សាលាអន្តរជាតិធំមួយ សម្រេចបញ្ចុះថ្លៃសិក្សា នៅអំឡុងពេលកូវីដ-១៩ ក្រោយពីមានការស្នើសុំពីអាណាព្យាបាល

ក្រោយពីមានការស្នើសុំពីអាណាព្យាបាលសិស្ស ឲ្យមានការបន្ថយការបង់ថ្លៃសាលា ៥០% នៅអំឡុងពេលវិបត្តិកូវីដ-១៩នោះ នៅទីបំផុតសាលាអន្តរជាតិធំមួយនៅរាជធានីភ្នំពេញ បានសម្រេចធ្វើតាមការស្នើសុំនេះ ដោយបានបញ្ចុះថ្លៃសិក្សាខ្លះ ប៉ុន្ដែ មិនបានបញ្ចុះដល់ ៥០% តាមការស្នើសុំនោះទេ។

សាលាអន្តរជាតិធំមួយ សម្រេចបញ្ចុះថ្លៃសិក្សា នៅអំឡុងពេលកូវីដ-១៩ ក្រោយពីមានការស្នើសុំពីអាណាព្យាបាល(រូបភាពពីផេក CIA FIRST International School)

បើយោងតាមសេចក្ដីជូនដំណឹងរបស់សាលាអន្តរជាតិ ស៊ី អាយ អេស ហ្វឺសត៍ ដែលបានធ្វើឡើងនៅថ្ងៃទី ២១ ខែមេសា បានឲ្យដឹងថា បន្ទាប់ពីមានជំនួបលើកទីពីរកាលពីថ្ងៃទី ១៧ ខែមេសា ឆ្នាំ២០២០ ជាមួយមាតាបិតា និងអាណាព្យាបាលសិស្ស សាលាអន្តរជាតិ ស៊ី អាយ អេ ហ្វឺសត៍ បានសម្រេចផ្ដល់អាហារូបករណ៍បញ្ចុះតម្លៃ ៥០% ជូនដល់សិស្សានុសិស្សចំនួន ២០០ នាក់ ប៉ុន្ដែ ដោយមានសំណូមពរជាថ្មីទៀត របស់មាតាបិតា និងអាណាព្យាបាលសិស្សស្នើសុំសាលាធ្វើការចុះតម្លៃភាគរយជារួមវិញ សាលាអន្តរជាតិ ស៊ី អាយ អេ ហ្វឺសត៍ ក៏បានសម្រេចលុបចោលអាហារូបករណ៍៥០%សម្រាប់សិស្ស ២០០នាក់នោះ និងបានប្ដូរទៅជាការបញ្ចុះតម្លៃជារួមវិញ ក្នុងន័យអនុវត្តទទួលខុសត្រូវផ្នែកសង្គមរបស់ក្រុមហ៊ុនធុរកិច្ច (Corporate Social Responsibility)។

បើតាមសាលាអន្តរជាតិ ស៊ី អាយ អេ ហ្វឺសត៍ ការបញ្ចុះតម្លៃនេះ ចែកជាពីរផ្នែក គឺ សម្រាប់សិស្សដែលរៀនថ្នាក់មតេយ្យ K3-K4-K5 សាលាបញ្ចុះតម្លៃជូន ២៥%។ រីឯសិស្សដែលរៀនថ្នាក់ទី ១ ដល់ថ្នាក់ទី១២ សាលាបញ្ចុះតម្លៃជូន ១៥%។

សាលាអន្តរជាតិនេះ បានបញ្ជាក់ទៀតថា ខ្លួនបានខំប្រឹងរិះរកដំណោះស្រាយអស់លទ្ធភាពហើយ ហើយក៏សង្ឃឹមថា មាតាបិតា និងអាណាព្យាបាលសិស្សនឹងអាចទទួលយកដំណោះស្រាយនេះបាន។

សូមបញ្ជាក់ថា កាលពីថ្ងៃទី ១០ ខែមេសាកន្លងទៅនេះ ខាងមាតាបិតា ក៏ដូចជាអាណាព្យាបាលចំនួន៣៧១នាក់ ដែលមានកូនរៀននៅសាលាអន្តរជាតិ ស៊ី អាយ អេ ហ្វឺសត៍នេះចំនួន ៦០១ នាក់ គឺបានធ្វើលិខិតដោយមានភ្ជាប់ស្នាមមេដៃផង បានស្នើ៣ចំណុច ទៅកាន់សាលានេះ៖

១, បញ្ចុះថ្លៃសិក្សាចំនួន៥០% ចាប់ពីខែមេសា ឆ្នាំ២០២០ តទៅ និងរហូតដល់មានការប្រកាសកាលវិភាគសិក្សាថ្មី ពីក្រសួងអប់រំ យុវជន និងកីឡា ចំពោះសិស្សចាប់ពីថ្នាក់ទី១ រហូតដល់ថ្នាក់ទី ១២ (ទាំងអ្នកបង់ប្រាក់ប្រចាំខែ ត្រីមាស ឬបង់ប្រចាំឆ្នាំ)។

២, ផ្អាកជាបណ្ដោះអាសន្នការសិក្សា របស់សិស្សថ្នាក់មតេយ្យគ្រប់កម្រិត (K3-K5) ដោយមិនគិតថ្លៃសិក្សា ឬតម្រូវឲ្យបង់ប្រាក់ (ទាំងអ្នកបង់ប្រាក់ប្រចាំខែ ត្រីមាស ឬបង់ប្រចាំឆ្នាំ) ចាប់ពីខែមេសា ឆ្នាំ២០២០នេះតទៅ រហូតដល់មានការប្រកាសរបស់ក្រសួង។

៣, ផ្អាកការសិក្សាគ្រប់កម្រិតជាបណ្ដោះអាសន្ន (ទោះបីជាតាមអនឡាញ) ប្រសិនបើមានការប្រកាសដាក់ប្រទេសក្នុងស្ថានភាពអាសន្ន ដោយមិនតម្រូវឲ្យបង់ថ្លៃសិក្សា រហូតដល់មានការប្រកាសរបស់រាជរដ្ឋាភិបាល៕