យោងតាមគេហទំព័រ សារព័ត៌មាន PRACHATAIដែលចុះផ្សាយដោយដកស្រង់សម្ដីរបស់នាយកអង្គការ Amnesty International ប្រចាំប្រទេសថៃ អ្នកស្រី ស៊ីថានុន បានធ្វើដំណើរតាមជើងហោះហើរមកកាន់កម្ពុជា កាលពីថ្ងៃទី១០ ខែវិច្ឆិកា ដើម្បីចូលបំភ្លឺនិងបង្ហាញភ័ស្តុតាងជុំវិញករណីចាប់ពង្រត់លោក វ៉ាន់ឆាឡឺម ដែលជាប្អូនប្រុសរបស់គាត់ នៅចំពោះមុខតុលាការកម្ពុជា ។ សវនាការនេះ គ្រោងធ្វើនៅថ្ងៃទី៨ ខែធ្នូ ។
អ្នកនាង ស៊ីថានុន ជាបងស្រីរបស់ វ៉ាន់ឆាឡឺម សាតសាក់ស៊ីត ដែលបាត់ខ្លួន ធ្លាប់បានប្រាប់វិទ្យុ សំឡេងសហរដ្ឋអាមេរិក (VOA) ថា អ្នកស្រីនឹងធ្វើដំណើរមកកម្ពុជា ដោយនាំក្រុមមេធាវីរបស់អ្នកស្រីដែលជាជនជាតិថៃ៣នាក់ មកជាមួយ ដើម្បីផ្ដល់ភ័ស្តុតាងដែលអ្នកស្រីសង្ឃឹមថា នឹងជំរុញឲ្យមានការស៊ើបអង្កេតលើការបាត់ខ្លួនប្អូនប្រុសក្នុងទីក្រុងភ្នំពេញ។
អ្នកស្រីបានថ្លែងប្រាប់ VOA ថា៖ «ពេលវេលាសម្រាប់យុត្តិធម៌ គឺពេលនេះ។ ឧក្រិដ្ឋកម្ម គឺជាឧក្រិដ្ឋកម្ម ហើយគ្មាននរណាម្នាក់ អាចនៅពីលើច្បាប់បានទេ។"
“ពេលវេលាសម្រាប់យុត្តិធម៌ គឺពេលនេះ។ ឧក្រិដ្ឋកម្ម គឺជាឧក្រិដ្ឋកម្ម ហើយគ្មាននរណាម្នាក់ អាចនៅពីលើច្បាប់បានទេ”
ដោយសារតែបញ្ហាជំងឺរាតត្បាតកូវីដ-១៩ ការហោះហើរពីថៃមកកម្ពុជាមានតែមួយជើងប៉ុណ្ណោះក្នុងមួយខែ ដូច្នេះ អ្នកស្រី ស៊ីថានុន ត្រូវធ្វើដំណើរមកកម្ពុជាមុនកាលបរិច្ឆេទកំណត់នៃសវនាការរបស់តុលាការ ស្ទើរតែមួយខែ ។
សេចក្ដីថ្លែងការណ៍របស់អង្គការ Amnesty International ប្រចាំប្រទេសថៃ និយាយថា "យើងស្វាគមន៍ចំពោះរដ្ឋាភិបាលកម្ពុជានិងរដ្ឋាភិបាលថៃ ដែលបានជួយសម្រួលក្នុងការចេញទិដ្ឋាការពិសេសដល់បងស្រីរបស់ វ៉ាន់ឆាឡឺម សាតសាក់ស៊ីត និងក្រុមមេធាវីរបស់អ្នកស្រី ដើម្បីធ្វើដំណើរមកកម្ពុជា ចូលរួមសវនាការតាមការកោះអញ្ជើញពីសាលាដំបូងរាជធានីភ្នំពេញ ។"
អង្គការ Amnesty International ក៏នៅបានជំរុញឲ្យអាជ្ញាធរនៃប្រទេសទាំងពីរ ផ្ដល់ការការពារសន្តិសុខដល់បងស្រីរបស់ វ៉ាន់ឆាឡឺម និងក្រុមមេធាវីរបស់អ្នកស្រី ក្នុងអំឡុងពេលស្នាក់នៅក្នុងប្រទេសកម្ពុជា ផងដែរ ។
លោក វ៉ាន់ឆាឡឺម គឺជាសកម្មជនប្រជាធិបតេយ្យល្បីឈ្មោះម្នាក់ ដែលតែងតែរិះគន់រដ្ឋាភិបាលយោធារបស់លោកនាយករដ្ឋមន្ត្រីថៃលោក ប្រាយុទ្ធ ចាន់អូចា។ សេចក្ដីរាយការណ៍នានា សរសេរថា សកម្មជននយោបាយថៃរូបនេះបានបាត់ខ្លួន បន្ទាប់ពីត្រូវជនមិនស្គាល់មុខមួយក្រុមបានចាប់រូបលោកចូលក្នុងរថយន្ត នៅខាងក្រៅអគារខុនដូមួយកន្លែង នៅក្នុងទីក្រុងភ្នំពេញ ។
រហូតមកដល់ពេលនេះ គឺជាង ៥ខែហើយ បន្ទាប់ពីការបាត់ខ្លួនរបស់លោក វ៉ាន់ឆាឡឺម ។
ប៉ុន្តែ ទោះជាយ៉ាងណា លោក ឆាយ គឹមខឿន អគ្គស្នងការរងនគរបាលជាតិ និងជាអ្នកនាំពាក្យ ធ្លាប់បានថ្លែងប្រាប់ VOA ថា រហូតមកដល់ពេលនេះ អាជ្ញាធរកម្ពុជា មិនទាន់មានភស្តុតាង ឬតម្រុយណាមួយ ដែលបញ្ជាក់លើព័ត៌មាននៃការបាត់ខ្លួនសកម្មជនថៃរូបនោះ នៅលើទឹកដីកម្ពុជានោះទេ៕
