អ្នកជំនាញក្នុងវិស័យយានយន្តជឿជាក់ថា ចង់ឬមិនចង់ទំនោរប្រើប្រាស់រថយន្តដើរដោយថាមពលអគ្គិសនីនៅកម្ពុជានឹងមានការរីកចម្រើនខ្លាំងនាពេលអនាគតដ៏ខ្លី បន្ទាប់ពីហេដ្ឋារចនាសម្ព័ន្ធបម្រើឲ្យវិស័យនេះមានកាន់តែច្រើន និងទូលំទូលាយជាងមុន។
ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានលើកឡើងក្នុងជំនួបជាមួយប្រតិភូសហព័ន្ធឧស្សាហកម្មយានយន្តកម្ពុជាថា រាជរដ្ឋាភិបាលកម្ពុជាបាននិងកំពុងរៀបចំគោលនយោបាយគាំទ្រសម្រាប់រថយន្តប្រើប្រាស់ថាមពលអគ្គិសនីដើម្បីចូលរួមកាត់បន្ថយការបញ្ចេញឧស្ម័នពុលក្នុងបរិយាកាស។ ឯកឧត្តមអះអាងថា រាជរដ្ឋាភិបាលកម្ពុជាបើកចំហរទូលំទូលាយសម្រាប់វិនិយោគិនក្នុងស្រុក និងក្រៅស្រុកចំពោះការវិនិយោគអភិវឌ្ឍន៍ហេដ្ឋារចនាសម្ព័ន្ធក្នុងការដំណើរការរថយន្តដើរដោយថាមពលអគ្គិសនីនៅកម្ពុជា។
ទន្ទឹមនឹងនេះ ឯកឧត្តម ស៊ុន ចាន់ថុន ក៏បានបង្ហាញពីគម្រោងសាងសង់ស្ថានីយសាកថ្មរថយន្តអគ្គិសនីជាច្រើនកន្លែងនៅរាជធានីភ្នំពេញ និងតាមបណ្តាខេត្តមួយចំនួន ក្រោមការសហការជាមួយអង្គការអន្តរជាតិ UNDP និងវិស័យជននានាផងដែរ។ ក្នុងនោះក្រោមការសហការជាមួយ UNDP ក្រសួងគ្រោងសាងសង់ស្ថានីយសាកថ្មី៥ទីតាំងនៅទីស្នាក់ការក្រសួង និងតាមបណ្តាខេត្តមួយចំនួន, ដំឡើងស្ថានីយសាកថ្មនៅតាមផ្លូវល្បឿនភ្នំពេញ-ព្រះសីហនុក្រោមការសហការជាមួយស្ថានីយប្រេងឥន្ធនៈ PTT និងគ្រោងដំឡើងស្ថានីយសាកថ្ម១០ទីតាំងនៅរាជធានីភ្នំពេញក្រោមការសហការជាមួយវិស័យឯកជនផងដែរ។
អត្ថបទគួរអាន
ជុំវិញការជំរុញការប្រើប្រាស់រថយន្តអគ្គិសនីនេះដែរ បណ្ឌិត តាន់ មុនីវណ្ណ ប្រធានសហព័ន្ធឧស្សាហកម្មយានយន្តកម្ពុជាបានបង្ហាញជំនឿយ៉ាងមុតមាំថា ចំនួនអ្នកប្រើប្រាស់រថយន្តដើរដោយថាមពលអគ្គិសនីនៅកម្ពុជានឹងមានការកើនឡើងខ្ពស់ ដូចទៅនឹងការនិយមប្រើប្រាស់ឡានលេខអូតូជំនួសឲ្យឡានលេខដៃនាពេលបច្ចុប្បន្នដែរ។ ការបង្ហាញជំនឿបែបនេះ ដោយសារឯកឧត្តមយល់ថា ការប្រើប្រាស់រថយន្តដើរដោយថាមពលអគ្គិសនីវាជួយកាត់បន្ថយការចំណាយ និងចូលរួមការពារបរិស្ថាន។
ជាមួយគ្នានេះ ថ្នាក់ដឹកនាំសហព័ន្ធឧស្សាហកម្មយានយន្តកម្ពុជា ស្នើឲ្យក្រសួងសាធារណការ និងដឹកជញ្ជូនជួយពិនិត្យ និងសម្របសម្រួលលើការងារបច្ចេកទេសពាក់ព័ន្ធនឹងការដំឡើងឧបករណ៍ស្តង់ដារួម ដែលអាចឲ្យរថយន្តដើរដោយថាមពលអគ្គិសនីគ្រប់ប្រភេទដោតសាកថ្ម EVs នៅតាមស្ថានីយសាកថ្មណាមួយក៏បាននិងស្នើឱ្យមានគោលនយោបាយសម្រាប់រថយន្តដើរដោយថាមពលអគ្គិសនីផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
