លោក Yoon បានថ្លែងសុន្ទរកថា ទៅកាន់រដ្ឋសភារបស់ខ្លួនថា៖ «កូរ៉េខាងជើងនឹងធ្វើតេស្ដគ្រាប់បែកនុយក្លេអ៊ែរលើកដំបូងរបស់ខ្លួនក្នុងពេលឆាប់ៗនេះ គិតចាប់តាំងពីខែកញ្ញា ឆ្នាំ ២០១៧ មក ហើយព្យុងយ៉ាងហាក់ដូចជាបានបញ្ចប់ការត្រៀមលក្ខណៈរបស់ខ្លួនរួចជាស្រេចហើយ សម្រាប់ការធ្វើតេស្តនុយក្លេអ៊ែរនេះ»។
កាលពីពេលកន្លងទៅ សហរដ្ឋអាមេរិក កូរ៉េខាងត្បូង និងជប៉ុន សុទ្ធតែបានសន្យាថា នឹងដាក់ទណ្ឌកម្មយ៉ាងម៉ឺងម៉ាត់ និងសច្ចារួបរួមគ្នាផ្នែកយោធាចំពោះការសាកល្បងអាវុធនុយក្លេអ៊ែររបស់រដ្ឋផ្តាច់ការកូរ៉េខាងជើង ដែលនឹងបំពានទាំងស្រុងលើច្បាប់របស់ក្រុមប្រឹក្សាសន្តិសុខអង្គការសហប្រជាជាតិ។
ជាមួយគ្នានេះ លោក John Kirby អ្នកនាំពាក្យក្រុមប្រឹក្សាសន្តិសុខជាតិរបស់សហរដ្ឋអាមេរិក បានប្រាប់អ្នកសារព័ត៌មាននៅទីក្រុងវ៉ាស៊ីនតោនថា «សហរដ្ឋអាមេរិកជឿជាក់ថា កូរ៉េខាងជើងអាចនឹងធ្វើការសាកល្បងនុយក្លេអ៊ែរនៅពេលណាក៏បាន»។
មែនទែនទៅ ចាប់តាំងពីដើមឆ្នាំនេះមក ប្រទេសកូរ៉េខាងជើងបានធ្វើការសាកល្បងកាំជ្រួចមីស៊ីលទាំងរយៈចម្ងាយខ្លី និងវែងចំនួន ២៧ លើករួចហើយ ដែលកាលពីដើមខែតុលានេះ របបក្រុងព្យុងយ៉ាងដឹកនាំដោយបុរសខ្លាំងលោក គីម ជុងអ៊ុន បានធ្វើតេស្តមីស៊ីលប៉ាលេស្ទីក ដោយបាញ់រំលងពីលើប្រទេសជប៉ុនថែមទៀតផង។
អត្ថបទគួរអាន
យ៉ាងណាក៏ដោយ ប្រធានាធិបតីកូរ៉េខាងត្បូងបានពណ៌នាការបាញ់មីស៊ីលនាពេលកន្លងមករបស់កូរ៉េខាងជើងថា ប្រៀបបានជា «ការវាយប្រហារទុកជាមុន» លើសហគមន៍អន្តរជាតិ ដោយលោកបានធ្វើការប្តេជ្ញាថា កូរ៉េខាងត្បូងនឹងមិនចុះញ៉ម ហើយនឹងបង្កើនកិច្ចសហប្រតិបត្តិការយោធាជាមួយសហរដ្ឋអាមេរិកឲ្យកាន់តែខ្លាំង ដើម្បីទប់ទល់នឹងការគំរាមកំហែងទាំងអស់នេះ។
លោកបានបន្ថែមថា៖ «រដ្ឋាភិបាលរបស់លោកនឹងធ្វើការពង្រឹងវិស័យយោធាតាមរយៈជំហរការពាររួមគ្នារបស់កូរ៉េខាងត្បូង-សហរដ្ឋអាមេរិក ក៏ដូចជាកិច្ចសហប្រតិបត្តិការផ្នែកសន្តិសុខរវាងកូរ៉េខាងត្បូង សហរដ្ឋអាមេរិក និងប្រទេសជប៉ុនផងដែរ»។
ទោះបីជាបែបនេះក្តី ភាពតានតឹងបាននិងកំពុងស្ថិតក្នុងកម្រិតមួយដ៏ខ្ពស់នៅលើឧបទ្វីបកូរ៉េនៅពេលនេះ ដោយកូរ៉េខាងជើង និងកូរ៉េខាងត្បូងកាលពីព្រឹកថ្ងៃចន្ទ ទី ២៤ តុលា បានបាញ់កាំភ្លើងធំព្រមានដាក់គ្នាទៅវិញទៅមកនៅតាមព្រំដែនសមុទ្រភាគខាងលិចនៅក្នុងសមុទ្រលឿង។
ដោយឡែក ទីក្រុងសេអ៊ូល និងទីក្រុងវ៉ាស៊ីនតោន នៅថ្ងៃដដែលនោះ បានចាប់ផ្តើមសមយុទ្ធដែនសមុទ្ររួមគ្នារយៈពេលបួនថ្ងៃនៅសមុទ្រលឿង ដែលមានការចូលរួមពីកងទ័ពកូរ៉េខាងត្បូង កម្លាំងទ័ពអាកាស និងឆ្មាំឆ្នេរសមុទ្រ រួមជាមួយនឹងយោធាសហរដ្ឋអាមេរិក ស្របពេលដែលសេណារីយ៉ូនៃការផ្ទុះសង្គ្រាមកូរ៉េជាលើកទីពីរកំពុងស្ថិតក្នុងភាពផុយស្រួយស្រាប់ទៅហើយនោះ៕
