ក្នុងដំណើរទស្សនកិច្ចទៅកាន់ទីក្រុងវ៉ាស៊ិនតោននេះ រដ្ឋមន្ត្រីពាណិជ្ជកម្មកូរ៉េខាងត្បូងលោក Ahn Duk-geun គ្រោងនឹងជួបមន្ត្រីជាន់ខ្ពស់មកពីក្រសួងពាណិជ្ជកម្មអាមេរិក និងសេតវិមានមួយចំនួនព្រមទាំងមន្ត្រីមកពីក្រុមអ្នកវិភាគសំខាន់ៗ ដើម្បីពិភាក្សាពីច្បាប់បន្ទះឈីបនេះ។
រដ្ឋបាលរបស់លោក ចូ បៃដិន កាលពីខែមុនបាននិយាយថា រដ្ឋាភិបាលតម្រូវឲ្យក្រុមហ៊ុនដែលមានទទួលបានការឧបត្ថម្ភធន ជាមួយកញ្ចប់ថវិកាសរុបជិត៥៣ពាន់លានដុល្លារពីរដ្ឋ ដែលស្របទៅតាមច្បាប់បន្ទះឈីប គឺត្រូវតែធ្វើការបែងចែកប្រាក់ចំណេញដែលទទួលបានលើសកំណត់របស់ពួកគេ ហើយក្រុមហ៊ុនទាំងនោះ ក៏ត្រូវបង្ហាញពីផែនការក្នុងការជួយផ្ដល់ការឧបត្ថម្ភសម្រាប់សេវាថែទាំកុមារក្នុងតម្លៃសមរម្យផងដែរ។
ច្បាប់បន្ទះសៀគ្វីឬក៏ឈីបនេះបានដើរតួនាទីសំខាន់នៅក្នុងកិច្ចប្រឹងប្រែងរបស់រដ្ឋបាលលោក បៃដិន ដើម្បីនាំយកការផលិតបន្ទះឈីបនៅលើទឹកដីអាមេរិក ហើយភាពជោគជ័យរបស់ច្បាប់នេះ គឺមានសារៈសំខាន់ចំពោះមហិច្ឆតារបស់សហរដ្ឋអាមេរិកក្នុងការបន្តនាំមុខប្រទេសចិននៅក្នុងទីផ្សារពិភពលោក។
ខណៈដែលការលើកទឹកចិត្តនេះមានសារៈសំខាន់សម្រាប់ការសម្រេចចិត្តវិនិយោគរបស់ក្រុមហ៊ុនផលិតបន្ទះឈីបនោះ លក្ខខណ្ឌមួយចំនួនដើម្បីទទួលបានប្រាក់ឧបត្ថម្ភកំពុងធ្វើឱ្យក្រុមហ៊ុនផលិតបន្ទះឈីបរបស់កូរ៉េខាងត្បូងគឺក្រុមហ៊ុន Samsung Electronics Co Ltd និងក្រុមហ៊ុន SK Hynix Inc ស្ថិតក្នុងស្ថានភាពពិបាកនឹងសម្រេចចិត្តថា តើត្រូវដាក់ពាក្យស្នើសុំមូលនិធិនេះ ឬក៏យ៉ាងណា។
អត្ថបទគួរអាន
នៅក្រោមច្បាប់បន្ទះសៀគ្វីនេះបានកំណត់ថា ក្រុមហ៊ុនដែលទទួលយកប្រាក់លើកទឹកចិត្តទាំងអស់ គឺត្រូវបានតម្រូវឱ្យចែករំលែកជាមួយរដ្ឋាភិបាលសហរដ្ឋអាមេរិកនូវចំណែកនៃប្រាក់ចំណេញរបស់ពួកគេដែលកើនលើសពីការព្យាករពីដំបូងតាមកម្រិតដែលបានព្រមព្រៀងគ្នា។
ក្រុមហ៊ុនដែលទទួលបានការឧបត្ថម្ភធនពីច្បាប់បន្ទះឈីបនេះ នឹងត្រូវបានហាមឃាត់ក្នុងការចូលរួមក្នុងការស្រាវជ្រាវរួមគ្នា និងកិច្ចខិតខំប្រឹងប្រែងផ្តល់អាជ្ញាបណ្ណបច្ចេកវិទ្យា ឬការពង្រីកដែនសមត្ថភាពផលិតបន្ទះឈីបនៅបរទេស ដែលពាក់ព័ន្ធដូចជាប្រទេសចិនជាដើមសម្រាប់ រយៈពេល ១០ ឆ្នាំ ខណៈដែលបច្ចុប្បន្នទាំងក្រុមហ៊ុន Samsung Electronics និងក្រុមហ៊ុន SK Hynix របស់កូរ៉េខាងត្បូងគឺកំពុងដំណើរការរោងចក្រផលិតបន្ទះឈីបនៅក្នុងប្រទេសចិនរួចទៅហើយនោះ។
ក្រុមអ្នកវិភាគបាននិយាយថា ក្រុមហ៊ុនផលិតបន្ទះឈីបភាគច្រើនក៏មានការព្រួយបារម្ភអំពីតម្រូវការឱ្យបង្ហាញព័ត៌មានអំពីការព្យាករប្រាក់ចំណេញ និងប្រតិបត្តិការរបស់ពួកគេផងដែរពីព្រោះបញ្ហាទាំងនេះត្រូវបានចាត់ទុកថាជាឯកសារសម្ងាត់នៃការធ្វើពាណិជ្ជកម្ម៕
អត្ថបទ ៖ សុខ ជា
