ថ្លែងក្នុងពិធីជួបសំណេះសំណាលជាមួយសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) នៅមជ្ឈមណ្ឌលពិព័រណ៍ជ្រោយចង្វារ នៅថ្ងៃទី ១៧ ខែឧសភា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានគូសបញ្ជាក់ថា ខាងភាគីចិនបាននឹងកំពុងរងចាំចម្លើយពីខាងកម្ពុជា លើការងារបង្កើតរោងចក្រផលិតវ៉ាក់សាំងបង្ការជំងឺកូវីដ១៩នៅកម្ពុជា ដោយសម្តេចបានបញ្ជាឲ្យ ឯកឧត្តមរដ្ឋមន្ត្រីក្រសួងសុខាភិបាល ត្រូវមើលទៅលើក្រុមហ៊ុនដែលទទួលបានអាជ្ញាបណ្ណ (License) ក្នុងការបង្កើតរោងចក្រផលិតវ៉ាក់សាំងនៅកម្ពុជា ហេតុអ្វីមិនទាន់ឃើញធ្វើសកម្មភាពអ្វីសោះយ៉ាងដូច្នេះ? សម្តេចបានសង្កត់ធ្ងន់ថា បើសិនជាមិនធ្វើទេ រាជរដ្ឋាភិបាលត្រូវប្រគល់អាជ្ញាបណ្ណឲ្យក្រុមហ៊ុនផ្សេងដែលមានសមត្ថភាពធ្វើជំនួសវិញ ដោយមិនអាចទុកចោលបែបនេះទេ។
ជាមួយគ្នានេះ សម្តេចតេជោ ហ៊ុន សែនបានបញ្ជាក់ផងដែរថា កម្ពុជាត្រូវការរោងចក្រមួយសម្រាប់ផលិតវ៉ាក់សាំងបង្ការកូវីដ១៩នេះ ពីព្រោះមិនដឹងពេលណាជំងឺកូវីដ១៩ ត្រូវបាត់អស់នោះទេ បើទោះបីជាពេលបច្ចុប្បន្នកម្ពុជាមិនមានករណីឆ្លងកូវីដ១៩ក៏ដោយ។ នៅពេលដែលមានរោងចក្រផលិតវ៉ាក់សាំងនេះ នៅថ្ងៃអនាគតកម្ពុជាមិនត្រឹមតែផលិតវ៉ាក់សាំងកូវីដ១៩នោះទេ ប៉ុន្ដែក៏អាចផលិតវ៉ាក់សាំងការពារជំងឺប្រភេទផ្សេងៗទៀតផងដែរ។
អត្ថបទគួរអាន
សម្តេចតេជោ ហ៊ុន សែនបានបន្ថែមថា មកទល់ពេលនេះ កម្ពុជាទទួលបានវ៉ាក់សាំងសរុបជាង ៥២លានដូស បានប្រើប្រាស់អស់ជិត៤៣លានដូស ហើយបច្ចុប្បន្នកម្ពុជា នៅសល់វ៉ាក់សាំងក្នុងឃ្លាំងជិត១០លានដូសទៀត ដែលក្នុងចំណោមវ៉ាក់សាំងទាំងអស់ វ៉ាក់សាំងប្រឆាំងកូវីដ-១៩ ចំនួន ២៨លាន៥សែនដូស គឺជាវ៉ាក់សាំងដែលកម្ពុជាទិញដោយខ្លួនឯង ហើយវ៉ាក់សាំងដែលមិនទាន់ដឹកមកកម្ពុជាមានជាង២០លានដូសបន្ថែមទៀតផងដែរ។
ដោយឡែក ចំពោះស្ថានភាពឆ្លងរាលដាលកូវីដ១៩វិញ ឃើញថា កម្ពុជាមិនមានករណីឆ្លងកូវីដ១៩ ថ្មីនោះទេ នៅរយៈពេល ១០ថ្ងៃជាប់គ្នា ហើយគិតត្រឹមថ្ងៃទី១៦ ខែឧសភា អត្រាអ្នកចាក់វ៉ាក់សាំងកូវីដ១៩ នៅកម្ពុជាមានចំនួន ៩៣,៧៩% ធៀបនឹងចំនួនប្រជាជនសរុប ១៦លាននាក់។
ទោះបីជា កម្ពុជាធូរស្បើយពីការរាតត្បាតកូវីដ១៩ និងកម្ពុជាមានការបន្ធូរបន្ថយច្រើនលើការធ្វើដំណើរពីក្រៅប្រទេសក្ដី ប៉ុន្ដែ សម្តេចតេជោ អះអាងថា កម្ពុជាមិនអាចលុបការធ្វើចត្តាឡីស័ក សម្រាប់អ្នកដែលធ្វើដំណើរមកចូលប្រទេសកម្ពុជា ដែលមិនបានចាក់វ៉ាក់សាំងនោះឡើយ ព្រោះ សម្តេចតេជោយល់ថា បើសិនជាមានការលើកលែងធ្វើចត្តាឡីស័ក សម្រាប់អ្នកមិនបានចាក់វ៉ាក់សាំងមកពីក្រៅប្រទេស គឺវាប្រៀបដូចលើកទឹកចិត្តសម្រាប់មនុស្សដែលមិនបានចាក់វ៉ាក់សាំងដូច្នោះដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
