រុស្សីបញ្ជាក់ជាថ្មីថា ត្រូវដកទណ្ឌកម្មលោកខាងលិចសិន ទើបនាំចេញគ្រាប់ធញ្ញជាតិទៅទីផ្សារអន្តរជាតិ

អ្នកនាំពាក្យវិមានក្រឹមឡាំង លោក ឌីមីទ្រី ពេស្កូវ (Dmitry Peskov) ​បានប្រាប់អ្នកយកព័ត៌មានថា “ប្រធានាធិបតី លោក វ្លាឌីមៀ ពូទីន បាននិយាយថា ដើម្បីឱ្យបរិមាណគ្រាប់ធញ្ញជាតិរបស់រុស្ស៊ីអាចចែកចាយទៅកាន់ទីផ្សារអន្តរជាតិបាន លុះត្រាតែការដាក់ទណ្ឌកម្មដោយផ្ទាល់ និងដោយប្រយោលប្រឆាំង​នឹងរុស្ស៊ីត្រូវតែដកចេញជាបន្ទាន់ជាមុនសិន” ។

លោកបាននិយាយថា ទណ្ឌកម្មដែលលោកខាងលិចបានដាក់ក្នុងការឆ្លើយតបចំពោះការលុកលុយរបស់ខ្លួនទៅ​លើកាន់អ៊ុយក្រែននោះ កំពុងប៉ះពាល់យ៉ាងខ្លាំង​ដល់ការធានា​រ៉ាប់រងលើការដឹកជញ្ជូន ការបង់ប្រាក់ផ្សេងៗ និងការចូលទៅកាន់កំពង់ផែអឺរ៉ុបផងដែរ។

សូមជម្រាបថា ការផ្គត់ផ្គង់ស្រូវសាលីពីប្រទេសអ៊ុយក្រែន និងរុស្ស៊ីរួមគ្នាមានចំនួនជិតមួយភាគបីនៃការផ្គត់ផ្គង់ស្រូវសាលី​សកលលោកទៅហើយ ខណៈដែលរុស្ស៊ីជាអ្នកនាំចេញជីកសិកម្មដ៏ធំ ហើយអ៊ុយក្រែនជាអ្នកដាំដុះ និងនាំចេញពោត និងប្រេងចម្អិនអាហារ​ដ៏សំខាន់ផងដែរ។

រដ្ឋមន្ត្រីការបរទេសរុស្សី​ លោក សឺហ្គេ ឡារូហ្វ (Sergei Lavrov) បាននិយាយកាលពីថ្ងៃទី៨មិថុនាថា ភារកិច្ចគឺស្ថិតនៅលើអ៊ុយក្រែនតែប៉ុណ្ណោះ ក្នុងការដោះស្រាយបញ្ហាការដឹកជញ្ជូនគ្រាប់ធញ្ញជាតិ ដោយគ្រាន់តែដោះមីន ដែលខ្លួនបានដាក់តាមមធ្យោបាយណាក៏បាន ដើម្បីឲ្យរុស្សីងាយស្រួលដឹកគ្រាប់ធញ្ញជាតិ ទៅកាន់កំពង់ផែទាំងនោះ។

មួយវិញទៀត លោក ពេស្កូវ (Dmitry Peskov) អ្នកនាំពាក្យវិមានក្រឹមឡាំង និង រដ្ឋមន្ត្រីការបរទេសរុស្សី លោក ឡារូហ្វ ថែមទាំងបានចោទប្រកាន់អ៊ុយក្រែនថា​ កំពុងនិយាយបផ្លើសពីចំនួនគ្រាប់ធញ្ញជាតិរបស់ខ្លួន ដ្បិតថា បើតាម​អ្វីដែលរុស្ស៊ីបានដឹងនោះ គឺអ៊ុយក្រែនមានគ្រាប់ធញ្ញជាតិ ដែលបម្រុងទុកតិចតួចណាស់បើធៀបទៅ​នឹង​ទីផ្សារអន្តរជាតិ ហើយមន្ត្រីទីក្រុងមូស្គូទាំងពីរនាក់នេះ ក៏ថែមទាំងបានចោទប្រកាន់​លោកខាងលិចដែរថា បានយកការណ៍នេះ ដើម្បីនិយាយបំប៉ោងព័ត៌មាន ដើម្បីលាបពណ៌ទៅលើរុស្សីថា បង្កឲ្យកើតមានមហន្តរាយនៃស្បៀងអាហារពិភពលោក។​

​ទោះជាយ៉ាងណា យោងតាមអង្គការស្បៀងអាហារ និងកសិកម្មនៃអង្គការសហប្រជាជាតិ អ៊ុយក្រែនគឺជាប្រទេសនាំចេញស្រូវសាលីធំជាងគេទី ៥ នៅលើពិភពលោក ដែលមាន​ចំណែកទីផ្សារប្រមាណ ១០% ។

ពាក់ព័ន្ធនឹងរឿងស្បៀងអាហារនេះដែរ ប្រទេសតួគីឯណោះវិញកំពុងខ្នះខ្នែងមែនទែន ដើម្បីបន្ធូរបន្ថយវិបត្តិស្បៀងអាហារពិភពលោក ដោយចរចាលើការធានា​សុវត្ថិភាពក្នុងការដឹកជញ្ជូនគ្រាប់ធញ្ញជាតិ ដែលជាប់គាំងនៅក្នុងកំពង់ផែសមុទ្រខ្មៅ ក៏ប៉ុន្តែមានការខ្វែងគំនិតគ្នាមួយចំនួន ដោយអ៊ុយក្រែនបាននិយាយថា រុស្ស៊ីកំពុងដាក់លក្ខខណ្ឌមិនសមហេតុមិនសមផល។

ទោះយ៉ាងណា ក្នុងជំនួបជាមួយសមភាគីរុស្ស៊ីថ្មីៗនេះ រដ្ឋមន្ត្រីការបរទេសតួគី លោក មេវលូត កាវ៉ូសូលូ (Mevlut Cavusoglu) បាននិយាយថា កិច្ចពិភាក្សាកាលពីថ្ងៃពុធសប្ដាហ៍នេះ​នៅទីក្រុងអង់ការ៉ាមានផ្លែផ្កាល្អ ហើយភាគីទាំងពីរយល់ស្របថា ការបើកច្រកនាំចេញគ្រាប់ធញ្ញជាតិរបស់អ៊ុយក្រែនឡើងវិញ តាមច្រករបៀង​សមុទ្រ គឺសមហេតុផល។

ទោះយ៉ាងណា នាយកសហជីពពាណិជ្ជករគ្រាប់ធញ្ញជាតិអ៊ុយក្រែន លោក ស៊ើរហី (Serhiy Ivashchenko) បានប្រាប់សន្និសីទអនឡាញមួយកាលពីថ្ងៃពុធថា "តួគីដែលជាអ្នកធានាសុវត្ថិភាពនៃការដឹកគ្រាប់ធញ្ញជាតិ គឺមិនមានអំណាច​គ្រប់គ្រាន់នោះទេ" ។ លោកបានបន្ថែមថា វាអាចចំណាយពេលយ៉ាងហោចណាស់​ពីរទៅបីខែឯណោះ ដើម្បីដោះមីនចេញពីកំពង់ផែអ៊ុយក្រែនទាំងនោះ ដើម្បីនាំចេញស្បៀងអាហារវិញបាន។

គួររំលឹកឡើងវិញថា សង្គ្រាមរវាងរុស្ស៊ី និងអ៊ុយក្រែន ដែលជាប្រទេសនាំចេញគ្រាប់ធញ្ញជាតិធំជាងគេទី ៣ និងទី ៤ របស់ពិភពលោកនោះ បានបន្ថែមតម្លៃអតិផរណានៃម្ហូបអាហារ និងកំពុងធ្វើឱ្យការផ្គត់ផ្គង់ស្បៀងអាហារពិភពលោកប្រឈមនឹងហានិភ័យខ្ពស់ឡើង។

ប្រទេសអ៊ុយក្រែនបាននាំចេញគ្រាប់ធញ្ញជាតិរហូតដល់ ៦ លានតោនក្នុងមួយខែមុនពេលរុស្ស៊ីចាប់ផ្តើមការលុកលុយចូលអ៊ុយក្រែន​នៅថ្ងៃទី ២៤ ខែកុម្ភៈ៕

អត្ថបទ៖ ហ៊ុន គន្ធថៃ