ដើម្បី ផ្ដល់ជាគំនិតគន្លឹះដល់យុវជន ថ្មីៗនេះ សហភាពសហព័ន្ធយុវជនកម្ពុជា បានរៀបចំសិក្ខាសាលា តាមប្រព័ន្ធអនឡាញមួយស្តីពី ការជំរុញសហគ្រិនភាពយុវជន ក្រោមប្រធានបទ «ឱកាសការងារសម្រាប់យុវជនក្នុងបរិបទនៃការរីករាលដាលជំងឺកូវីដ-១៩» ដោយមានការចូលរួមពីសំណាក់វាគ្មិនសំខាន់ៗជាច្រើននាក់។
ដើម្បីទទួលបានឱកាសការងារ ក្នុងបរិបទកូវីដ-១៩ តើយុវជន គួរត្រៀមខ្លួន និង ពង្រឹងសមត្ថភាពខ្លួនឯងយ៉ាងណាខ្លះ?
ឆ្លើយតបនឹងបញ្ហាប្រឈមរបស់យុវជន សហភាពសហព័ន្ធយុវជនកម្ពុជា(ស.ស.យ.ក) បានរៀបចំសិក្ខាសាលា តាមប្រព័ន្ធអនឡាញស្តីពី ការជំរុញសហគ្រិនភាពយុវជន ក្រោមប្រធានបទ «ឱកាសការងារសម្រាប់យុវជនក្នុងបរិបទនៃការរីករាលដាលជំងឺកូវីដ-១៩» នៅថ្ងៃទី៨ ខែកញ្ញា ដែលមានការចូលរួមពី ឯកឧត្តម ហ៊ុន ម៉ានី ប្រធានស.ស.យ.ក, អ្នកឧកញ៉ា សៀ ឫទ្ធី អ្នកជំនួយដ៏ល្បីឈ្មោះនៅកម្ពុជា រួមជាមួយវាគ្មិនសំខាន់ៗជាច្រើនរូបទៀត។
ក្នុងកម្មវិធីសិក្ខាសាលានោះ ឯកឧត្តម ហ៊ុន ម៉ានី បានសង្កត់ធ្ងន់ថា វិបត្តិកូវីដ-១៩ បានជះឥទ្ធិពលយ៉ាងធ្ងន់ធ្ងរ ដល់វិស័យសេដ្ឋកិច្ចជាតិ នាពេលបច្ចុប្បន្ន ក្នុងនោះការស្វែងរកការងាររបស់យុវជន ក៏កាន់តែមានភាពលំបាក ព្រោះតែអាជីវកម្មមួយចំនួន ត្រូវផ្អាកសកម្មភាពរបស់ខ្លួន អំឡុងវិបត្តិនេះ ដូច្នេះ យុវជនត្រូវតែពង្រឹងខ្លួនបន្ថែមទៀត។
អត្ថបទគួរអាន
មិនខុសគ្នាប៉ុន្មានពីការលើកឡើងរបស់ឯកឧត្តម ហ៊ុន ម៉ានី អ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាលនៃក្រុមហ៊ុនវើលប្រ៊ីដគ្រុប យល់ឃើញថា ស្ថិតក្នុងវិបត្តិកូវីដ-១៩ យុវជនត្រូវពង្រឹងសមត្ថភាពរបស់ខ្លួន ដើម្បីទទួលបានឱកាសការងារ។ បន្ថែមលើការលើកឡើងខាងលើ អ្នកឧកញ៉ា សៀ ឫទ្ធី បានណែនាំដល់យុវជន គួរស្វែងរកការងារដែលត្រូវជំនាញរបស់ខ្លួន និងមិនត្រូវធ្វើការគិតតែពីប្រាក់ខែ ជាចម្បងនោះទេ។ អ្នកជំនួញដ៏លេចធ្លោនៅកម្ពុជារូបនេះ ក៏លើកទឹកចិត្តឱ្យយុវជន ត្រូវចេះថ្លឹងថ្លែងពេលស្វែងរកការងារដែលទទួលបានបទពិសោធន៍ ជាងការទទួលបានប្រាក់ខែ។
ក្រៅពីធ្វើការដើម្បីទទួលបានបទពិសោធន៍អ្នកឧកញ៉ា សៀ ឬទ្ធី ក៏បានណែនាំឱ្យយុវជន ត្រូវសិក្សាលម្អិតពីបរិយាកាសរបស់សង្គម។ ត្រង់ចំណុចនេះ អ្នកឧកញ៉ា ចង់ឱ្យយុវជនកម្ពុជា ត្រូវសម្លឹងមើលលើឱកាសទីផ្សារនាពេលបច្ចុប្បន្ន ថាទីផ្សារកំពុងមានតម្រូវការ លើការងារអ្វីខ្លះ។
សូមបញ្ជាក់ថា ក្នុងអំឡុងពេលមានការរីករាលដាលឆ្លងកូវីដ-១៩នេះ ប្រទេសនៅទូទាំងពិភពលោករួមទាំងកម្ពុជាសុទ្ធតែបានជួបនូវបញ្ហាសេដ្ឋកិច្ចធ្លាក់ចុះ និងការបាត់បង់ការងារធ្វើ ពិសេសនៅក្នុងវិស័យទេសចរណ៍តែម្ដង ដ្បិតថាវិស័យនេះ មានការរងផលប៉ះពាល់ខ្លាំងជាងគេដោយសារវិបត្តិកូវីដ-១៩។ ទោះយ៉ាងណា កន្លងមករាជរដ្ឋាភិបាលកម្ពុជាក៏បានដាក់ចេញនូវវិធានការចំនួន៩ជុំរួចមកហើយ ដើម្បីជួយដល់អ្នកដែលងាយរងគ្រោះរួមទាំងកម្មករនិយោជិត និងម្ចាស់អាជីវកម្មផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
