យ៉ាងណាមិញ ក្នុងអំឡុងពេលកូវីដ-១៩នេះ ថ្លៃថ្នាំកសិកម្ម និងជីកសិកម្ម កាន់តែមានតម្លៃខ្ពស់ ដែលបានធ្វើឲ្យកសិករត្អូញត្អែរថា ការចំណាយលើការធ្វើស្រែចម្ការរបស់ពួកគាត់ត្រូវចំណាយខ្ពស់ជាងមុន។
ប្រជាកសិករធ្វើស្រែចម្ការ តែងតែមានការរអ៊ូរទាំជារឿយៗ ពីការឡើងថ្លៃជី-ថ្នាំកសិកម្ម ពិសេសនៅ ក្នុងអំឡុងពេលវិបត្តិកូវីដ-១៩ ក៏ប៉ុន្តែបើក្រឡេកទៅមើលផលិតផលកសិកម្មវិញ បែរជាធ្លាក់ថ្លៃទៅវិញ ដូចជាស្រូវ ជាឧទាហរណ៍ស្រាប់ដែលតែងតែកើតឡើងរៀងរាល់ឆ្នាំ ។ កសិករនៅខេត្តព្រៃវែង លោក ហ៊ុន សំណាង បានលើកឡើងថា សព្វថ្ងៃនេះ ការចំណាយ ក្នុងផលិតកម្មកសិកម្ម កាន់តែខ្ពស់ រីឯតម្លៃកសិផលវិញ ហាក់មិនឆ្លើយតបទៅនឹងការចំណាយសោះ ដូចជា ចំណាយលើ ការភ្ជួររាស់ ជី-ថ្នាំកសិកម្ម និង ការប្រមូលផលជាដើម។ លោក សំណាង បានអំពាវនាវដល់រដ្ឋាភិបាលកម្ពុជា ជួយដោះស្រាយបញ្ហាតម្លៃជី-ថ្នាំកសិកម្ម ដែលកំពុងឡើងថ្លៃនៅពេលបច្ចុប្បន្ននេះផង។
ទាក់ទិនបញ្ហាជី-ថ្នាំកសិកម្មឡើងថ្លៃខ្ពស់នេះដែរ ក្រសួងកសិកម្មនៅថ្ងៃទី៩ ខែសីហា ក៏បានពន្យល់ពីមូលហេតុសំខាន់ៗ មួយចំនួន ដែលធ្វើឱ្យតម្លៃថ្នាំ និងជីកសិកម្ម នៅកម្ពុជា បន្តកើនឡើង។ ក្នុងនោះ បណ្ដាប្រទេសផលិតថ្នាំ-ជីកសិកម្មនាំចេញ មិនអាចផលិតឆ្លើយតបតាមការបញ្ជាទិញពីកម្ពុជាទេ។ វត្ថុធាតុដើម មានការខ្វះខាតក្នុងការផ្គត់ផ្គង់ ពីប្រទេសផលិតធំៗ និងផលិតកម្មជីកសិកម្ម ត្រូវបានកាត់បន្ថយកម្លាំងពលកម្ម ដោយបញ្ហានៃការរាលដាលនៃជំងឺកូវីដ-១៩។ ម្យ៉ាងទៀត បញ្ហាកូវីដ-១៩ ក៏ជាផ្នែកមួយធ្វើឱ្យការដឹកជញ្ជូនត្រូវប្រើពេលវេលាយូរផងដែរ។
ការបញ្ជាទិញជី-ថ្នាំកសិកម្ម ពីឈ្មួញកណ្ដាល បូកផ្សំនឹង ទីផ្សារប្រកួតប្រជែង ជាបញ្ហាធ្វើឱ្យតម្លៃជី-ថ្នាំកសិកម្មកើនឡើង។ អ្នកវិនិយោគក្នុងវិស័យកសិកម្មកើនច្រើន ធ្វើឱ្យតម្រូវការជីកសិកម្ម ក្នុងស្រុកកាន់តែកើនឡើងផងដែរ។ ម្យ៉ាងវិញទៀត កម្ពុជា ក៏មិនទាន់មានលទ្ធភាពផលិតជី-ថ្នាំកសិកម្ម បានដោយខ្លួនឯងគ្រប់គ្រាន់នោះទេ។
អត្ថបទគួរអាន
លោក សុខ ហៀង អ្នកគ្រប់គ្រងទូទៅ របស់ក្រុមហ៊ុនជីធម្មជាតិជប៉ុនសញ្ញាផែនដី បានលើកឡើងថា បញ្ហាតម្លៃជី-ថ្នាំកសិកម្ម នាពេលបច្ចុប្បន្ននេះ មិនបានចោទជាបញ្ហាធ្ងន់ធ្ងរនោះទេសម្រាប់វិស័យកសិកម្ម។ លោកបន្តថា ចាប់ពីវិបត្តិកូវីដ-១៩ តម្លៃជី-ថ្នាំកសិកម្ម មានការកើនឡើងតិចតួចប៉ុណ្ណោះ ហើយក៏មានជី និង ថ្នាំកសិកម្ម មួយចំនួនរក្សាតម្លៃដដែលដែរ។ ដ្បិត មានការរអ៊ូរទាំពីកសិករ អំពីការឡើងថ្លៃជី-ថ្នាំកសិកម្ម និងការធ្លាក់ចុះនៃតម្លៃកសិផលមួយចំនួន ប៉ុន្ដែ អ្នកគ្រប់គ្រងរូបនេះ នៅតែយល់ថា តម្លៃជី-ថ្នាំកសិកម្ម នាពេលបច្ចុប្បន្ន នៅតែអាចទទួលយកបាន។
បច្ចុប្បន្ន តម្លៃជី ដែលលក់ចេញដោយក្រុមហ៊ុនជីធម្មជាតិជប៉ុនសញ្ញាផែនដី មានប្រភេទគ្រាប់ ទម្ងន់ ៥០គីឡូក្រាម លក់ក្នុងតម្លៃ ១១ម៉ឺន៣ពាន់រៀល ទៅ ១១ម៉ឺន៥ពាន់រៀល។ រីឯ ជីប្រភេទម្សៅ ទម្ងន់ ៥០គីឡូក្រាម តម្លៃ ១០ម៉ឺន៣ពាន់រៀល។ ដោយឡែក ជីអ៊ុយរ៉េ ទម្ងន់ ៥០គីឡូក្រាម តម្លៃ ៧ម៉ឺន៦ពាន់រៀល ទៅ ៨ម៉ឺន២ពាន់រៀល។
យោងតាមរបាយការណ៍ដែលបង្ហាញដោយក្រសួងកសិកម្ម រុក្ខាប្រមាញ់ និងនេសាទ កាលពីឆ្នាំ២០២០ កម្ពុជា បាននាំចូលថ្នាំកសិកម្ម ជាង១០ម៉ឺនតោន និង ជីកសិកម្ម ជាង ៨៥ម៉ឺនតោន។ ដោយឡែក នៅឆ្នាំ២០២១ គិតត្រឹម ខែឧសភា មានថ្នាំកសិកម្ម ជាង៤ម៉ឺនតោន និងជីកសិកម្មជាង១លានតោន ឯណោះ ដែលបាននាំចូលមកកម្ពុជា៕
អត្ថបទ៖ ខន ណារី
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
