ក្រុមហ៊ុនជប៉ុន Sony ដែលជាក្រុមហ៊ុនផលិតឧបករណ៍អេឡិចត្រូនិកដូចជាទូរទស្សន៍ និងទូរស័ព្ទជាដើមនោះ បានប្រកាសថា បង្កើតក្រុមហ៊ុនបុត្រសម្ព័ន្ធមួយទៀត ដែលមានឈ្មោះថា Sony Mobility នៅខែមីនាខាងមុខនេះ ដើម្បីផ្តោតលើការផលិតយានយន្ដអគ្គិសនី។
គួរជម្រាបថា តាមគំរូរថយន្តអគ្គិសនីថ្មី Vision-S របស់ក្រុមហ៊ុននេះ ដែលបានបង្ហាញឡើង គឺវាមានផ្ទុកទៅដោយឧបករណ៍ចាប់សញ្ញាខាងក្នុង និងខាងក្រៅ ហើយក្រុមហ៊ុន Sony ក៏បានសាកល្បងបច្ចេកវិទ្យាបើកបរដោយស្វ័យប្រវត្តិចំពោះការផលិតរថយន្ដនេះផងដែរ។
យ៉ាងណាមិញ បើទោះបីជាវិស័យរថយន្តអគ្គិសនីនៅតូចនៅឡើយក៏ពិតមែន ខណៈដែលមានត្រឹមតែប្រហែល ៣ ភាគរយនៃការលក់បច្ចុប្បន្ននៅក្នុងសហរដ្ឋអាមេរិក ប៉ុន្តែវាកំពុងទាក់ទាញចំណាប់អារម្មណ៍ និងការវិនិយោគយ៉ាងច្រើនពីអ្នកប្រើប្រាស់ និងវិនិយោគិនធំៗ។ ជាក់ស្ដែងក្រុមហ៊ុនផលិតរថយន្ត General Motors ដែលមានមូលដ្ឋានៅសហរដ្ឋអាមេរិកក៏គ្រោងនឹងវិនិយោគជាង ៣៥ ពាន់លានដុល្លារលើរថយន្តអគ្គិសនីរហូតដល់ឆ្នាំ ២០២៥ ។
អត្ថបទទាក់ទង!
ជាមួយគ្នានេះដែរ អាជ្ញាធរនៅសហរដ្ឋអាមេរិកគ្រោងនឹងចំណាយប្រាក់រាប់ពាន់លានដុល្លារបន្ថែមទៀត ដើម្បីពង្រឹង និងពង្រីកបណ្តាញស្ថានីយ៍សាកអាគុយរថយន្ដ ព្រមទាំងលើកទឹកចិត្តពលរដ្ឋឱ្យឈប់ប្រើរថយន្ដប្រើប្រាស់ប្រេងឥន្ធនៈ និងងាកមកប្រើរថយន្ដអគ្គិសនីវិញផងដែរ។
សូមជម្រាបថា បច្ចុប្បន្ននេះ ក្នុងចំណោមក្រុមហ៊ុនផលិតរថយន្ដអគ្គិសនី គឺមានតែក្រុមហ៊ុនផលិតរថយន្តអគ្គិសនី Tesla មួយប៉ុណ្ណោះ ដែលបានបានក្លាយជាក្រុមហ៊ុនដែលទទួលបានការចាប់អារម្មណ៍ខ្លាំងពីអ្នកប្រើប្រាស់នៅជុំវិញពិភពលោក និងជាក្រុមហ៊ុនរថយន្តអគ្គិសនីដែលមានតម្លៃបំផុតលើពិភពលោកផងដែរ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
