុននេះបានចំណាយជាង ៦០០លានដុល្លារទិញភាគហ៊ុន៧០% មកគ្រប់គ្រងកាលពីថ្ងៃទី២៩ ខែមករា ឆ្នាំ២០២០ ក្រោយទទួលបានការអនុញ្ញាតពីធនាគារជាតិនៃកម្ពុជា។
កាលពីពេលថ្មីនេះ គ្រឹះស្ថានមីក្រូហិរញ្ញវត្ថុ ប្រាសាក់បានប្រកាសថា នៅឆមាសទី១ឆ្នាំ២០២១ ខ្លួនទទួលប្រាក់ចំណេញសុទ្ធជិត ៦៩លានដុល្លារ មានការកើនឡើងជាង៣០លានដុល្លារបើធៀបនឹងឆមាសទី១កាលពីឆ្នាំ២០២០ ដែលមានត្រឹមតែជាង ៣៧លានដុល្លារអាមេរិកប៉ុណ្ណោះ។ សូមបញ្ជាក់ថា គ្រឹះស្ថានមីក្រូហិរញ្ញវត្ថុប្រាសាក់ក៏បានបោះផ្សាយលក់បណ្ណបំណុលរបស់ខ្លួន ក្នុងផ្សារមូលបត្រកម្ពុជាផងដែរ កាលពីខែឧសភាឆ្នាំ២០២០ ដោយបានប្រមូលបានដើមទុនពីទីផ្សារភាគហ៊ុនជាង៣១លានដុល្លារអាមេរិក។ បណ្ណបំណុលរបស់ប្រាសាក់ គឺមានអត្រាកូប៉ុង ឬហៅថា ការប្រាក់ ៧,៥% ក្នុងមួយឆ្នាំ និង មានរយៈពេល៣ឆ្នាំ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
