លោក Lavrov រដ្ឋមន្ត្រីការបរទេសរុស្ស៊ី បាននិយាយនៅក្នុងសន្និសីទព័ត៌មានមួយក្នុងប្រទេសអារ៉ាប៊ីសាអូឌីតអំពីផែនការរបស់សហរដ្ឋអាមេរិកក្នុងការផ្តល់ឱ្យអ៊ុយក្រែននូវប្រព័ន្ធរ៉ុក្កែតដ៏ទំនើបមួយ ដែលអាចវាយប្រហារបានចម្ងាយឆ្ងាយ និងចំគោលដៅណាមួយនៅលើទឹកដីនៃប្រទេសរុស្ស៊ី។
លោក Lavrov បាននិយាយថា ជាការពិត ហានិភ័យបែបនេះពិតជាមានហើយ ហើយអ្វីដែល ទីក្រុងកៀវទាមទារចង់បានជាក់ស្តែង និងផ្នែកសេដ្ឋកិច្ចពីក្រុមអ្នកឧបត្ថម្ភនៅបស្ចិមលោកនោះគឺទីមួយវាហួសពីភាពសមរម្យ និងលើសពីទំនាក់ទំនងការទូតទៅទៀត។ ហើយទីពីរ វាគឺជាការបង្កហេតុផ្ទាល់ដើម្បីឱ្យមានការចូលរួមពីបស្ចិមប្រទេស នៅក្នុងជម្លោះនេះផងដែរ។
កាសែត អ៊ុករ៉ាយីនស្កា ប្រាវដា (Ukrayinska Pravda) បានរាយការណ៍ថា លោក ឡាវរ៉ូវ បាននិយាយថា ក្រុមអ្នកមានមនសិការនយោបាយនៅបស្ចិមលោកពិតជាបានយល់ដឹងពីហានិភ័យទាំងនេះយ៉ាងច្បាស់ទៅហើយ។ ពិតណាស់មិនមែនគ្មានអ្នកណាម្នាក់នៅក្នុងសហភាពអឺរ៉ុបជាពិសេសនៅភាគខាងជើងតែម្ដងមិនដឹងពីបញ្ហានៃហានិភ័យនេះទេ គឺមានអ្នកនយោបាយដែលត្រៀមខ្លួនដើម្បីងាកទៅរកភាពឆ្កួតលីលាទាំងនេះ ដើម្បីបំពេញមហិច្ឆតារបស់ពួកគេតែប៉ុណ្ណោះ។
លោក Lavrov បានបន្ថែមថា ប៉ុន្តែប្រទេសម៉ឺងម៉ាត់មួយចំនួននៅសហភាពអឺរ៉ុបពិតណាស់បានដឹងយ៉ាងច្បាស់ពីភាពមិនអាចទទួលយកបាននៃសេណារីយ៉ូបែបនេះ។
អ្នកនាំពាក្យវិមានក្រឹមឡាំងលោក Dmitry Peskov បាននិយាយពីថ្ងៃទៅ១មិថុនា ឆ្លើយតបទៅនឹងការសម្រេចចិត្តរបស់ប្រធានាធិបតីអាមេរិកលោក Joe Biden ក្នុងការផ្តល់ប្រព័ន្ធមីស៊ីលទំនើបបន្ថែមទៀតដល់អ៊ុយក្រែនថា សហរដ្ឋអាមេរិកកំពុងតែ "បន្ថែមប្រេងដល់ភ្លើង" ដោយផ្គត់ផ្គង់សព្វាវុធដល់ទីក្រុងកៀវ។ នេះបើតាមទូរទស្សន៍អាមេរិក CNN បានរាយការណ៍។
អត្ថបទគួរអាន
អាជ្ញាធរអ៊ុយក្រែនបានស្នើជាយូរមកហើយឱ្យសហរដ្ឋអាមេរិកផ្គត់ផ្គង់ប្រព័ន្ធរ៉ុក្កែតរយៈចម្ងាយមធ្យមដែលមានបច្ចេកវិទ្យាទំនើប។ លោក Biden បាននិយាយកាលពីថ្ងៃអង្គារថា សហរដ្ឋអាមេរិកកំពុងផ្តល់ឱ្យអ៊ុយក្រែននូវ "ប្រព័ន្ធរ៉ុក្កែតនិងគ្រាប់បែកទំនើបៗ"ខណៈដែលសង្គ្រាមអ៊ុយក្រែនជាមួយរុស្ស៊ីកំពុងតែបន្តឆាបឆេះក្នុងភ្នកភ្លើងសង្គ្រាមនៅឡើយ។
ទោះយ៉ាងណា អ្នកនាំពាក្យវិមានក្រឹមឡាំងលោក Dmitry Peskov បាននិយាយថា "ការផ្គត់ផ្គង់បែបនេះមិនបានរួមចំណែកដល់ឆន្ទៈរបស់ថ្នាក់ដឹកនាំអ៊ុយក្រែនក្នុងការបន្តការចរចាសន្តិភាពឡើងវិញនោះទេ"។
លោក Peskov ក៏បានបន្ថែមដែរថា វិមានក្រឹមឡាំងមិនជឿទុកចិត្តលើពាក្យសម្ដីរបស់ប្រធានាធិបតីអ៊ុយក្រែនលោក Volodymyr Zelensky ដែលថាទីក្រុង Kyiv នឹងមិនប្រើប្រាស់ប្រព័ន្ធរ៉ុក្កែតបាញ់បានរយៈចម្ងាយឆ្ងាយដើម្បីវាយប្រហារលើទឹកដីរុស្ស៊ីនោះទេ នៅពេលពួកគេទទួលបានប្រព័ន្ធរ៉ុក្កែតនេះពីសហរដ្ឋអាមេរិកហើយនោះ។
យ៉ាងណាក៏ដោយចុះ លោក អាន់តូនី ប្លេងខេន រដ្ឋមន្ត្រីការបរទេសអាមេរិក បានចេញមកអះអាងដែរថា ប្រព័ន្ធគ្រាប់រ៉ុកែត ដែលអាមេរិកនឹងផ្ដល់ឲ្យអ៊ុយក្រែននោះ គឺអាចបាញ់បានឆ្ងាយបំផុតដល់ត្រឹមរយៈចម្ងាយ៨០គីឡូម៉ែត្រប៉ុណ្ណោះ ហើយវាមិនអាចបាញ់ចូលដល់ក្នុងប្រទេសរុស្ស៊ីនោះទេ៕
អត្ថបទ៖ សុខ ជា
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
