អង្គការសហប្រជាជាតិ នៅព្រឹកថ្ងៃទី ២៤ ខែកុម្ភៈនេះ ក៏បានបើកកិច្ចប្រជុំបន្ទាន់មួយទាក់ទងនឹងបញ្ហាវិបត្តិនៅអ៊ុយក្រែននេះផងដែរ។
អង្គការសហប្រជាជាតិបានបើកកិច្ចប្រជុំបន្ទាន់មួយ ដើម្បីជំរុញឲ្យរុស្ស៊ីបញ្ឈប់សកម្មភាពទាំងអស់នេះ។ អគ្គលេខាធិការនៃអង្គការសហប្រជាជាតិ លោក អាន់តូនីញ៉ូ ហ្គូទែរែស (Antonio Guterres) បានស្នើទៅកាន់ប្រធានាធិបតីរុស្ស៊ី លោក វ្ល៉ាឌីមៀ ពូទីន ថា កុំបើកការវាយប្រហារលើអ៊ុយក្រែន។ លោក ហ្គូទែរែស បាននិយាយចំៗថា ប្រធានាធិបតីពូទីន សូមបញ្ឈប់កងទ័ពរបស់លោកពីការវាយប្រហារអ៊ុយក្រែនទៅ សូមបង្កើតសន្តិភាព ព្រោះមានមនុស្សជាច្រើនណាស់ហើយបានស្លាប់បាត់បង់ជីវិត។
ការប្រកាសដាក់ចេញប្រតិបត្តិការយោធារបស់រុស្ស៊ីនេះ ធ្វើឡើងនៅមិនយូរប៉ុន្មាន បន្ទាប់ពីមេដឹកនាំក្រុមឧទ្ទាមនៃតំបន់ផ្តាច់ខ្លួន បានស្នើសុំឱ្យទីក្រុងម៉ូស្គូជួយគាំទ្រផ្នែកយោធាដើម្បីតតាំង នឹងអ៊ុយក្រែន។
មន្ត្រីការបរទេសអ៊ុយក្រែននិយាយថា រុស្ស៊ី បានចាប់ផ្ដើមការឈ្លានពានអ៊ុយក្រែនហើយ ដោយបានបាញ់មីស៊ីលទៅលើរដ្ឋធានីគៀវ។
លោកពូទីនអះអាងថា ការសម្រេចរបស់លោកគឺដើម្បីការពារអាយុជីវិតមនុស្សនៅក្នុងតំបន់ តបតាមការស្នើសុំពីក្រុមឧទ្ទាមផ្តាច់ទឹកដី ហើយលោកថែមទាំងបានស្នើឲ្យទ័ពអ៊ុយក្រែនទម្លាក់អាវុធចុះ បើពុំនោះទេលោកនឹងមិនអត់ឱនឲ្យនរណាម្នាក់ដែលជ្រៀតជ្រែកបញ្ហានេះដាច់ខាត ហើយការប៉ះទង្គិចគ្នារវាងទ័ពរុស្សីនឹងអ៊ុយក្រែន នឹងក្លាយជារឿងជៀសមិនរួច។
ក្នុងការថ្លែងដដែល លោកពូទីន បានសង្កត់ធ្ងន់ជាថ្មីពីបញ្ហាដែលសហរដ្ឋអាមេរិក និងសម្ព័ន្ធមិត្ត ណាតូ មិនបានអើពើនឹងការទាមទាររបស់រុស្ស៊ីក្នុងការរារាំងអ៊ុយក្រែនពីការចូលរួមក្នុងអង្គការណាតូ និងផ្តល់ការធានាសន្តិសុខដល់ទីក្រុងម៉ូស្គូ។
បន្ទាប់ពីការប្រកាសរបស់រុស្សី ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលែនស្គី (Volodymyr Zelenskiy) បានព្រមានថា ការប្រតិបត្តិការយោធារបស់រុស្ស៊ី អាចជាការចាប់ផ្តើមនៃសង្គ្រាមដ៏ធំមួយនៅទ្វីបអឺរ៉ុប។ ថ្លែងសារតបវិញភ្លាមៗនៅលើកញ្ចប់ទូរទស្សន៍ លោកហ្សេលែនស្គី និយាយថា ប្រជាជនអ៊ុយក្រែន និងរដ្ឋាភិបាលអ៊ុយក្រែនចង់បានសន្តិភាព ប៉ុន្តែបើយើងរងការវាយប្រហារ បើយើងប្រឈមនឹងការប៉ុនប៉ងចង់ក្តោបយកប្រទេសយើង សេរីភាព ជីវិត និងជីវិតរបស់កូនៗយើង យើងនឹងការពារខ្លួន។
ប្រធានាធិបតីអាមេរិកចូ បៃឌិនឯណោះវិញ បានថ្កោលទោសខ្លាំងៗលើសកម្មភាពរបស់រុស្ស៊ី តែប៉ុន្មានម៉ោងប៉ុណ្ណោះបន្ទាប់ពីប្រធានាធិបតីរុស្ស៊ី ប្រកាសពីការធ្វើប្រតិបត្តិការយោធា។ នៅក្នុងសេចក្ដីថ្លែងការណ៍មួយចេញផ្សាយនៅព្រឹកថ្ងៃព្រហស្បតិ៍លោក ចូ បៃដិន គូសបញ្ជាក់ថា លោកប្រធានាធិបតី ពូទីន បានជ្រើសរើសយកសង្គ្រាមមួយដែលបានគិតទុកជាមុន ហើយដែលនឹងបង្កមហន្តរាយដល់អាយុជីវិត និងក្តីឈឺចាប់របស់មនុស្សជាតិ។ រុស្ស៊ីតែម្នាក់គត់ គឺជាអ្នកទទួលខុសត្រូវចំពោះការស្លាប់ និងការបំផ្លិចបំផ្លាញ ហើយសហរដ្ឋអាមេរិក និងសម្ពន្ធមិត្ត នឹងប្រាកដជាឆ្លើយតបយ៉ាងម៉ឺងម៉ាត់បំផុត។
គួរជម្រាបថា ប្រតិបត្តិការយោធារបស់រុស្សីធ្វើឡើង ស្របពេលដែលក្រុមប្រឹក្សាសន្តិសុខនៃអង្គការសហប្រជាជាតិ បាននិងកំពុងរៀបចំកិច្ចប្រជុំ ដើម្បីជំរុញឲ្យរុស្ស៊ីបញ្ឈប់សកម្មភាពទាំងអស់នេះ៕
