នៅក្នុងរូបភាពជាច្រើនសន្លឹកដែលផ្សាយដោយ រ៉យទ័រ ហាក់បង្ហាញពីសកម្មភាពរបស់អតីតអ្នកតវ៉ាប្រឆាំងរដ្ឋប្រហារនៅភូមា កំពុងទទួលការហ្វឹកហ្វឺនពីកងទ័ពជនជាតិភាគតិច នៅក្នុងទឹកដីភូមា ដែលនេះជាសញ្ញានៃវិបត្តិដែលកាន់តែផុងជ្រៅៗនៅក្នុងប្រទេសមួយដែលមានប្រជាជន ៥៣លាននាក់ ។
ស្ថាបនិកក្រុម ឈ្មោះ មនមន បាននិយាយថា កម្លាំងការពាររួបរួម (United Defense Force) របស់នាង មានសមាសភាពជាអ្នកតវ៉ាប្រឆាំងនឹងរដ្ឋប្រហារថ្ងៃទី១ ខែកុម្ភៈ ដែលបានរត់ភៀសខ្លួនពីការបង្ក្រាប ពីសំណាក់កម្លាំងសន្តិសុខរបស់របបយោធា ដែលបានសម្លាប់ផ្ដាច់ផ្ដិលជីវិតអ្នកតវ៉ារាប់រយនាក់ ។
អត្ថបទទាក់ទង
នាង មនមន បានប្រាប់ឲ្យដឹងថា ក្រុមរបស់នាង ដែលភាគច្រើនជានិស្សិតវ័យម្ភៃឆ្នាំប្លាយ និងខ្លះជាមនុស្សចាស់អាយុ ៣៥ឆ្នាំទៅ ៤០ឆ្នាំ បាននៅហ្វឹកហាត់ទាហានជាមួយកងទ័ពជនជាតិភាគតិចរយៈពេល ៣ខែហើយ ហើយគោលដៅតែមួយគត់របស់ពួកគេ គឺ បដិវត្តន៍ ។
នាង មនមន បាននិយាយថា ក្រុមដែលកំពុងហ្វឹកហ្វឺនសព្វថ្ងៃមានគ្នាប្រហែល ២៥០នាក់ ក្នុងនោះមាននារី ២០នាក់ ប៉ុន្តែថា ក្រុមរបស់នាងមានគ្នាប្រហែល ១០០០នាក់ នៅក្នុងប្រទេសភូមា ។
នាងថា ការហ្វឹកហ្វឺនបាននិងកំពុងប្រព្រឹត្តទៅនៅក្នុងតំបន់មួយដែលកាន់កាប់ដោយសហភាពជាតិការ៉ែន (KNU) ដែលជាអង្គការប្រដាប់អាវុធជនជាតិភាគតិចមួយ ដែលប្រយុទ្ធប្រឆាំងនឹងរបបគ្រប់គ្រងភូមាដើម្បីស្វែងរកស្វ័យភាព ។
ខាងកងទ័ពនៃរបបយោធាភូមាពុំបានឆ្លើយតបសំណើសុំអត្ថាធិប្បាយពីទីភ្នាក់ងារព័ត៌មាន រ៉យទ័រ ទេ ហើយដោយឡែក ខាងភាគ KNU ក៏មិនបានច្រានចោលការអះអាងអំពីការហ្វឹកហ្វឺនខាងលើនេះដែរ ៕
