ក្នុងឱកាសសម្ពោធជាផ្លូវការក្រុមហ៊ុន MR Training & Job Center អ្នកឧកញ៉ាសៀ ឬទ្ធី បានបញ្ជាក់ថា ខុសប្លែកពីក្រុមហ៊ុន ឬទីភ្នាក់ងារជ្រើសរើសបុគ្គលិកដទៃទៀត ក្រុមហ៊ុន អិមអ ត្រេនីង &យ៉ប សេនធ័រ មិនត្រឹមតែរកការងារឲ្យយុវជន និងរកបុគ្គលិកជូនស្ថាប័នឯកជនប៉ុណ្ណោះទេ ប៉ុន្តែក្រុមហ៊ុននឹងយកយុវជន ពិសេសយុវជនដែលទើបបញ្ចប់ការសិក្សាមកបណ្តុះបណ្តាល បំប៉ន់បន្ថែមលើជំនាញវិជ្ជាជីវៈ ឲ្យបានត្រឹមត្រូវជាមុន ទើបបញ្ជូនពួកគាត់ឱ្យទៅធ្វើការនៅតាមស្ថាប័នឯកជន ដែលត្រូវទៅតាមជំនាញរៀងៗខ្លួន។
បើតាមអ្នកឧកញ៉ាមើលឃើញថា យុវជនដែលកំពុងស្វែងរកការងារបច្ចុប្បន្ន ភាគច្រើនស្វែងការងារ ដែលខុសពីជំនាញរបស់ខ្លួន។ ដូច្នេះហើយ គេត្រូវចាំបាច់បង្ហាត់បង្រៀនជំនាញយុវជនឲ្យត្រូវតាមការងារជាមុនសិន។ អ្នកឧកញ៉ាបន្ថែមថា យុវជននឹងបានស្វែងយល់ពីខ្លួនឯងបានកាន់តែច្បាស់ថែមទៀត មុននឹងសម្រេចចូលទៅប្រកបការងារ។
ឧកញ៉ាសៀ ឫទ្ធីលើកឡើងថា យុវជនគួរត្រៀមលក្ខណៈឱ្យបានល្អ បើកចិត្តឱ្យបានទូលាយ ដើម្បីមកទទួលយកឱកាសទាំងនេះពីក្រុមហ៊ុន ពិសេសឱកាសការងារដែលកំពុងមាននៅលើទីផ្សារនាពេលបច្ចុប្បន្ន។
អត្ថបទគួរអាន
ដោយឡែក លោកជំទាវ យឹម ឆៃលីន ប្រធានក្រុមប្រឹក្សាប្រតិបត្តិ នៃក្រុមហ៊ុន MR Training & Jobs Center បានគូសបញ្ជាក់ថា ក្រុមហ៊ុននឹងដើរតួនាទីក្នងការផ្សាភ្ជាប់យុវជនដែលមានចំណេះជំនាញ សមត្ថភាពវិជ្ជាជីវៈ ទៅនឹងទីផ្សារការងារដ៏សម្បូរបែបនាពេលបច្ចុប្បន្នតាមរយៈការផ្តល់ការបណ្តុះបណ្តាលតម្រង់ទិស និងការប្រឹក្សាការងារដល់យុវជន ជាពិសេសនិស្សិត ដែលទើបតែបញ្ចប់ការសិក្សាពីគ្រឹះស្ថានសិក្សានានា ដើម្បីឲ្យពួកគេទទួលបានចំណេះដឹងជាមូលដ្ឋានក្នុងការឈានទៅប្រកបអាជីពនាពេលអនាគត។
សូមជម្រាបថា ក្រុមហ៊ុន អិមអ ត្រេនីង &យ៉ប សេនធ័រ ត្រូវបានបង្កើតឡើងដើម្បីឆ្លើយតបទៅនឹងតម្រូវការជាក់ស្តែងនៃស្ថានភាពទីផ្សារការងារបច្ចុប្បន្ន ដែលស្ថិតក្នុងយុគសម័យឌីជីថល ក៏ដូចជាក្នុងបរិបទនៃបដិវត្តឧស្សាហកម្មជំនាន់ទី៤ ដែលក្រុមហ៊ុនសហគ្រាស និងនិយោជកនានា កំពុងជួបប្រទះនូវបញ្ហាប្រឈមក្នុងការស្វែងរកបុគ្គលិក ដែលមានចំណេះជំនាញសមស្របឲ្យបំពេញការងារនៅតាមស្ថាប័ន សហគ្រាសរបស់ខ្លួន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
