ក្រុមហ៊ុនយក្សកូរ៉េខាងត្បូង Hyundai Motor គ្រោងវិនិយោគ១០ពាន់លានដុល្លារនៅអាមេរិកនៅត្រឹមឆ្នាំ២០២៥

បើតាមការគូសបញ្ជាក់របស់ក្រុមហ៊ុនកូរ៉េខាត្បូងមួយនេះ ការវិនិយោគបន្ថែមនេះ មានជាងពាក់កណ្ដាល នឹងត្រូវវិនិយោគទៅលើរោងចក្រផលិតថយន្ដអគ្គិសនី និងអាគុយរថយន្ដ និងទុនមួយចំណែកទៀតនឹងត្រូវផ្ដោតទៅលើសកម្មភាពផលិតមនុស្សយន្ដ ឬហៅថារ៉ូបូត ការអភិវឌ្ឍការដឹកជញ្ជូនផ្លូវអាកាសជាមួយនឹងការប្រើប្រាស់យន្ដហោះគ្មានមនុស្សបើក ឬហៅថាដ្រូន ការផលិតរថយន្ដបើកបរដោយស្វ័យប្រវត្តិ និងបញ្ញាសប្បនិម្មិត (AI) ជាដើម។

កាលពីថ្ងទី ២០ឧសភា ក្រុមហ៊ុន Hyundai បានប្រកាសអំពីផែនការវិនិយោគដល់ទៅ ៥ពាន់៥រយលានដុល្លារអាមេរិក នៅក្នុងរដ្ឋចចា សហរដ្ឋអាមេរិក ដើម្បីសាងសង់រោងចក្រផលិតរថយន្ដអគ្គិសនី និងអាគុយរថយន្ដអគ្គីសនី ដោយរំពឹងថា នឹងចាប់ផ្ដើមសាងសង់ឡើងនៅឆ្នាំ២០២៣ និងអាចចាប់ផ្ដើមផលិតកម្មបែបពាណិជ្ជកម្មបាននៅត្រឹមពាក់កណ្ដាលឆ្នាំ២០២៥។ រោងចក្រនេះ រំពឹងថា នឹងអាចផលិតផលិតរថយន្ដអគ្គិសនីបានប្រមាណ៣០ម៉ឺនគ្រឿងក្នុងមួយឆ្នាំ ជាមួយនឹងការបង្កើតការងារនៅអាមេរិកបានដល់ជាង៨ពាន់កន្លែងផងដែរ។

បន្ថែមពីលើការវិនិយោគរោងចក្រផលិតរថយន្ដអគ្គិសនីនេះ ក្រុមហ៊ុនយក្សកូរ៉េខាងត្បូងមួយនេះ ក៏បានប្រកាសពីការពង្រីកទុនវិនិយោគបន្ថែម ៥ពាន់លានដុល្លារអាមេរិកទៀត នៅត្រឹមឆ្នាំ២០២៥ដែរ ដោយការវិនិយោគនេះ នឹងផ្ដោតទៅលើសកម្មភាពផលិតមនុស្សយន្ដ ឬហៅថារ៉ូបូត ការអភិវឌ្ឍការដឹកជញ្ជូនផ្លូវអាកាសជាមួយនឹងការប្រើប្រាស់យន្ដហោះគ្មានមនុស្សបើក ឬហៅថាដ្រូន ការផលិតរថយន្ដបើកបរដោយស្វ័យប្រវត្តិ និងបញ្ញាសប្បនិម្មិត (AI)ជាដើម។ដូច្នេះ រហូតដល់ឆ្នាំ២០២៥ ក្រុមហ៊ុនយក្សកូរ៉េខាងត្បូងនេះ នឹងមានការវិនិយោគបន្ថែមសរុបនៅអាមេរិកដល់ទៅជាង ១០ពាន់លានដុល្លារ គឺលើសពីទំហំទឹកប្រាក់វិនិយោគជាង ៧ពាន់លានដុល្លារ ដែលខ្លួនបានប្រកាសកាលពីឆ្នាំមុនទៅទៀត។

ក្រុមហ៊ុន Hyundai ដែលជាក្រុមហ៊ុនផលិតរថយន្ដធំបំផុតទី៣ក្នុងពិភពលោក បើគិតទៅលើការលក់រថយន្ដនៅទូទាំងពិភពលោក។ លោកចូបៃឌិន បានថ្លែងប្រាប់អ្នកសារព័ត៌មានដែរថា ក្រុមហ៊ុន Hyundai នឹងជួយធ្វើឲ្យមានការផ្លាស់ប្ដូរ និងពន្លឿងការអភិវឌ្ឍវិស័យយានយន្ដរបស់អាមេរិក ខណៈដែលអាមេរិកមានគោលដៅ នឹងជំរុញឲ្យមានការប្រើប្រាស់យានយន្ដដើរដោយថាមពលអគ្គិសនីទាំងអស់នាពេលអនាគត៕