នេះបើយោងតាមរបាយការណ៍របស់ស្ថាប័នស្រាវជ្រាវដ៏ធំមួយលំដាប់ពិភពលោកឈ្មោះ ឌឹលយ (Deloitte)។
បញ្ហាប្រែប្រួលអាកាសធាតុគឺជារឿងដ៏សំខាន់មួយដែលពិភពលោក ពិសេសប្រទេសធំៗដាក់ការចាប់អារម្មណ៍ និងបង្កើតកិច្ចខិតខំប្រឹងប្រែងជាច្រើនក្នុងការដោះស្រាយបញ្ហានេះ។ យ៉ាងណាមិញ តាមការស្រាវជ្រាវរបស់ស្ថាប័ន ឌឹលយ ប្រសិនបើមិនចាត់វិធានការទាន់ពេលចំពោះការប្រែប្រួលអាកាសធាតុ តំបន់អាស៊ីអាគ្នេយ៍អាចនឹងខាតបង់ប្រាក់ ២៨ ទ្រីលានដុល្លារ ក្នុងរយៈពេល ៥០ ឆ្នាំខាងមុខ និងកាត់បន្ថយកំណើនផលិតផលក្នុងស្រុកសរុបជាមធ្យម ៧,៥% ជារៀងរាល់ឆ្នាំក្នុងរយៈពេលដូចគ្នា។
ផ្ទុយទៅវិញ ប្រសិនបើតំបន់អាស៊ីអាគ្នេយ៍បង្កើនកិច្ចខិតខំប្រឹងប្រែងលើបញ្ហាបម្រែបម្រួល អាកាសធាតុ និងកាត់បន្ថយការបំភាយឧស្ម័នបានឆាប់រហ័សនោះ វាអាចជួយឲ្យតំបន់នេះ នឹងសម្រេចបាននូវកំណើនសេដ្ឋកិច្ចក្នុងទំហំទឹកប្រាក់ ១២.៥ ទ្រីលានដុល្លារ ជាមួយនឹងកំណើនផលិតផលក្នុងស្រុកសរុបគិតជាមធ្យម ៣,៥% ជារៀងរាល់ឆ្នាំក្នុងរយៈពេល ៥០ ឆ្នាំខាងមុខ។នេះបើតាមរបាយការណ៍ពីស្ថាប័នស្រាវជ្រាវ ឌឹលយ។
សូមជម្រាបថា អាស៊ីអាគ្នេយ៍មានពលរដ្ឋសរុបប្រមាណ ៥ រយលាននាក់ ហើយមានផលិតផលក្នុងស្រុកសរុបចំនួន ៣ ទ្រីលានដុល្លារ។ ទន្ទឹមនេះ ប្រទេសទាំងអស់ក្នុងតំបន់អាស៊ាន បូករួមប្រទេស ទីម័រឡេស្ដេត្រូវបានគេមើលឃើញពីកំណើនផលិតផលក្នុងស្រុកសរុបជាមធ្យមសម្រាប់មនុស្សម្នាក់ពី ៥% ទៅ ១២% ជារៀងរាល់ឆ្នាំចាប់តាំងពីសតវត្សទី ២១ មក។
អត្ថបទគួរអាន
ហេតុអ្វី ក៏ត្រូវបារម្ភពីរឿងបម្រែបម្រួលអាកាសធាតុ ? មែនទែនទៅ បញ្ហាបម្រែបម្រួលអាកាសធាតុនេះ វាបង្កបញ្ហាច្រើនយ៉ាងណា ប្រសិនបើគ្មានវិធានការដោះស្រាយ ដូចជាវានឹងបណ្តាលឱ្យមានការរំខានធំៗ ដល់វិស័យកសិកម្ម ព្រមទាំងវិស័យទេសចរ ក៏ដូចជារំខានដល់ជីវភាពរស់នៅរបស់ពលរដ្ឋ ដោយសារការកើនឡើងនូវកម្ពស់ទឹកសមុទ្រ កម្ដៅផែនដី និងគ្រោះមហន្ដរាយធម្មជាតិនានាជាដើម។
ជាក់ស្ដែង តាមរបាយការណ៍របស់អង្គការឧតុនិយម របស់អង្គការសហប្រជាជាតិដែលចេញផ្សាយនៅថ្ងៃទី១ កញ្ញានេះ បានឱ្យដឹងថាក្នុងរយៈពេល ៥០ឆ្នាំចុងក្រោយនេះ គ្រោះធម្មជាតិមានដល់ទៅ ជាង ១ម៉ឺនករណី ដែលបានសម្លាប់មនុស្ស ជាង ២លាននាក់ និងបង្កការខូចខាតសេដ្ឋកិច្ច ក្នុងតម្លៃជាង ៣ទ្រីលានដុល្លារ។ ក្នុងនោះ ប្រទេសកំពុងអភិវឌ្ឍមានចំនួនមនុស្សស្លាប់ច្រើនជាងគេ រហូតដល់ ៩០% នៃចំនួនអ្នកស្លាប់សរុប២លាននាក់ ខណៈក្រុមប្រទេសអ្នកមានរងការខូចខាតសេដ្ឋកិច្ចធ្ងន់ធ្ងរ គឺស្មើនឹង ៦០% នៃការខាតបង់សរុបក្នុងពិភពលោក៕
អត្ថបទ៖ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
