ការដាក់ចេញនូវវិធានការរឹតបន្ដឹងនេះ គឺធ្វើឡើងនៅក្រោយពេលដែលករណីឆ្លងរីករាលដាលអូមីក្រុងកំពុងកើនឡើងកាន់តែច្រើននៅប៉ុន្មានថ្ងៃចុងក្រោយនេះ ជាក់ស្ដែង តួលេខពីក្រសួងសុខាភិបាលនៅថ្ងៃទី ១០ កុម្ភៈនេះ បង្ហាញថា មានករណីឆ្លងថ្មី ២៦២នាក់បន្ថែម ដែលសុទ្ធសឹងជាប្រភេទអូមីក្រុងទាំងអស់។
រដ្ឋបាលរាជធានីភ្នំពេញបានសង្កេតឃើញថា ស្ថានភាពវិវត្តន៍នៃមេរោគបំប្លែងថ្មី អូមីក្រុង ក្នុងសហគមន៍ បាននិងកំពុងតែរីករាលដាលរហូតដល់តួលេខបីខ្ទង់ ដែលប្រការនេះគួរឱ្យមានការព្រួយបារម្ភយ៉ាងខ្លាំង។ ដើម្បីចៀសវាងនូវសោកនាដកម្មនៃការឆ្លងរាលដាលធ្ងន់ធ្ងរទៅក្នុងសហគមន៍ជាលក្ខណៈទ្រង់ទ្រាយធំ រដ្ឋបាលរាជធានីភ្នំពេញ បានក្រើនរំលឹកដល់រដ្ឋបាលខណ្ឌទាំង១៤ មន្ទីរអង្គភាពពាក់ព័ន្ធទាំងអស់ក្នុងរាជធានីភ្នំពេញេធ្វើការណែនាំក្នុងការអនុវត្តវិធានការសុខាភិបាលឲ្យបានខ្ជាប់ខ្ជួន។
ក្នុងនោះដែរ ចំពោះទីតាំងដែលប្រមូលផ្តុំមនុស្សច្រើនដូចជា កន្លែងរៀបចំពិធីមង្គលការ ភោជនីយដ្ឋាន ពិធីបុណ្យទាន កន្លែងកម្សាន្ត និងការជួបជុំ ប្រមូលផ្តុំផ្សេងៗដែលមានមនុស្សច្រើន ត្រូវណែនាំឱ្យរៀបចំកៅអីអង្គុយមានគម្លាតសុវត្ថិភាព ដោយមិនឱ្យលើសពី០៧នាក់ក្នុងមួយតុ និងត្រូវប្រកាន់ខ្ជាប់នូវវិធានការសុខាភិបាលក្នុងការទប់ស្កាត់ការឆ្លងរីករាលដាលនៃជំងឺកូវីដ-១៩ ដូចជាបាញ់អាល់កុលឬ ជែលលាងដៃ វាស់កំដៅ រក្សាគម្លាតសុវត្ថិភាព និងពាក់ម៉ាស ហើយការដោនម៉ាសចេញក្នុងអំឡុងពេលទទួលទានអាហារ ត្រូវទុកដាក់ឱ្យបានត្រឹមត្រូវ និងត្រូវពាក់ម៉ាសវិញនៅពេលងើបចេញពីតុ។
អត្ថបទគួរអាន
ទន្ទឹមនេះ រដ្ឋបាលរាជធានីភ្នំពេញបានក្រើនរំលឹកពលរដ្ឋទាំងអស់ត្រូវទៅចាក់វ៉ាក់សាំងបង្ការជំងឺកូវីដ-១៩ ទាំងដូសមូលដ្ឋាន និង ដូសជំរុញ ឱ្យបានគ្រប់ៗគ្នា ដើម្បីបង្កើនភាពរឹងមាំក្នុងសហគមន៍ និងចៀសវាងនូវមហន្តរាយសុខភាពសាធារណៈ ដែលធ្វើឱ្យប៉ះពាល់ដល់សេដ្ឋកិច្ចគ្រួសារ និងសេដ្ឋកិច្ចសង្គម។
សូមបញ្ជាក់ថា បច្ចុប្បន្នកម្ពុជាមានករណីឆ្លងកូវីដ១៩សរុបកើនដល់ ជាង២ម៉ឺននាក់ហើយ ដោយក្នុងនោះ ករណីអូមីក្រុងឆ្លងចូលសហគមន៍មានជាង១ពាន់៤រយនាក់ហើយ ខណៈដែលប៉ុន្មានថ្ងៃចុងក្រោយនេះ កម្ពុជារកឃើញអ្នកឆ្លងអូមីក្រុងជាង២០០នាក់ក្នុងមួយថ្ងៃ ដែលជាករណីឆ្លងច្រើនបំផុតមិនធ្លាប់មានគិតតាំងពីដើមខែវិច្ឆកាឆ្នាំមុនមក៕
អត្ថបទ សោម ស្រីពេជ្រ
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
