ក្រុមហ៊ុនកូរ៉េខាងត្បូងចំនួនបីគឺរួមមានក្រុមហ៊ុន LG Energy Solution, Samsung និង SK Innovation បានក្ដោបក្ដាប់ទីផ្សារជិត ៣៥% នៃទីផ្សាររថយន្តអគ្គិសនីទូទាំងពិភពលោក ដែលបានធ្លាក់ចុះតិចតួចបំផុតត្រឹមតែ ០,២ ភាគរយ ប៉ុណ្ណោះ។ នេះបើតាមទិន្នន័យស្រាវជ្រាវដោយស្វាប័ន SNE Researchរបស់កូរ៉េខាងត្បូង។
សូមជម្រាបថា ក្រុមហ៊ុន LG Energy Solution ដែលផ្គត់ផ្គង់អាគុយសម្រាប់ម៉ូឌែលរថយន្តអគ្គិសនី ដោយក្រុមហ៊ុន Tesla ក្រុមហ៊ុន Volkswagen និង Ford បានស្ថិតនៅក្នុងចំណាត់ថ្នាក់លេខ ២ ដោយមានចំណែកទីផ្សារផលិតអាគុយរថយន្ដអគ្គិសនី ជាង២៤% ក្នុងរយៈពេល៨ខែនៅឆ្នាំនេះ បន្ទាប់ពីក្រុមហ៊ុន ស៊ីអេធីអិល (CATL) របស់ប្រទេសចិនដែលមានចំណែកទីផ្សារជាង ៣០ ភាគរយ។
ទន្ទឹមនេះ ក្រុមហ៊ុន Panasonic របស់ជប៉ុនស្ថិតក្នុងចំណាត់ថ្នាក់លេខ ៣ ដែលមានចំណែកទីផ្សារជាង ១១% តាមពីក្រោយដោយក្រុមហ៊ុន BYD របស់ចិនមាន ១០ ភាគរយ។ ដោយឡែក ក្រុមហ៊ុន SK Innovationរបស់កូរ៉េខាងត្បូង ទទួលបានចំណាត់ថ្នាក់លេខ ៥ ជាមួយចំណែកទីផ្សារជាង ៥% ដោយបានផ្តួលគូប្រជែងរបស់ខ្លួនគឺ Samsung ដែលមានចំណែកទីផ្សារត្រឹមតែ ជាង៣%ប៉ុណ្ណោះ។
អត្ថបទទាក់ទង
គួរជ្រាបថា ការលក់អាគុយរថយន្តអគ្គសនីរបស់ក្រុមហ៊ុនទាំងនេះ បានកើនឡើងយ៉ាងខ្លាំង ពោលគឺស្របតាមតម្រូវការដ៏រឹងមាំសម្រាប់រថយន្តប្រើថាមពលអគ្គិសនី ដែលកំពុងមានការកើនឡើងកាន់តែច្រើន។ ប៉ុន្តែអ្នកឃ្លាំមើលទីផ្សាររំពឹងថា នឹងមានការប្រកួតប្រជែង និងប្រឈមមុខកាន់តែខ្លាំងក្លាឡើងផងដែរ ពិសេសគឺការប្រកួតប្រជែងខ្លាំងពីក្រុមហ៊ុនចិន ដែលកំពុងបង្កើនចំណែកទីផ្សារផលិតអាគុយរថយន្តអគ្គិសនីយ៉ាងខ្លាំង។
សូមបញ្ជាក់ដែរថា ថ្មីៗនេះ ក្រុមហ៊ុនកូរ៉េ SK ក៏ទើបតែបានចាប់ដៃគ្នាជាមួយនឹងក្រុមហ៊ុន Ford Motor ដើម្បីបោះទុនវិនិយោគដល់ទៅជាង ១១ពាន់លានដុល្លារអាមេរិក បង្កើតរោងចក្រដំឡើងរថយន្ដអគ្គិសនីរបស់ Ford និងរោងចក្រផលិតអាគុយរថយន្ដអគ្គិសនីធំៗចំនួន៣ទៀតនៅក្នុងសហរដ្ឋអាមេរិកផងដែរ៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
