តម្លៃប្រេងឆៅនៅអង់គ្លេស បានកើនឡើង១ដុល្លារ២០សេនបន្ថែមទៀតដែលនាំឲ្យតម្លៃប្រេងឆៅក្នុងមួយធុងបារ៉ែលថ្លៃដល់ទៅជាង៨៣ដុល្លារអាមេរិកទៅហើយគិតត្រឹមថ្ងៃចន្ទសប្ដាហ៍នេះ ខណៈដែលកាលពីសប្ដាហ៍មុននេះ តម្លៃប្រេងឆៅក៏បានហក់ឡើងដល់ទៅជិត៤% រួចហើយដែរ។ សម្រាប់ទីផ្សារប្រេងឆៅនៅអាមេរិកវិញ ក៏បានកើនឡើងជាង ១ដុល្លារ៥០សេន ផងដែរ ដែលរុញច្រានតម្លៃប្រេងឆៅអាមេរិកកើនឡើងដល់ទៅជាង ៨០ដុល្លារ៨៦សេនទៅហើយ ក្នុង១ធុងប៉ារ៉េល ពោលគឺសម្រាប់ទីផ្សារអាមេរិកតម្លៃនេះ គឺជាតម្លៃមួយខ្ពស់បំផុតមិនធ្លាប់មានគិតតាំងពីឆ្នាំ២០១៤មក។
តម្លៃប្រេងឆៅបន្ដកើនឡើងជាបន្ដបន្ទាប់ នៅគ្រាដែលចំនួនប្រជាជនដែលបានចាក់វ៉ាក់សាំងក៏មានការកើនឡើង ហើយប្រទេសជាច្រើនបានដកចេញពីវិធានការបិទខ្ទប់ ដែលប្រការទាំងអស់នេះហើយ បានគាំទ្រឲ្យមានសកម្មភាពសេដ្ឋកិច្ចស្ទុះកម្រើកឡើងវិញ ហើយវាក៏ជាហេតុផលមួយ ដែលបានធ្វើឲ្យតម្លៃប្រេងឆៅនៅទីផ្សារអង់គ្លេសកើនឡើងមកអស់រយៈពេល ៥សប្ដាហ៍មកហើយ ខណៈនៅអាមេរិកវិញ កើនឡើង៧សប្ដាហ៍មកហើយដែរ។
ចំណុចសំខាន់មួយទៀត ដែលធ្វើឲ្យតម្លៃប្រេងឆៅឡើងថ្លៃ គឺដោយសារតែ តម្លៃធ្យូងថ្ម និងហ្គាសក៏បានកើនឡើងខ្លាំងដែរ នៅពេលដែលសេដ្ឋកិច្ចមានការស្ទុះងើបឡើងវិញ ដែលវាបានធ្វើឲ្យប្រេងកាន់តែមានភាពទាក់ទាញសម្រាប់ប្រើប្រាស់ដើម្បីផលិតជាថាមពលអគ្គិសនី។
អត្ថបទទាក់ទង
ទាក់ទងនឹងបញ្ហាអគ្គិសនីនេះដែរ នៅប្រទេសឥណ្ឌា មានរដ្ឋខ្លះកំពុងដាច់ភ្លើងអគ្គិសនីប្រើប្រាស់ និង មានគម្រោងកាត់បន្ថយការប្រើប្រាស់អគ្គិសនី ដោយសារតែខ្វះខាតធ្យូងថ្ម សម្រាប់បម្រើដល់ការផលិតថាមពល ខណៈដែលនៅប្រទេសចិនឯណោះវិញ ក៏បានបញ្ជាឲ្យមានការបង្កើនការផលិតធ្យូងថ្មកាន់តែច្រើនផងដែរ នៅគ្រាដែលតម្លៃថាមពលកើនឡើងខ្ពស់ ហើយចិនក៏កំពុងប្រឈមនឹងការខ្វះខាតអគ្គិសនីប្រើប្រាស់ដែរ។ ការប្រឈមនឹងហានិភ័យនៃវិបត្តិថាមពលសកលលោក ត្រូវបានគេមើលឃើញថា កំពុងតែកើនឡើងកាន់តខ្លាំងឡើង ពិសេសបញ្ហាកាន់តែលំបាកនៅអំឡុងរដូវរងារនាពេលខាងមុខនេះ ដែលប្រទេសតំបន់ត្រជាក់មានតម្រូវការថាមពលសម្រាប់ប្រើប្រាស់ម៉ាស៊ីនកម្ដៅកាន់តែច្រើនឡើង។
បញ្ហាប្រេងឡើងថ្លៃ និងកង្វះខាតថាមពលអគ្គិសនីនេះ ក៏កំពុងជះឥទ្ធិពលកាន់តែខ្លាំងទៅលើការវិនិយោគនៅលើផ្សារភាគហ៊ុនផងដែរ ដោយសារតែវិនិយោគិនមានការបារម្ភអំពីការកើនឡើងនៃ អតិផរណា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
