អ្នកស្រី លឿង រី អាយុ ៦០ឆ្នាំ ដែលជាអាជីវករលក់ដូរថ្នាំជក់ និងម្លូ-ស្លា ហើយក៏ជាអ្នករងផលប៉ះពាល់ខ្លាំងនៅក្នុងផ្សាររំលងនេះ បាននិយាយថា តាំងពីមានការរីករាលដាលជំងឺកូវីដ-១៩មក ចំណូលពីការលក់ដូរពុំសូវបានដូចមុននោះទេ ដោយសារពុំសូវមានអ្នកទិញ ហើយអ្នកស្រីក៏បានបង្ខំចិត្តកាត់បន្ថយចំណាយចាយវាយផ្សេងៗ លើការហូបចុក និងលើការចាយវាយរបស់កូនចៅ នៅក្នុងគ្រួសាររបស់អ្នកស្រី ផងដែរ ។
អ្នកស្រី លឿង រី និយាយដូច្នេះថា៖ «របរដូចខ្ញុំ ជួនក៏លក់ដាច់ ជួនក៏អត់ទៅ ដល់មានបញ្ហាជំងឺ[កូវីដ-១៩]អ៊ីចឹងទៅ រកលុយមួយម៉ឺនជាងមិនចង់បានផង ថ្ងៃហ្នឹង»។
អ្នកជំងឺកូវីដ-១៩ ដែលបានរកឃើញវិជ្ជមានបន្ទាប់ពីមានការពាក់ព័ន្ធនឹង«ព្រឹត្តិការណ៍សហគមន៍ ២៨ វិច្ឆិកា» មានចំនួន ៤០នាក់ គិតត្រឹមថ្ងៃទី១១ ខែធ្នូ ខណៈដែលក្រសួងមហាផ្ទៃ សាលារៀនមួយចំនួន កន្លែងហាត់កីឡា និងផ្សារមួយចំនួន ត្រូវបានបិទបណ្តោះអាសន្ន ដើម្បីបង្ការការរីករាលដាលកាន់តែខ្លាំង ។
អាជីវករនៅផ្សាររំលង ខេត្តកំពង់ធំ ។
អត្ថបទទាក់ទង
អ្នកស្រី លឿង រី បានបន្តថា ចំណូលដែលគាត់រកបានមិនអាចផ្គត់ផ្គងទៅលើគ្រួសារគ្រប់ឡើយ ហើយចំណូលពីប្តីដែលជាកម្មករសំណង់គ្រាន់ជួយទប់ទល់ ។
អ្នកស្រីបាននិយាយថា៖ «ពេលខ្លះ ខ្ញុំរកមិនបាន ក៏ត្រូវយកលុយពីផ្ទះដែលប្ដីរកបានពីការធ្វើសំណង់មកចំណាយវិញក៏មាន និងត្រូវដាំបបរហូបដោយសារមិនមានលុយគ្រប់គ្រាន់ដើម្បីទិញចំណីខាងក្រៅ»។
អ្នកលក់ដូរត្រីម្នាក់ទៀតក្នុងផ្សាររំលងនេះដែរ គឺអ្នកស្រី វន សុខមាន អាយុ ៤៥ឆ្នាំ បាននិយាយប្រាប់ Newsroom Cambodia ថា កាលពីមិនទាន់មានការផ្ទុះជំងឺកូវីដ-១៩នេះ គាត់លក់ត្រីដាច់រហូតដល់មួយរយគីឡូក្រាម និងពេលខ្លះ បានដល់ទៅពីររយគីឡូ ប៉ុន្តែ ពេលឥឡូវនេះ ត្រឹមតែ ៣០-៤០គីឡូក្រាម ក៏លក់មិនអស់ផង ។
អ្នកស្រី វន សុខមាន និយាយថា ប្រាក់ចំណូលដែលទទួលបានពីការលក់ត្រីរបស់លោកស្រីពីមុន គឺបានរហូតដល់ជាងមួយលានរៀល ប៉ុន្តែ មកទល់ពេលនេះ ប្រាក់ចំណូលរបស់អ្នកស្រីបានធ្លាក់ចុះមកត្រឹមតែ ហាសិបម៉ឺនរៀលតែប៉ុណ្ណោះ ក្នុងមួយថ្ងៃ ជួនកាល មិនបានដល់ប៉ុណ្ណឹងផង ។
អ្នកស្រីបាននិយាយថា ៖ «ត្រីដែលលក់សល់ ត្រូវយកមកផ្ទះវិញ ហើយវាត្រូវខាតដើមទៀតផង» ។
ចំណែកអាជីវករលក់បន្លែនិងគ្រឿងទេសម្នាក់ទៀត គឺអ្នកស្រី មឿង គឿន អាយុ ៦១ឆ្នាំ ក៏បាននិយាយស្រដៀងគ្នាដែរថា ការលក់ដូរត្រូវបានរងផលប៉ះពាល់ដូចគ្នា ដែលពីមុន គាត់លក់ដាច់ រកចំណូលបានចន្លោះពី ដប់ម៉ឺនរៀល ទៅ ដប់ពីរម៉ឺនរៀល ក្នុងមួយថ្ងៃ ប៉ុន្តែ មកទល់ពេលនេះ បានធ្លាក់ចុះមកត្រឹមតែ ប្រាំមួយ ទៅ ប្រាំពីរម៉ឺនរៀល ក្នុងមួយថ្ងៃ តែប៉ុណ្ណោះ ។
លោក ហាក់ ម៉ុងហួត ដែលជាអភិបាលស្រុកតាំងគោក បាននិយាយបែបសម្រាលថា ផលប៉ះពាល់ពីកូវីដនៅមូលដ្ឋានរបស់គាត់មានលក្ខណៈស្រាល ។
លោកអភិបាលស្រុកបានប្រាប់ Newsroom Cambodia តាមទូរសព្ទថា បញ្ហាប៉ះពាល់ដល់អាជីវករលក់ដូរនៅក្នុងផ្សារសព្វថ្ងៃនេះ ដូចជាមិនមានជាផលប៉ះពាល់ខ្លាំងអ្វីនោះទេ គ្រាន់តែវាមានការធ្លាក់ចុះ ការលក់ពុំសូវដាច់បន្តិចដែរ ។
លោកអភិបាលស្រុកតាំងគោក បាននិយាយដូច្នេះថា «ខ្ញុំដូចជាមិនបានឃើញថាការប៉ះពាល់នេះធ្ងន់ធ្ងរខ្លាំងអីនោះទេ បើនិយាយឱ្យអាក្រក់បន្តិចនោះ គ្រាន់តែពួកគេបានកាត់បន្ថយទៅលើការចំណាយមិនចាំបាច់របស់ពួកគេតែប៉ុណ្ណោះ» ៕
