ក្រុមហ៊ុនធំៗទាំង១០ ដែលបាននាំអង្ករចេញច្រើនជាងគេ ក្នុងរយៈពេល៥ឆ្នាំចុងក្រោយនេះ រួមមាន៖
- ១, ក្រុមហ៊ុន Khmer Food Group នាំចេញបាន ២៤៣៣៧១ តោន
- ២, ក្រុមហ៊ុន Amru Rice (Cambodia) នាំចេញបាន ២៣២២៤៤ តោន
- ៣, ក្រុមហ៊ុន Baitang (Kampuchea) នាំចេញបាន ១៩៧៩៤១ តោន
- ៤, ក្រុមហ៊ុន Golden Rice (Cambodia) នាំចេញបាន ១៨៧១១១ តោន
- ៥, ក្រុមហ៊ុន Cristal Rice (Kampuchea) នាំចេញបាន ១៤៧០៣២ តោន
- ៦, ក្រុមហ៊ុន International Rice trading (Cambodia) នាំចេញបាន ១២៤១៩០ តោន
- ៧, ក្រុមហ៊ុន City Rice Import Export នាំចេញបាន ១០៥៧៩១ តោន
- ៨, ក្រុមហ៊ុន Nicoline Investment នាំចេញបាន ៨៩៣១០ តោន
- ៩, ក្រុមហ៊ុន TOT (Trust Our Trade) នាំចេញបាន ៨៧៣៨៤ តោន
- ១០, ក្រុមហ៊ុន Apsara Raice (Cambodia) នាំចេញបាន ៧១៨៥១ តោន។
តើអ្នកបានអានអត្ថបទនេះ ឬនៅ?
លោកឧកញ៉ា សុង សារ៉ន អគ្គនាយកក្រុមហ៊ុន Amru Rice ដែលបានជាប់ជាលំដាប់ក្រុមហ៊ុននាំចេញអង្ករធំជាងគេទី២ បន្ទាប់ពីក្រុមហ៊ុន Khmer Food Group បានលើកឡើងថា មានកត្តាសំខាន់ៗមួយចំនួន ដែលបានជំរុញឲ្យកំណើននៃការនាំចេញអង្កររបស់កម្ពុជាមានការកើនឡើងជារៀងរាល់ឆ្នាំ គឺទី១ ដោយសារមានការដាក់ចេញនូវគោលនយោបាយជាក់លាក់ពីរាជរដ្ឋាភិបាល។
កត្តាទី២ គឺទីផ្សារពិភពលោកចាប់ផ្ដើមចាប់អារម្មណ៍កាន់តែខ្លាំងឡើងៗ ពីគុណភាពអង្កររបស់កម្ពុជា ដែលអាចជំនួសឲ្យអង្កររបស់ថៃបាន។ កត្តាទី៣ គឺការអនុគ្រោះពន្ធ ពីបណ្ដាប្រទេសនៃសហគមអឺរ៉ុប ក៏ដូចជាប្រទេសមហាមិត្តចិន ដែលបានផ្ដល់នូវកូតាទិញអង្ករកម្ពុជាជាបន្តបន្ទាប់។ និងកត្តាទី៤ គឺការចូលរួមចំណែកខិតខំប្រឹងប្រែងរបស់ក្រុមហ៊ុនអ្នកនាំចេញអង្ករទាំងអស់ ពិសេស គឺការធ្វើការងារយ៉ាងសកម្មរបស់កសិករ ដើម្បីផលិតអង្ករទៅតាមតម្រូវការទីផ្សារ។
យ៉ាងណាក៏ដោយចុះ មហិច្ឆតារបស់រាជរដ្ឋាភិបាលក្នុងការនាំចេញអង្ករឲ្យបាន ១លានតោនក្នុងមួយឆ្នាំ ដែលបានប្រកាសឡើងតាំងពីប៉ុន្មានឆ្នាំមុននោះ មកទល់នឹងពេលនេះ នៅតែមិនទាន់បានសម្រេចគោលដៅនៅឡើយ តួយ៉ាង នៅឆ្នាំ២០១៧នេះ កម្ពុជាបាននាំចេញអង្ករទៅកាន់ទីផ្សារបរទេសមានប្រមាណជាង ៦៣ម៉ឺនតោនប៉ុណ្ណោះ។
តើអ្នកបានអានអត្ថបទនេះឬនៅ?
ជុំវិញនឹងបញ្ហានេះ លោកឧកញ៉ា សុង សារ៉ន បានគូសបញ្ជាក់ដែរថា បើពិនិត្យមើលរបាយការណ៍នាំចេញអង្ករផ្លូវការ ពិតណាស់ គឺកម្ពុជានៅតែមិនទាន់គ្រប់គោលដៅនាំចេញ១លានតោនក្នុងមួយឆ្នាំមែន ប៉ុន្ដែ បើគិតរួមបញ្ចូលទាំងការនាំចេញមិនផ្លូវការ កម្ពុជាបាននាំអង្ករចេញលើស ១លានតោនទៅទៀត។ ហើយបើតាមការអះអាងពីលោកឧកញ៉ា សុង សារ៉ន នៅប្រមាណតែ២ឆ្នាំទៀតប៉ុណ្ណោះ កម្ពុជាពិតជាអាចនាំចេញអង្ករផ្លូវការបានគ្រប់ ឬលើសគោលដៅ១លានតោនទៅទៀត។
លោកឧកញ៉ា ហ៊ុន ឡាក់ អនុប្រធានសហព័ន្ធស្រូវអង្ករកម្ពុជា បានលើកឡើងដែរថា វិស័យស្រូវអង្ករកម្ពុជា ចាំបាច់បំផុតត្រូវពង្រឹងបន្ថែមទៀត លើការផលិតតាមបែបបច្ចេកទេសទំនើប ទើបអាចមានភាពប្រកួតប្រជែងក្នុងផ្សារបានកាន់តែប្រសើរ ហើយបច្ចុប្បន្ន កម្ពុជាកំពុងស្ថិតនៅលើផ្លូវនេះហើយ។ លោកឧកញ៉ា បានគូសបញ្ជាក់ទៀតថា នៅឆ្នាំក្រោយៗនេះ ទីផ្សារអង្ករធំបំផុតរបស់កម្ពុជា នឹងត្រូវបង្វែរមុខព្រួញទៅអាស៊ីវិញម្ដង ពិសេសគឺប្រទេសចិន ខណៈដែលឆ្នាំ២០១៧នេះ ចិនបានបញ្ជាទិញអង្ករពីកម្ពុជាច្រើនជាងគេ។
ដោយឡែក ទីផ្សារអឺរ៉ុបដែលធ្លាប់ជាទីផ្សារនាំចេញអង្ករធំជាងគេនោះ អាចនឹងនៅមានកំណើនតិចតួច។ សូមជ្រាបដែរថា ការនាំអង្ករចេញពេញ១ខែមករា ឆ្នាំ២០១៨នេះ មានប្រមាណជាង ៦២ពាន់តោន ខណៈដែលការនាំចេញអង្ករពេញ១ឆ្នាំ២០១៧ កន្លងទៅ មានជាង ៦៣ម៉ឺនតោន ពោលគឺកើនឡើងជាង ១១ម៉ឺនតោន បើធៀបនឹងឆ្នាំ២០១៦៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
