មូលនិធិវិនិយោគផ្ទាល់របស់រុស្ស៊ី (RDIF) បាននិយាយថា វ៉ាក់សាំងកូវីដ-១៩ ឈ្មោះ Sputnik Light នេះ ដែលផលិតដោយវិទ្យាស្ថានស្រាវជ្រាវ ហ្គាម៉ាឡីយ៉ា របស់ទីក្រុងមូស្គូ មានអត្រាប្រសិទ្ធភាពការពារការឆ្លងមេរោគកូវីដ-១៩ បាន ៧៩% និងមានតម្លៃក្រោម ១០ដុល្លារក្នុងមួយដូស ។ នេះបើតាមការចុះផ្សាយរបស់សារព័ត៌មាន ស៊ីអិនប៊ីស៊ី ។
RDIF បាននិយាយថា ការសាកល្បងដំណាក់កាលទី៣ ដែលជាដំណាក់កាលចុងក្រោយ ទៅលើមនុស្ស ៧០០០នាក់ បាននិងកំពុងប្រព្រឹត្តទៅនៅក្នុងប្រទេសរុស្ស៊ី អារ៉ាប់រួម និងហ្គាណា រួមទាំងប្រទេសផ្សេងៗទៀត ។ លទ្ធផលបណ្ដោះអាសន្នត្រូវគេរំពឹងថា នឹងចេញនៅចុងខែនេះ ។
អត្ថបទទាក់ទង
លោក Kirill Dmitriev អគ្គនាយកប្រតិបត្តិនៃ RDIF បាននិយាយថា ទោះបីជាវ៉ាក់សាំង Sputnik Light ដែលចាក់តែមួយដូសនេះ មានតម្លៃធូរថ្លៃមែន ពោលគឺក្រោម ១០ដុល្លារក្នុងមួយដូស ក៏ពិតមែន ប៉ុន្តែ វ៉ាក់សាំង Sputnik V ដែលចាក់ពីរដូស នៅតែជាប្រភពវ៉ាក់សាំងសំខាន់ជាងគេសម្រាប់ការចាក់នៅប្រទេសរុស្ស៊ី ដដែល ។
លោក Dmitriev បានបន្តថា វ៉ាក់សាំង Sputnik Light នេះនឹងត្រូវនាំចេញទៅក្រៅប្រទេសទៅឲ្យដៃគូអន្តរជាតិ ដើម្បីជួយបង្កើនអត្រានៃការចាក់វ៉ាក់សាំងនៅប្រទេសមួយចំនួន ដែលកំពុងប្រយុទ្ធប្រឆាំងនឹងជំងឺឆ្លងកូវីដ-១៩ និងប្រភេទបំប្លែងថ្មីនៃវីរុសនេះ ។
គិតត្រឹមថ្ងៃពុធ ទី៥ ខែឧសភា ឆ្នាំ២០២១ នេះ RDIF បាននិយាយថា ប្រជាជនជាង ២០លាននាក់ហើយ នៅជុំវិញពិភពលោក បានទទួលចាក់ដូសទីមួយ នៃវ៉ាក់សាំង Sputnik V ៕
