នៅទីបំផុត សភាអឺរ៉ុបបានសម្រេចការបោះឆ្នោត លើកិច្ចព្រមព្រៀងពាណិជ្ជកម្មសេរីជា មួយនឹងប្រទេសសាំងហ្គាពួរហើយ ខណៈដែលការបោះឆ្នោតនេះ ធ្វើឡើងនៅទីក្រុង Strasbourg ប្រទេសបារាំងកាលពីថ្ងៃពុធ ទី១៣ ម្សិលមិញនេះ។ កិច្ចព្រមព្រៀងពាណិជ្ជកម្មនេះ ត្រូវបានគេមើលឃើញថា នឹងកាត់បន្ថយពន្ធគយស្ទើរតែទាំងអស់ ទៅលើមុខទំនិញនាំចូលរវាងភាគីទាំងពីរ។
នាយករដ្ឋមន្ត្រី សាំងហ្គាពួ លោក Lee Hsien Loong បានសរសរនៅលើហ្វេសប៊កផ្លូវការ របស់ខ្លួនថា កិច្ចព្រមព្រៀងពាណិជ្ជកម្មសេរីនេះ នឹងផ្ដល់ឲ្យសាំងហ្គាពួរ និងអឺរ៉ុប ដែលជាដៃគូវិនិយោគ និងពាណិជ្ជកម្មដ៏ធំរបស់សាំងហ្គាពួរ នឹងមានលទ្ធភាពកាន់តែប្រសើរឡើងក្នុងការចូលទៅកាន់ទីផ្សាររៀងៗខ្លួន។ ហើយវាក៏ជំរុញឲ្យមានការវិនិយោគ និងឱកាសពាណិជ្ជកម្មកាន់តែច្រើនឡើងថែមទៀតផង។
អត្ថបទទាក់ទង!
លោក Lee ក៏បានបន្ថែមទៀតថា កិច្ចព្រមព្រៀងនេះនឹងដឹកមុខ រវាងកិច្ចព្រមព្រៀងពាណិជ្ជកម្មសេរីអឺរ៉ុប និងអាស៊ាន ហើយវាក៏នឹងជួយលើកកម្ពស់នូវកិច្ចសហប្រតិបត្តិការរវាងតំបន់ទាំងពីរផងដែរ។
រដ្ឋមន្ត្រីទទួលបន្ទុកទំនាក់ទំនងពាណិជ្ជកម្មនៃប្រទេសសាំងហ្គាពួរ លោក S. Iswaran បានលើកឡើងនៅក្នុងសេចក្ដីថ្លែងការណ៍ថា ក្រុមហ៊ុនសាំងហ្គាពួរ និងអឺរ៉ុប ពិសេសនៅក្នុងវិស័យសហគ្រាសខ្នាតតូច និងមធ្យម អាចស្វែងរកអត្ថប្រយោជន៍ជាច្រើន ពីការកាត់បន្ថយរបាំងពន្ធគយ និងមិនមែនពន្ធគយ។
កិច្ចព្រមព្រៀងពាណិជ្ជកម្មសេរីរវាងអឺរ៉ុប និងសាំងហ្គាពួរនេះ នឹងកាត់បន្ថយពន្ធនាំចូល ដែលអនុញ្ញាតឲ្យសាំងហ្គាពួរអាចនាំចូលទំនិញទៅអឺរ៉ុបរហូតដល់៨០% ដោយមិនជាប់ពន្ធ នៅពេលដែលកិច្ចព្រមព្រៀងនេះ ចូលជាធរមាន។ ក្នុងនោះ គឺមានរួមបញ្ជូលនូវមុខទំនិញ ដែលជាប្រភេទ ម្ហូបអាហារអាស៊ី និងផលិតផលអេឡិចត្រូនិក។
តាមសារព័ត៌មាន Straitstimes របស់សាំងហ្គាពួរបានឲ្យដឹងថា បច្ចុប្បន្នមានក្រុមហ៊ុនអឺរ៉ុបជាង ១ម៉ឺនក្រុមហ៊ុន បានបើកប្រតិបត្តិការអាជីវកម្មនៅសាំងហ្គាពួរ ហើយអឺរ៉ុប ក៏ជាដៃគូពាណិជ្ជកម្មធំបំផុតទី ៣ របស់ប្រទេសអាស៊ានមួយនេះផងដែរ ខណៈដែលទំហំពាណិជ្ជកម្មទ្វេភាគីកាលពីឆ្នាំ ២០១៨ មានរហូតដល់ ៥៣ពាន់លាន អឺរ៉ូ ឬស្មើនឹងប្រមាណ ៦០ពាន់លានដុល្លារអាមេរិក។
ដោយឡែក កន្លងមកនេះ សហភាពអឺរ៉ុប ក៏បានបង្ហាញពីគោលដៅក្នុងការចុះកិច្ចព្រៀមព្រៀងពាណិជ្ជកម្មសេរី ជាមួយប្រទេសវៀតណាមផងដែរ ខណៈដែលកាលពីចុងឆ្នាំ ២០១៨ កន្លងទៅ គណៈកម្មការអឺរ៉ុប ដាក់សំណើនេះដើម្បីអនុម័តហើយ។ ទោះយ៉ាងណា កិច្ចព្រមព្រៀងនេះ កំពុងរង់ចាំឆ្លងការសម្រេចពីប្រទេសជា សមាជិក សហភាពអឺរ៉ុប ២៨ប្រទេស និងសភាអឺរ៉ុបផងដែរ។
អត្ថបទគួរឲ្យចាប់អារម្មណ៍!
ការឈានទៅរកការទទួលបាននូវកិច្ចព្រមព្រៀងពាណិជ្ជកម្មសេរីរបស់វៀតណាមជាមួយនឹង EU នេះ គឺដោយសារតែភាគីទាំងពីរ ឯកភាពគ្នាលើការលើកកម្ពស់លិទ្ធិប្រជាធិបតេយ្យ និងសិទ្ធិមនុស្ស។ លោកស្រី Cecilia Malmstrom ស្នងការពាណិជ្ជកម្មរបស់ EU បាននិយាយថា មិនមាននរណាម្នាក់បដិសេធថា មានបញ្ហាសិទ្ធិមនុស្សនៅវៀតណាមនោះឡើយ។
អ្នកជំនាញ សេដ្ឋកិច្ច មើលឃើញថា ប្រសិនបើវៀតណាមទទួលបានកិច្ចព្រមព្រៀងនេះមែន នោះវៀតណាមកាន់តែមានប្រៀបលើការប្រកួតប្រជែងជាមួយប្រទេសក្នុងតំបន់ ពិសេសគឺការនាំចេញតែម្ដង។
អត្ថបទគួរឲ្យចាប់អារម្មណ៍!
ទោះយ៉ាងណា កិច្ចព្រៀមព្រៀងពាណិជ្ជកម្មនេះ ត្រូវបានគេដឹងថា អាចនឹងលុបបំបាត់ពន្ធនាំចូលរហូតទៅវិញទៅមករវាងវៀតណាម និង EU រហូតដល់ ៩៩% ប៉ុន្ដែ មានទំនិញខ្លះអាចធ្វើឡើងទៅតាមដំណាក់កាល និងខ្លះទៀត ពិសេស ផលិតផលកសិកម្មអាចកំណត់ជាកូតានាំចេញ។
ប្រភពព័ត៌មានក្នុងស្រុកវៀតណាមបានឲ្យដឹងថា ប្រសិនបើវៀតណាម ទទួលបានកិច្ចព្រមពៀងពាណិជ្ជកម្មសេរីពីអឺរ៉ុបមែន នោះវៀតណាមអាចនឹងត្រូវលុបពន្ធនាំចូលឡាន និងស្រា ពីប្រទេសអឺរ៉ុប។ រីឯ អឺរ៉ុបវិញ អាចនឹងលុបបំបាត់ពន្ធលើទំនិញសំខាន់ៗរបស់វៀតណាម ដូចជា វាយនភ័ណ្ឌ សំលៀកបំពាក់ និងស្បែកជើង ជាដើម។
អត្ថបទទាក់ទាញ!
ដោយឡែក និយាយពីកម្ពុជាវិញ ដ្បិតថា ប្រព័ន្ធអនុគ្រោះពន្ធ EBA កំពុងស្ថិតនៅភាពច្បាស់លាស់ ថានឹងត្រូវបាត់បង់ ឬក៏នៅបន្តក៏ដោយ ប៉ុន្ដែ រាជរដ្ឋាភិបាលកម្ពុជាក៏មិននៅស្ងៀមនោះដែរ ពោលគឺបាននិងកំពុងខិតខំពង្រីកបន្ថែមទីផ្សារទាំងថ្មីៗនឹងចាស់។
ជាក់ស្ដែង ថ្មីៗនេះ កាលពីថ្ងៃទី១៣ កុម្ភៈ កន្លងទៅនេះ ប្រទេសកម្ពុជា និងប្រទេសវៀតណាម បង្កើតនូវកិច្ចព្រមព្រៀងពាណិជ្ជកម្មរួមគ្នាមួយ ក្នុងការផ្តល់ភាពអនុគ្រោះពន្ធ សូន្យភាគរយ សម្រាប់ទំនិញមួយចំនួន ដែលនាំចេញ-នាំចូល រវាងប្រទេសទាំងពីរ។
ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានឲ្យដឹងថា កម្ពុជា និងវៀតណាមបានឯកភាពគ្នាលើការអនុគ្រោះពន្ធអត្រាសូន្យភាគរយ។ ដោយក្នុងនោះ វៀតណាមបានសម្រេចអនុគ្រោះពន្ធ សម្រាប់ទំនិញកម្ពុជាចំនួន ៣២បន្ទាត់ពន្ធគយ រួមជាមួយនឹងការផ្ដល់នូវកូតានាំចូលអង្ករចំនួន ៣០ម៉ឺនតោន និងសន្លឹកថ្នាំជក់ ៣ពាន់តោន នៅក្នុងឆ្នាំ ២០១៩ និងឆ្នាំ២០២០ ខណៈដែរភាគីកម្ពុជាវិញ ក៏បានផ្តល់ភាពអនុគ្រោះពន្ធអត្រាសូន្យភាគរយ ដូចគ្នា ទៅដល់មុខទំនិញវៀតណាមចំនួន ២៦បន្ទាត់ពន្ធគយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
