ប្រធានាធិបតីរុស្ស៊ីលោក វ្ល៉ាឌីមៀ ពូទីន បានដាក់ចេញនូវកញ្ចប់វិធានការសេដ្ឋកិច្ចកាលពីថ្ងៃទី ៣ ឧសភា ដើម្បីជាការត្រៀមខ្លួនសងសឹកប្រឆាំងនឹងទណ្ឌកម្មអន្តរជាតិ ដែលលោកខាងលិចបានដាក់ទៅលើទីក្រុងម៉ូស្គូ ។
វិធានការថ្មីដែលត្រូវបានចេញផ្សាយនៅលើគេហទំព័ររបស់វិមានក្រឹមឡាំងនេះគឺ«ពាក់ព័ន្ធនឹងសកម្មភាពមិនរាក់ទាក់របស់សហរដ្ឋអាមេរិក និងសម្ព័ន្ធមិត្តរបស់អាមេរិក ដែលបំពានច្បាប់អន្តរជាតិ និងមានបំណងដកហូតទ្រព្យសម្បត្តិរបស់សហព័ន្ធរុស្ស៊ី និងនីតិបុគ្គលរុស្ស៊ីដោយខុសច្បាប់»។
ឥឡូវនេះគណៈរដ្ឋមន្ត្រីរុស្ស៊ីមានពេល ១០ ថ្ងៃក្នុងការកំណត់ថា តើបុគ្គល និង ស្ថាប័នណាខ្លះរបស់លោកខាងលិច ដែលនឹងត្រូវដាក់ចូលក្នុងបញ្ជីទណ្ឌកម្មរបស់រុស្ស៊ី។
វិធានការថ្មីនេះ គឺរុស្ស៊ីនឹងហាមឃាត់ភ្នាក់ងាររដ្ឋាភិបាល អង្គការ និងបុគ្គលនៅក្នុងប្រទេសរុស្ស៊ីមិនឱ្យធ្វើការ«ប្រតិបត្តិការ (រួមទាំងការចុះហត្ថលេខាលើកិច្ចសន្យាពាណិជ្ជកម្មខាងក្រៅ) ជាមួយនីតិបុគ្គល បុគ្គល និងអង្គការនានា» ដែលបានស្ថិតនៅក្នុងបញ្ជីខ្មៅថ្មីរបស់រុស្ស៊ី ។
ចំណាត់ការថ្មីនេះ ក៏នឹងហាមឃាត់ការនាំចេញផលិតផល និងវត្ថុធាតុដើមផងដែរ ប្រសិនបើពួកគេត្រូវកំណត់ចំពោះបុគ្គលដែលត្រូវរងទណ្ឌកម្ម។
ទីភ្នាក់ងារសារព័ត៌មានរុស្ស៊ី Tass បានរាយការណ៍ថា ក្រសួងហិរញ្ញវត្ថុរបស់រុស្ស៊ី និងធនាគារកណ្តាលរបស់រុស្ស៊ីនឹង«មានសិទ្ធិផ្តល់ការបំភ្លឺជាផ្លូវការលើការអនុវត្តក្រឹត្យ ឬវិធានការថ្មីនេះ»។
អត្ថបទគួរអាន
ការគំរាមកំហែងដាក់ទណ្ឌកម្មរបស់រុស្ស៊ីទៅលើលោកខាងលិចនេះ បានកើតឡើងស្របពេលសហភាពអឺរ៉ុបបានព្រមានសមាជិករបស់ខ្លួន មិនឱ្យចំណាយប្រាក់សម្រាប់ការទូទាត់ថ្លៃឧស្ម័នរុស្ស៊ីជាប្រាក់រូប្ល តាមការទាមទាររបស់វិមានក្រឹមឡាំងនោះឡើយ។
វិធានការថ្មីនេះក៏បានកើតឡើងផងដែរ ក្រោយពេលមួយថ្ងៃបន្ទាប់ពីសហភាពអឺរ៉ុបបានក្រើនរំលឹកដល់សមាជិករបស់ខ្លួនឱ្យត្រៀមលក្ខណៈ ដើម្បីទប់ទល់ជាមួយប្រទេសរុស្ស៊ី ដែលនឹងផ្តាច់ការផ្ដត់ផ្គង់ឧស្ម័នដល់បណ្តាប្រទេសសហភាពអឺរ៉ុបទាំងអស់ ដើម្បីផ្ចាញ់តបចំពោះការបដិសេធរបស់ប្លុកនេះ ក្នុងការបង់ប្រាក់ជាប្រាក់រូប្ល ហើយជាក់ស្ដែងកាលពីសប្តាហ៍មុន រុស្ស៊ីបានកាត់ផ្តាច់ការផ្គត់ផ្គង់ឧស្ម័នដល់ប្រទេសប៉ូឡូញ និងប៊ុលហ្គារីរួចទៅហើយ។
ការគំរាមកំហែង សងសឹករបស់រុស្ស៊ីនេះ កំពុងតែកើនឡើងយ៉ាងខ្លាំងនៅមុនពេលឆ្ពោះទៅរក ថ្ងៃទី០៩ ខែឧសភា ដែលជាការប្រារព្ធទិវាជ័យជម្នះរបស់រុស្ស៊ី ជាថ្ងៃមួយដែលក្រុមអ្នកសង្កេតការណ៍រំពឹងថាលោក ពូទីន សង្ឃឹមថា នឹងអាចបង្ហាញពីជ័យជម្នះដ៏សំខាន់មួយនៅក្នុងសង្គ្រាមនៅប្រទេសអ៊ុយក្រែន ឬក៏ទៅលើក្រុមប្រទេសបស្ចិមលោក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
