ប្រទេសអាឡឺម៉ង់ និងន័រវេសគឺស្ថិតនៅក្នុងចំណោមប្រទេសដែលមានសេដ្ឋកិច្ចរីកចម្រើនមួយចំនួន ដែលកំពុងជួបប្រទះការរំខានដល់ជីវភាពប្រចាំថ្ងៃរបស់ពលរដ្ឋ ដោយសារតែសកម្មភាពពលករតវ៉ា ហើយវាត្រូវបានចាប់ផ្ដើមាននិន្នាការកើនឡើងនៅក្នុងចក្រភពអង់គ្លេសនាពេលថ្មីៗនេះ។ នេះបើតាមការអះអាងរបស់អ្នកវិភាគនៅក្រុមហ៊ុនប្រឹក្សាអំពីហានិភ័យ Verisk Maplecroft ។
របាយការណ៍ចុងក្រោយបង្អស់របស់ក្រុមហ៊ុន Verisk ស្តីពីសន្ទស្សន៍នៃភាពចលាចលស៊ីវិលបានរកឃើញថា អត្រាជាង ៥០% នៃបណ្តាប្រទេសជិត ២០០ បានជួបប្រទះនឹងការកើនឡើងនូវហានិភ័យនៃការតវ៉ារបស់មហាជននៅចន្លោះត្រីមាសទី២ និងទី៣នៃឆ្នាំ២០២២ដែលជាចំនួនដ៏ធំបំផុតមិនធ្លាប់មានចាប់តាំងពីក្រុមហ៊ុននេះបានចេញផ្សាយរបាយការណ៍របស់ខ្លួននៅក្នុងឆ្នាំ២០១៦មក។
បញ្ជីឈ្មោះនៃបណ្តាប្រទេសដែលមានការកើនឡើងនូវហានិភ័យខ្លាំងបំផុតដែលបានព្យាករណ៍នោះរួមមានប្រទេសបូបូស្នី និងហឺហ្សីហ្គូវីណា ប្រទេសស្វីស និងប្រទេសហូឡង់។
អ្នកវិភាគរបស់ក្រុមហ៊ុន Verisk លោក Soltvedt បាននិយាយថា ក្នុងរដូវរងារខាងមុខនេះ វានឹងគ្មានអ្វីគួរឱ្យភ្ញាក់ផ្អើលនោះទេប្រសិនបើប្រទេសអភិវឌ្ឍន៍មួយចំនួននៅអឺរ៉ុបចាប់ផ្តើមឃើញមានភាពចលាចលក្នុងទម្រង់ធ្ងន់ធ្ងរបែបនេះ គឺដោយសារតែការឡើងថ្លៃថាមពលនេះឯង។
សង្រ្គាមរបស់រុស្ស៊ីនៅអ៊ុយក្រែនតាំងពីថ្ងៃទី២៤ ខែកុម្ភៈមក បានជំរុញឱ្យមានការកើនឡើងនូវតម្លៃម្ហូបអាហារយ៉ាងខ្លាំងតែម្ដងនៅក្នុងអំឡុងខែកុម្ភៈបន្តចូលដល់ខែមីនា។ មិនតែប៉ុណ្ណោះ សង្គ្រាមនេះក៏បានធ្វើឱ្យតម្លៃថាមពលកើនឡើងយ៉ាងខ្លាំងផងដែរ ដោយធ្វើឱ្យអឺរ៉ុបក្លាយជាចំណុចកណ្តាលនៃការរងគ្រោះជាងគេបំផុតតែម្ដង។
អត្ថបទគួរអាន
ក្រុមអ្នកវិភាគលើហានិភ័យទាំងនេះ បានបន្ថែមថា ក្រៅពីរឿងថាមពល និងវិបត្តិសង្គ្រាមនៅអ៊ុយក្រែននេះ អឺរ៉ុបនៅតែរងគ្រោះដោយបញ្ហាមួយចំនួនបណ្ដាលមកពីជំងឺរាតត្បាតកូវីដ១៩ ដោយបានបង្កឱ្យមានការរំខានដល់ខ្សែច្រវាក់ផ្គត់ផ្គង់ផងដែរ។
គ្រោះរាំងស្ងួតដ៏បំផ្លិចបំផ្លាញ និងកម្រិតទឹកស្រកចុះច្រើនដែលជាប់ទាក់ទងនឹងការប្រែប្រួលអាកាសធាតុនៅផ្នែកជាច្រើននៅទូទាំងពិភពលោកក៏ជាការរួមចំណែកដល់ការធ្វើឱ្យតម្លៃអាហារ និងថាមពលកើនឡើងខ្លាំងដូចគ្នាដែរ។
របាយការណ៍របស់ក្រុមហ៊ុនប្រឹក្សាហានិភ័យ Verisk ក៏បានឲ្យដឹងទៀតថា ប្រទេសម៉ូរីទូស ប្រទេសស៊ីប និងប្រទេសអ៊ុយក្រែនបានជួបប្រទះការកើនឡើងដ៏ធំបំផុតនៃភាពចលាចលក្នុងសង្គមនៅក្នុងត្រីមាសទី៣ បើធៀបនឹងត្រីមាសទី២ ចំណែកប្រទេសរុស្ស៊ីស្ថិតនៅលំដាប់ទី៧ ហើយប្រទេសន័រវេសនៅក្នុងចំណាត់ថ្នាក់ទី១៣នៃបញ្ជីឈ្មោះប្រទេសដែលអាចនឹងមានភាពចលាចលកើនឡើងក្នុងរដូវត្រជាក់ខាងមុខនេះដោយសារតែតម្លៃថាមពលកើនឡើង។
យ៉ាងណាក៏ដោយចុះ ថ្មីៗនេះ ប្រធានគណៈកម្មការសហភាពអឺរ៉ុប និងប្រទេសអាល្លឺម៉ង់ បានសន្យាថា នឹងរួមគ្នាចាត់វិធានការ ដើម្បីកាត់បន្ថយតម្លៃអគ្គិសនីនៅឆ្នាំក្រោយនេះ បើទោះបីជា ប្លុកនេះ កំពុងប្រឈមនឹងការកាត់ផ្ដាច់ប្រេង និងឧស្ម័នទាំងស្រុងពីរុស្ស៊ីក៏ដោយ៕
អត្ថបទ៖ សុខ ជា
