សម្តេច ស ខេង បាននិយាយនៅឯពិធីមួយក្នុងខេត្តបាត់ដំបង យ៉ាងដូច្នេះថា៖ «ខ្ញុំសួរថា ចុះបើកសាងផ្ទះនៅតំបន់អាណាធិបតេយ្យ នៅភ្នំពេញមួយចំនួន ពេលដែលភ្លើងឆេះនោះ ឡានវាចូលមិនដល់ដើម្បីទៅសង្រ្គោះ ព្រោះផ្ទះវាណែន ហើយអត់មានផ្លូវចូល … តើអ្នកថាហ្នុង ជាការគោរពសិទ្ធិមនុស្សទេ? ថាវាខុសច្បាប់ទេ? ផ្ទុយទៅវិញយើងទេ ដែលរំលោភសិទ្ធិមនុស្ស ព្រោះសង្រ្គោះមនុស្សវាអត់បាន មនុស្សស្លាប់ ទ្រព្យសម្បត្តិវាខូចខាត វាឆេះអស់។»
សម្តេចបានបន្តថា៖ «បានន័យថា យើងត្រូវរៀបឲ្យមានសណ្តាប់ធ្នាប់ មិនមែនអត់ទេ ក៏ប៉ុន្តែខ្ញុំឯកភាពយល់ថា ការរៀបចំរបស់យើងមិនត្រូវឲ្យប៉ះពាល់សិទ្ធិជាមូលដ្ឋានរបស់ប្រជាពលរដ្ឋ … ខ្ញុំឯកភាព … ប៉ុន្តែការៀបចំឲ្យមានសណ្តាប់ធ្នាប់គឺជាការត្រឹមត្រូវ។»
អង្គការសង្គមស៊ីវិលជាតិ-អន្តរជាតិ និងសហគមន៍ចំនួន ៦៥ នៅថ្ងៃទី១៣ ខែសីហា ឆ្នាំ២០២០ បានអំពាវនាវឱ្យរដ្ឋាភិបាលកម្ពុជាទម្លាក់ចោលនូវសេចក្តីព្រាងច្បាប់ស្តីពីសណ្តាប់ធ្នាប់សាធារណៈនេះ ដោយអះអាងថាមានលក្ខណៈគាបសង្កត់។
អត្ថបទទាក់ទង
ក្រុមអង្គការទាំងនោះបានគូសបញ្ជាក់នូវក្តីបារម្ភចម្បងៗមួយចំនួននៅក្នុងសេចក្តីព្រាងច្បាប់នោះ រួមមាន មាត្រាដែលហាមឃាត់ការតាំង ឬការលក់ដូរទំនិញបំពានលើទីសាធារណៈគ្មានសណ្តាប់ធ្នាប់ និងការសុំទានតាមគ្រប់រូបភាព។
ការបារម្ភផ្សេងទៀត គឺមាត្រាដែលហាមឃាត់ការប្រើពាក្យសម្តីឮខ្លាំងៗ និងកំណត់រាល់សំឡេងបង្កឱ្យឮខ្លាំងរំខានដល់អ្នកដទៃត្រូវបញ្ឈប់ចាប់ពីម៉ោង១២ ថ្ងៃត្រង់ ដល់ម៉ោង១៤ រសៀល និងចាប់ពី ម៉ោង២២យប់ ដល់ម៉ោង ៥ព្រឹក លើកលែងតែមានការអនុញ្ញាតពីអាជ្ញាធរមានសមត្ថកិច្ច។
ក្រុមអង្គការបានអះអាងបន្តថា មាត្រាផ្សេងទៀតដែលហាមឃាត់បុរសស្លៀកតែខោ អត់ពាក់អាវ ឬស្លៀកតែខោទ្រនាប់បង្ហាញផ្នែកខ្លះនៃកេរ្តិ៍ភេទ និងហាមឃាត់ស្ត្រីពីការស្លៀកពាក់ខ្លីខើចលើខើចក្រោម ឬ ស្លៀកពាក់ស្តើងមើលឃើញកេរ្ដិ៍ភេទនោះ គឺ «ជាការបំពានលើសេរីភាពក្នុងការបញ្ចេញមតិ ប៉ះពាល់ដល់ស្វ័យភាពរបស់បុគ្គលនិងពុំបានពន្យល់ច្បាស់លាស់អំពីនិយមន័យនៃសេចក្តីថ្លៃថ្នូរ ដូច្នេះ ជាការទុកចន្លោះប្រហោងឱ្យមានការអនុវត្តពុំស្មើភាពគ្នា»៕
