យ៉ាងណាមិញ ថ្មីៗនេះ កូរ៉េខាងត្បូង ក៏ទើបរតែបានផលិត និងសាកល្បងដោយជោគជ័យនូវយន្ដហោះចម្បាំងដ៏ទំនើបលើកដំបូងរបស់ខ្លួនផងដែរ ខណៈដែលក្រសួងការពារជាតិរបស់ទីក្រុងសេអ៊ូលនៅថ្ងៃសុក្រនេះក៏បានប្រកាសពីផែនការបន្តការហ្វឹកហ្វឺនយោធាផ្ទាល់ឡើងវិញរវាងកូរ៉េខាងត្បូង និងសហរដ្ឋអាមេរិក បន្ទាប់ពីត្រូវបានផ្អាកជាយូរមកហើយក្នុងអំឡុងពេលធ្វើសមយុទ្ធយោធារួមគ្នា។ ការពង្រឹងវិស័យយោធារវាងប្រទេសទាំងពីរនេះគឺ មិនមានអ្វីក្រៅតែពីការបង្ហាញសាច់ដុំប្រាប់ទៅទីក្រុងព្យុងយ៉ាង សម្រាប់ការឆ្លើយតបទប់ស្កាត់កម្មវិធីអភិវឌ្ឍអាវុធនុយក្លេអ៊ែ និងមីស៊ីលផ្សេងៗទៀតរបស់រដ្ឋផ្តាច់ការមួយនេះនោះទេ។ នេះបើតាមការចុះផ្សាយដោយសារព័ត៌មានអន្តរជាតិធំៗ។
មែនទែនទៅ កូរ៉េខាងត្បូង គឺជាសម្ព័ន្ធមិត្តយុទ្ធសាស្រ្តដ៏សំខាន់មួយរបស់អាមេរិកក្នុងតំបន់អាស៊ីបូព៌ាចាប់តាំងសង្គ្រាមលោកលើកទី២ មក។ ហើយប្រទេសទាំងពីរនឹងចាប់ផ្តើមសមយុទ្ធ នៅរដូវក្តៅប្រចាំឆ្នាំរបស់ពួកគេនៅខែក្រោយនេះ បន្ទាប់ពីប្រធានាធិបតីកូរ៉េខាងត្បូង លោកយូន សុខយួល (Yoon Suk-yeol) ដែលបានចូលកាន់តំណែងកាលពីខែឧសភា បានប្តេជ្ញាថា នឹងធ្វើឱ្យមានសមយុទ្ធរួមគ្នារវាងកូរ៉េខាងត្បូង និងអាមេរិកវិញ ក្នុងការប្រឆាំងនឹងកូរ៉េខាងជើងតែម្តង។
រដ្ឋមន្ត្រីក្រសួងការពារជាតិកូរ៉េខាងត្បូង លោកលី យង់សិប (Lee Jong-sup) បានប្រាប់អ្នកយកព័ត៌មានថា «យើងគ្រោងនឹងរៀបចំការហ្វឹកហាត់ក្រុមវាយប្រហារតាមអាកាសរួមបញ្ចូលគ្នាជាមួយអាមេរិក និងសមយុទ្ធសម្រាប់ប្រតិបត្តិការវាយប្រហារតាមផ្លូវទឹកទ្រង់ទ្រាយធំផងដែរ»។
អត្ថបទគួរអាន
ជាការពិត ភាគីទាំងពីរបានកាត់បន្ថយការធ្វើសមយុទ្ធយោធារួមគ្នាអស់រយៈពេលប៉ុន្មានឆ្នាំមកហើយ ដោយសារការរាតត្បាតជំងឺកូវីដ១៩ និងខំបំពេញចិត្តកូរ៉េខាងជើង ដើម្បីបន្ធូរបន្ថយភាពតានតឹងនៅឧបទ្វីបកូរ៉េ។
យ៉ាងណាមិញ ការបំពេញចិត្តទីក្រុងព្យុងយ៉ាងនោះ មិនបានធ្វើឲ្យរដ្ឋផ្តាច់ការមួយនេះ បោះបង់មហិច្ឆតានុយក្លេអ៊ែររបស់ខ្លួនឡើយ ផ្ទុយទៅវិញប្រទេសនេះកាន់តែផ្គើនបន្ថែមទៀត ដោយបានបាញ់សាកល្បងមីស៊ីលអន្តរទ្វីប ក៏ដូចជាបង្កើនការផលិតអាវុធនុយក្លេអ៊ែរផងដែរនៅប៉ុន្មានខែថ្មីៗនេះ។
ប្រទេសកូរ៉េខាងជើងបានធ្វើការសាកល្បងមីស៊ីលក្នុងល្បឿនដែលមិនធ្លាប់មានពីមុនមកក្នុងឆ្នាំនេះ ហើយត្រូវបានគេជឿថា កំពុងរៀបចំសម្រាប់ការសាកល្បងនុយក្លេអ៊ែរលើកទីប្រាំពីររបស់ខ្លួនផងដែរ។
ប្រធានាធិបតីកូរ៉េខាងត្បូង លោកយូន សុខយួល (Yoon Suk-yeol) បាននិយាយថា «ទីក្រុងព្យុងយ៉ាងអាចបន្តសាកល្បងបែបនេះជាថ្មី នៅពេលណាក៏បាន ព្រោះគ្មានអ្នកណាហាមឃាត់បានទេ»។
ដូច្នេះហើយ ដើម្បីទប់ទល់នឹងការគម្រាមកំហែង ដែលក្បែរនឹងរបបផ្ទះនេះ ក្រសួងការពារជាតិកូរ៉េខាងត្បួងបាននិយាយថា ខ្លួននឹងខិតខំប្រឹងប្រែងឱ្យអស់ពីសមត្ថភាពក្នុងធ្វើការពង្រីក និងពង្រឹងនូវសមត្ថភាពប្រព័ន្ធបាញ់កម្ទេចមីស៊ីល ព្រមទាំងដាក់ពង្រាយប្រព័ន្ធរ៉ាដាស្ទាក់ចាប់មីស៊ីលលើអាកាសដ៏ទំនើបរបស់ខ្លួនផងដែរ៕
