បើទោះបីជាទីក្រុង លីស៊ីឆាន់ធ្លាក់ចូលក្នុងដៃរុស្ស៊ីក្ដី ប៉ុន្ដែប្រធានាធិបតីអ៊ុយក្រែនលោក វូលូឌីមៀ ហ្សេលេនស្គី កាលពីថ្ងៃអាទិត្យចុងសប្តាហ៍មុនបានប្តេជ្ញាថា នឹងវាយដណ្ដើមយកក្រុងមួយនេះ មកគ្រប់គ្រងវិញឱ្យបាន តាមរយៈការប្រើប្រាស់ជំនួយ ជាអាវុធបាញ់ចម្ងាយឆ្ងាយរបស់លោកខាងលិច។
កាលពីថ្ងៃអាទិត្យភាគីរុស្ស៊ីបាននិយាយថា ការវាយយកបានទីក្រុងលីសីឆាន់ (Lysychansk) ពីអ៊ុយក្រែន គឺធ្វើឡើងតិចជាងមួយសប្តាហ៍ប៉ុណ្ណោះ បន្ទាប់ពីពួកគេបានដណ្តើមកាន់កាប់ក្រុង សៀវីរ៉ូដូណេក (Sievierdonetsk) ដែលជាក្រុងមិនឆ្ងាយប៉ុន្មានពីក្រុងលីសីឆាន់ឡើយ។ ការណ៍នេះ នឹងផ្តល់ឱ្យទីក្រុងម៉ូស្គូ នូវការគ្រប់គ្រងយ៉ាងពេញលេញនៅក្នុងខេត្តលូកហាន់ (Luhansk) ភាគខាងកើតអ៊ុយក្រែន។
បន្ទាប់ពីសម្រេចបានគោលដៅ ឆ្លើយតបតាមការចង់បានរបស់វិមានក្រឹមឡាំងរួចមក ពេលនេះ មានសេចក្តីរាយការណ៍មកថា រុស្ស៊ីកំពុងដាក់មុខព្រួញឆ្ពោះទៅវាយប្រហារខេត្តដូណេកបន្តទៀត។ ខេត្តដូណេក បច្ចុប្បន្នភាគច្រើនកំពុងបន្តគ្រប់គ្រងដោយកងទ័ពអ៊ុយក្រែននៅឡើយ។ គួរជម្រាបដែរថា តំបន់ដែលរុស្ស៊ីហៅ ថាដុនបាស រួមបញ្ចូលគ្នារវាងខេត្តពីររបស់អ៊ុយក្រែន គឺដូណេក និងលូកហាន់ ខណៈតំបន់ជាប់ព្រំដែនរុស្ស៊ីមួយនេះ រមែងមានអសន្តិសុខជាយូរមកហើយ ដោយសារក្រុមឧទ្ទាមផ្តាច់ទឹកដីនិយមដែលគាំទ្រដោយរុស្ស៊ី។
អត្ថបទគួរអាន
នៅក្នុងខ្សែវីដេអូមួយកាលពីយប់ថ្ងៃអាទិត្យ ប្រធានាធិបតីអ៊ុយក្រែនថ្លែងថា កងទ័ពរបស់លោកនឹងវិលមកគ្រប់គ្រងក្រុងលីសីឆាន់វិញ ជាមួយនឹងការប្រើប្រាស់យុទ្ធសាស្ត្រ ដែលលោកបានអរគុណដល់ ប្រទេសលោកខាងលិចចំពោះការផ្តល់អាវុធទំនើបៗមកឱ្យអ៊ុយក្រែន។
តាមការរាយការណ៍ដោយរ៉យទ័រ នៅថ្ងៃចន្ទនេះ បានឲ្យដឹងដែរថា ធនាគារវិនិយោគរបស់សហភាពអឺរ៉ុប នឹងលើកជាសំណើមូលនិធិហេដ្ឋារចនាសម្ព័ន្ធ ដែលត្រូវបានប្រើប្រាស់កាលពីអំឡុងពេលមានកូវីដ១៩រាតត្បាត ដើម្បីជួយកសាងអ៊ុយក្រែនឡើងវិញ ដោយមូលនិធិនេះ មានការវិនិយោគក្នុងតម្លៃដល់ទៅ ១០០ពាន់លានដុល្លារអាមេរិកឯណោះ។
លោកហ្សេលេនស្គីបានកត់សម្គាល់ទៀតថា ប្រទេសរុស្ស៊ីកំពុងផ្តោតការវាយប្រហារមកលើ នៅលើតំបន់ Donbas ខ្លាំងណាស់ ប៉ុន្តែអ៊ុយក្រែននឹងវាយបកវិញជាមួយនឹងអាវុធរយៈចម្ងាយឆ្ងាយ ដូចជាគ្រាប់រ៉ុក្កែត ហ៊ីមម៉ាស់(HIMARS) ដែលផ្គត់ផ្គង់ដោយសហរដ្ឋអាមេរិក។
គួររំឭកឡើងវិញថា ចាប់តាំងពីបានបោះបង់ចោលផែនការ វាយលុកលើរដ្ឋធានីកៀវ ទីក្រុងម៉ូស្គូ បានប្រមូលផ្តុំកម្លាំងទ័ពទាំងអស់ មកធ្វើប្រតិបត្តិការលើតំបន់ Donbas ជាកន្លែងដែលក្រុមឧទ្ទាមផ្តាច់ខ្លួនគាំទ្រដោយទីក្រុងម៉ូស្គូធ្លាប់បានប្រយុទ្ធជាមួយអ៊ុយក្រែនតាំងតែពីឆ្នាំ២០១៤។
បើតាមការអះអាងពីភាគីរុស្ស៊ី ការវាយដណ្តើមយកខេត្តលូកហាន់(Luhansk) គឺដើម្បីប្រគល់ទៅឱ្យសាធារណរដ្ឋប្រជាមានិត Luhansk ដែលលោកពូទីនបានចុះក្រិតទទួលស្គាល់ថាជាដែនដីឯករាជ្រ តែប៉ុន្មានថ្ងៃប៉ុណ្ណោះមុនចូលឈ្លានអ៊ុយក្រែន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
