ក្នុងនោះក្រុមហ៊ុនបច្ចេកវិទ្យាធំៗរបស់កោះតៃវ៉ាន់ក៏បានផ្តើមចាកចេញពីទឹកដីចិនដូចគ្នាដែរ ប៉ុន្តែពួកគេមិនបានដាក់គោលដៅអាជីវកម្មនៅក្នុងប្រទេសជប៉ុនដែលធ្លាប់តែមានទំនាក់ទំនងល្អនឹងគ្នានោះទេ ផ្ទុយទៅវិញ ក្រុមហ៊ុនតៃវ៉ាន បានសម្លឹងឃើញឱកាសក្នុងទីផ្សាររបស់អាមេរិក អឺរ៉ុប និងអាស៊ីអាគ្នេយ៍ជាដើម។ នេះបើយោងតាមរបាយការណ៍សិក្សាដោយក្រសួងសេដ្ឋកិច្ចកោះតៃវ៉ាន់ ហើយត្រូវបានចុះផ្សាយបន្តដោយសារព័ត៌មាន Nikkei។
បើតាមរបាយការណ៍សិក្សាស្តីពីខ្សែសង្វាក់ផ្គត់ផ្គង់ ដែលចេញផ្សាយដោយក្រសួងសេដ្ឋកិច្ចតៃវ៉ាន់កាលពីចុងខែកក្កដាបានបង្ហាញថា ការវិនិយោគដោយផ្ទាល់របស់តៃវ៉ាន់ទៅចិនដីគោក បានធ្លាក់ចុះយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ។ ទោះបីបច្ចុប្បន្ន ចិននៅតែឈរកំពូលតារាងលំដាប់លេខ១ ជាប្រទេសទិសដៅវិនិយោគរបស់តៃវ៉ាន់ក៏ពិតមែន ប៉ុន្តែចំណែកទីផ្សារបានដាំក្បាលចុះខ្លាំង ក្នុងរយៈពេល១០ឆ្នាំចុងក្រោយនេះពីអត្រា ៨០%កាលពីឆ្នាំ២០១១ ធ្លាក់មកនៅត្រឹម ៣៣%ប៉ុណ្ណោះក្នុងឆ្នាំ ២០២១។
ការធ្លាក់ចុះនេះ បណ្តាលមកពីកត្តារួមផ្សំជាច្រើន ប៉ុន្តែភាពតានតឹងរវាងមហាអំណាចសេដ្ឋកិច្ចលេខ១និងលេខ២ ចិន-អាមេរិកលើវិស័យពាណិជ្ជកម្មនិងបច្ចេកវិទ្យា ជាកត្តាចំណងជាងគេ ដែលជះឥទ្ធិលដល់ការវិនិយោគរបស់ក្រុមហ៊ុនបរទេសក្នុងទឹកដីចិន ពិសេសធ្វើឲ្យក្រុមហ៊ុនរបស់តៃវ៉ាន់ចាកចេញពីចិនដីគោក។ ក្រៅពីនោះ នៅមានកត្តារួមចំណែកជាច្រើនទៀត ដូចជាការកើនឡើងថ្លៃកម្លាំងពលកម្មនៅចិន គួបផ្សំនឹងការរិតបណ្តឹងជាងមុននូវនិតិវិធីច្បាប់នានា។
អត្ថបទគួរអាន
ជាលទ្ធផលគួរឲ្យកត់សម្គាល់ ក្រុមហ៊ុនតៃវ៉ាន់បានចាកចេញពីចិនដីគោក ដោយបង្វែរទិសដៅវិនិយោគភាគច្រើនទៅកាន់សហរដ្ឋអាមេរិកតែម្តង ហើយក្នុងនោះមានក្រុមហ៊ុនតិចតួចប៉ុណ្ណោះបានចូលទៅបណ្តាក់ទុនក្នុងប្រទេសជប៉ុន។ ប្រការនេះបានធ្វើឲ្យជប៉ុនមិនសប្បាយចិត្តនោះទេ ក្នុងនាមជប៉ុនជាប្រទេសស្ថិតនៅក្បែរខាងតៃវ៉ាន់ ហើយតែងតែមានទំនាក់ទំនងល្អជាមួយតៃវ៉ាន់រហូតមក។ ផ្ទុយទៅវិញ ផលប្រយោជន៍វិនិយោគទាំងនេះបានធ្លាក់ទៅលើសហរដ្ឋអាមេរិក ដោយបានក្លាយខ្លួនជាទិសដៅវិនិយោគថ្មីមួយ ពីក្រុមហ៊ុនបច្ចេកវិទ្យាធំៗរបស់តៃវ៉ាន់។
ជាក់ស្តែងបើតាមរបាយការណ៍ដដែលពីក្រសួងសេដ្ឋកិច្ចតៃវ៉ាន់ សហរដ្ឋអាមេរិកបានឡើងមកឈរនៅលំដាប់ទី២ក្នុងកំពូលតារាងទិសដៅវិនិយោគរបស់តៃវ៉ាន់ ដោយមានចំណែកទីផ្សារពីអត្រា ៤%កាលពីឆ្នាំ២០១១ កើនឡើងដល់ ២៤%ក្នុងឆ្នាំ ២០២១នេះ។
ដោយឡែក ប្រទេសនៅអាស៊ានឈរនៅលំដាប់ទី៣ មានចំណែកទីផ្សារវិនិយោគរបស់តៃវ៉ាន់ចំនួន ១៥% អឺរ៉ុបនៅលំដាប់ទី៤ មានជិត ៨% ខណៈជប៉ុនមានមិនដល់១%ផង។
សូមជម្រាបថា វាមានកត្តា៣យ៉ាងសំខាន់ៗដែលធ្វើឲ្យតៃវ៉ាន់ជ្រើសយកអាមេរិក និងប្រទេសតំបន់អាស៊ាន តែមិនមែនជប៉ុន គឺដោយសារតែទី១ អាមេរិកជាប្រទេសមានស្ថាប័នរឹងមាំ មានការការពារផ្នែកច្បាប់ច្បាស់លាស់និងមិនមានអំពើពុករលួយ ទី២ជប៉ុនជ្រើសយកប្រទេសនៅតំបន់អាស៊ានដោយសារប្រទេសទាំងនេះ មានថ្លៃកំលាំងពលកម្មថោក រីឯចុងក្រោយ ក្រុមហ៊ុនបច្ចេកវិទ្យាធំៗរបស់តៃវ៉ាន់មិនជ្រើសយកជប៉ុន គឺដោយសារជប៉ុនក៏ជាប្រទេសដែលមានបច្ចេកវិទ្យាជឿនលឿនខ្លាំងរួចទៅហើយ ជាហេតុធ្វើឲ្យពិបាកក្នុងការប្រកួតប្រជែងទីផ្សារ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
