នៅពេលនិយាយដល់ឈ្មោះដំណាំលម៉ើ មនុស្សភាគច្រើនស្គាល់តែប្រភេទលម៉ើលឿង ប៉ុន្ដែ ក្រៅពីពូជលម៉ើលឿង នៅកម្ពុជាក៏មានដាំប្រភេទពូជលម៉ើក្រហមដែរហើយចំពោះទីផ្សាររបស់លម៉ើទាំងពីរប្រភេទនេះ ក៏មិនសូវចាញ់គ្នាប៉ុន្មានដែរ។
អ្នកស្រី កង សុជា ជាកសិករដាំលម៉ើក្រហមបានរៀបរាប់ប្រាប់ក្រុមការងារខេមបូណូមីសថា រូបគាត់បានប្រកបរបរដំណាំលម៉ើក្រហមនេះ រយៈពេល ៥ ឆ្នាំមកហើយ ដែលមានទីតាំងនៅក្នុងស្រុកសូទ្រនិគម ខេត្តសៀមរាប។
មូលហេតុដែលអ្នកស្រី កង សុជា ជ្រើសយកការដាំដុះដំណាំលម៉ើក្រហមនេះក៏ព្រោះដោយសារតែឃើញភាគច្រើនគេនិយមដាំលម៉ើលឿង។ មួយវិញទៀត ដោយសារតែអ្នកស្រីសង្កេតឃើញថា ទីផ្សារបច្ចប្បន្ននេះ លម៉ើក្រហមក៏មានតម្លៃមិនចាញ់លម៉ើលឿងប៉ុន្មានដែរ ដោយលម៉ើក្រហមនេះ គឺសម្រាប់តែផ្គត់ផ្គងទីផ្សារនៅក្នុងស្រុកប៉ុណ្ណោះ ហើយតម្លៃរបស់វាមានចន្លោះពី៤ម៉ឺន ទៅ៥ម៉ឺនរៀល ក្នុងមួយគីឡូក្រាម។
អត្ថបទទាក់ទង
បើទោះបីជាទីផ្សារនៃលម៉ើក្រហមកំពុងតែមានទីផ្សារក៏ដោយ ប៉ុន្ដែ កសិករបានអះអាងថា សម្រាប់ការផ្គត់ផ្គង់លម៉ើ និងការដាំដុះក៏នៅជួបបញ្ហាមួយចំនួនផងដែរ ពិសេស ការរើសពូជលម៉ើមកដាំខុស ដោយសារតែដាំចំលម៉ើឈ្មោល។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ក៏បានប្រាប់ក្រុមការងារខេមបូណូមីស ដែរថា បច្ចុប្បន្នការដាំដុះលម៉ើក្រហមកំពុងមានសន្ទុះកើនឡើងជាងមុន ដ្បិតថា វាមានទីផ្សារល្អ និងតម្លៃថ្លៃ។
លោកបានបន្ថែមទៀត ប្រសិនបើដំណាំលម៉ើនេះ មានទីផ្សារកាន់តែល្អប្រសើរទៅមុខទៀតនោះខាងក្រសួងនឹងមានការចុះមកបង្ហាត់បង្រៀនបន្ថែមទៅដល់ជូនប្រជាជនបន្ថែម ទាក់ទងនឹងបច្ចេកទេសនានា។
គួរបញ្ជាក់ផងដែរថា បើទោះបីជាទីផ្សារលម៉ើនៅពេលនេះ កំពុងតែមានការគាំទ្រក៏ពិតមែន ប៉ុន្ដែដំណាំឈើហូបផ្លែមួយនេះ នៅតែមិនទាត់អាចចាត់ចូលទៅក្នុងចំណោមប្រភេទដំណាំកសិឧស្សាហកម្មជួរមុខនៅឡើយទេ ដោយសារតែការដំណាំដុះដំណាំនេះនៅមានជាលក្ខណៈជាទ្រង់ទ្រាយតូចនៅឡើយ៕អត្ថបទ៖ ហួន ស្រីនីត
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
