ខណៈរយៈពេលជាង ១ខែ កន្លងមកនេះ មានរថយន្តអត់ពន្ធ ១៥០គ្រឿង បានបង់ពន្ធ ដែលគិតជាទឹកប្រាក់ប្រមាណ ២.៤លានដុល្លារអាមេរិក។ ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកនៃអគ្គនាយកដ្ឋានគយនិងរដ្ឋាករកម្ពុជា បានបញ្ជាក់ប្រាប់សារព័ត៌មានខេមបូណូមីស នៅថ្ងៃនេះថា គោលបំណងសំខាន់ ក្នុងការបញ្ចុះពន្ធលើរថយន្តគ្មានពន្ធនាពេលនេះ គឺដើម្បីសម្រួលបន្ទុកដល់ម្ចាស់យានយន្ត ដែលគ្មានពន្ធ។
ឯកឧត្តម គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយក នៃ អគ្គនាយកដ្ឋានគយ និងរដ្ឋាករ កម្ពុជា បានបញ្ជាក់ប្រាប់សារព័ត៌មាន ខេមបូណូមីស តាមប្រព័ន្ធតេឡេក្រាមថា ការសម្រេចបញ្ចុះពន្ធនេះ ដោយសារតែ អគ្គនាយកដ្ឋាន គយ ពិនិត្យឃើញមានរថយន្ត មួយចំនួន ជាពិសេសប្រភេទ ដែលមានឆ្នាំម៉ូដែល ក្រោមឆ្នាំ២០១៦មានសភាពចាស់ហើយ ម្ចាស់មានបញ្ហាលំបាកផ្នែកហិរញ្ញវត្ថុក្នុងការបំពេញកាតព្វកិច្ចពន្ធ និងអាករ និងដើម្បីជំរុញឲ្យដំណើរការបង់ពន្ធអាករលើរថយន្តមានស្រាប់ក្នុងប្រទេសកាន់តែមានភាពរលូន ប្រកបដោយសមធម៌ ។ ឯកឧត្តមបណ្ឌិត គុណ ញឹម បានសង្កត់ធ្ងន់ថា គោលបំណងសំខាន់ ក្នុងការបញ្ចុះពន្ធលើរថយន្តគ្មានពន្ធនាពេលនេះ គឺដើម្បីសម្រួលបន្ទុកដល់ម្ចាស់យានយន្ត ដែលគ្មានពន្ធ។
អត្ថបទគួរអាន
អគ្គនាយកដ្ឋានគយ និងរដ្ឋាករ បានបែងចែកការបង់ពន្ធ លើម៉ូដែលយានយន្តនីមួយៗ។ ចំពោះ រថយន្តចង្កូតស្តាំ គ្មានពន្ធ និងអាករនាំចូលមានស្រាប់ ក្នុងប្រទេសកម្ពុជា ត្រូវបន្ធូរបន្ថយតម្លៃគិតពន្ធគយ លើតម្លៃរថយន្តចង្កូតឆ្វេងតាមឆ្នាំម៉ូដែល ៣ ប្រភេទ។ ក្នុងនោះ ឆ្នាំម៉ូដែល ចាប់ពីឆ្នាំ ២០១៥ បញ្ចុះអត្រាពន្ធ ២០% ។ ចំណែក ឆ្នាំម៉ូដែល ចាប់ពីឆ្នាំ២០១៦ ដល់ ឆ្នាំ២០១៨ បន្ថយ១៥%។ រីឯ ឆ្នាំម៉ូដែលចាប់ពីឆ្នាំ ២០១៩ ដល់ ឆ្នាំ ២០២០ បន្ថយ ១០% ។
សូមបញ្ជាក់ថា ចាប់ពីអគ្គនាយកដ្ឋានគយ និងរដ្ឋាករ កម្ពុជា បើកយុទ្ធនាការប្រមូលពន្ធលើយានយន្តគ្មានពន្ធទាំងចង្កូតឆ្វេង និងចង្កូចស្ដាំ ចាប់ពីថ្ងៃទី២ ខែកញ្ញាមក មានរថយន្តគ្មានពន្ធចំនួន ១៥០គ្រឿងបានចូលទៅបង់ពន្ធ ដែលទទួលបានចំណូលជាង ២,៤លានដុល្លារ។ នេះបើតាមការបញ្ជាក់របស់ឯកឧត្តម គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គនាយកដ្ឋានគយនិងរដ្ឋាករ កម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
